總網頁瀏覽量

2016年6月12日 星期日

老師的警語





幾年前寫過一篇名為 "老媽的罵語"的網誌,其實做了那末多年的學生,又怎會少得給阿Sir /Miss罵和窒呢,以下是我記憶中最經典的警語,我想網友們這方面該有不少"溫馨"的回憶罷(括號內的是我心底裏面想講而又不敢講出來的反應).  



* 做乜咁長頭髮,無錢飛髮呀? (係咪你俾錢先)



* 今次測驗真係淺到離譜,直情係賣大包 (咁點解我仲係唔合格嘅)



* 你睇下亜陳大文幾高分,點解佢又係人, 你又你人, 你就考成咁差 ? (唉,我點知啫,你去問吓陳大文嗰阿媽點解生得佢個仔咁聰明囉)



* 你哋兩個咁鍾意傾偈,而家罰你哋出去企,喺出便慢慢傾到夠(唔關我事㗎, 佢"漏"我傾㗎咋)


* 睇書, 做乜睇黑板; 睇黑板, 做乜睇我; 睇我, 做乜睇書 (真係搞到人都癫)



* 你哋係我教過最差嘅一班學生 (你好似同隔離班都係咁講喎)



*我喺辦公室都聽到你哋喺外邊咁嘈 (你好耳啫)



* 唔好意思,阻大家五分鐘 (你呢句說話十分鐘之前咪已經講過囉)



* 體育阿Sir今日請假,呢堂改為上物理  (救命呀!)


* 功課都會唔記得帶 , 咁你會不會唔記得食飯?  (唔做作業唔會死, 唔食飯會死人㗎)



* 有邊個識做呢條題目嘅舉手,冇呀,呢位同學笑得咁開心,上嚟做下呢條題目,咦,你隔離位嗰位同學笑得仲開心,一齊上嚟啦 (幸災樂禍¸抵你死)


* 下星期二測驗, 乜話, 下星期二已經有兩科測驗? 咁改呢個星期五啦(死多二錢重)



* 乜我上一堂話下個禮拜四至測驗咩? 𣎴過我横豎已經攞咗測驗卷嚟咧, 咁就改呢堂測驗啦 (唔係呀嗎, 咁無口齒㗎)



* 今日係18號,咁就請18號嘅同學起身去回答呢個問題 (好彩我32號,永遠唔會俾佢點中)



* 由於時間關係,我哋今日唔做埋下面果幾條題目啦 (你自己攪唔掂咋掛)




* 睇我做乜嘢, 我塊面又冇字 (大佬, 做乜發爛渣? 你唔睇我又點知我睇你?)



* 我咁辛苦教你哋,你哋都唔俾心機,蝕底係你哋㗎咋, 你哋成績差關我咩事,我人工一毫子都唔會少 (如果你嘅人工同我嘅成績掛勾,咁你就慘啦)



* 你哋嘅作文唔好抄,你哋睇過嘅書,我都睇過  (有冇咁博覽群書呀?)



* 今日我要搵平時唔踴躍發言嘅同學去回答呢條問題(廢話,邊度會有人自告奮勇舉手發言,回答問題架)



* 呢條題目嘅答案,我上一堂唔係已經講咗俾你哋聽嘅咩? (幾時有呀,你患咗咗失憶症呀)



9 則留言:

  1. 一生之中,求學時期係最多糗事,從小學到中學,到成人夜中,都是麻煩友,對部份所謂"老師"更是恨之刺骨,只有極少數,是懷念的,老師之為物,怪獸也,很"大"多數都不適宜做"教育",所以到"中學"畢業時竟想報讀師範。
    未輟學前,曾在班房跟教英文神父"隻揪",無講錯,係"隻揪",十來分鐘,如今此"垃圾"神職老師一早已還俗,現居美國,尚未去地獄。
    另一是會考前夕,成年人了,為了"正宇",在堂上跟教地埋的先而動口,繼而糾纏。你是教育局極高官,所以卡了我入師範之路。
    還有其他,也試過整個學期,被中文老師罸企門口,係整個學期,原因又係"正字理念",小的左仔也!
    今時的蜂哥哥之輩,小菜而已。

    回覆刪除
  2. 安兄留言:

    Kam On 已針對您的文章「老師的警語」留下新意見:

    一生之中,求學時期係最多糗事,從小學到中學,到成人夜中,都是麻煩友,對部份所謂"老師"更是恨之刺骨,只有極少數,是懷念的,老師之為物,怪獸也,很"大"多數都不適宜做"教育",所以到"中學"畢業時竟想報讀師範。
    未輟學前,曾在班房跟教英文神父"隻揪",無講錯,係"隻揪",十來分鐘,如今此"垃圾"神職老師一早已還俗,現居美國,尚未去地獄。
    另一是會考前夕,成年人了,為了"正宇",在堂上跟教地埋的先而動口,繼而糾纏。你是教育局極高官,所以卡了我入師範之路。
    還有其他,也試過整個學期,被中文老師罸企門口,係整個學期,原因又係"正字理念",小的左仔也!
    今時的蜂哥哥之輩,小菜而已。

    回覆刪除
    回覆
    1. 安兄唸書時已如此有性格?若生於今日, 想必成為社運先鋒. 小弟當年是典型的殖民地番書仔; 兩耳不聞天下事, 一心只顧吃喝玩~~

      刪除
  3. 如今後悔不已,因以為是"英雄"其實搵咗自己老襯!阻碍了"錢途"!
    班中一同學,讀書時非常鵪鶉,做官時又係鵪鶉,呵呵,退休後,變咗"烏鴉"
    人的變化係冇準則嘅!
    少年及青年時,跟某一長頭髮"二元"好鬼相似,不過二十多歲後,轉軚了,除了生活現實外,發覺"被正字實體"欺騙了亦時主因。
    又不過,當年的所謂老師,係今時今日標準,真係唔配,大佬所列"例子"如果係海漂之地發生,除牌無走雞!
    又又不過,有好有唔好,細仔係呢便受教育,就係HEA下,HEA下,太自由,太自主又係問題!

    回覆刪除
    回覆
    1. 正如嗰句講到爛嘅話 " 二十歲前唔激進係無情, 二十歲之後仲激進就係無知" ~~

      刪除
  4. 講返又講,夜中時,本應被踢出校,取消會考資格,不過,幾個老師,尤其其中一位,拚盡全力,聯合其他幾位替我求情,幸免於難,幾十年後,還感恩!該校長,嬲我嬲到放榜,我向他提出想唸師範,俾佢醒咗成個鐘頭,打消念頭,繼續學習市儈,跟校長見好多次,一笑泯恩仇,佢係當時華人係教育司最高級官員之一。

    回覆刪除
    回覆
    1. 您讓我想起了黃老霑嘅歌詞 : "個地球係圓又圓, 何必怕後爭前, 無話扒頭就會前, 一轉左變後邊, 個地球係圓又圓, 無分你後他前, 佢在前頭未算前, 兜左圈佢重遠"~~

      刪除
  5. 未夠6歲入讀官立小學,全靠人事關係,因年紀小原來考升級試係有分加,所以未試過留班,直到中學都很少被老師罵,但是成績在中間,自問不是讀書材料!

    回覆刪除
  6. 小弟資質愚鈍, 小學成績一直處於中下游, 至中學後期方逐漸開竅~~

    回覆刪除