總網頁瀏覽量

2021年3月26日 星期五

繾綣當年舊香江 2

 

最近經常看舊相, 逝去的光影喚起片片回憶, 這一路走來所發生的事情還記得多少, 又有多少被遺忘掉?  世事變, 人情冷暖點滴銘記在心頭。不變的唯有柔柔歲月所遺下的餘燼, 溫暖著逐漸冰冷的心坎.



六十年代銅鑼灣怡和街,香港大餐廳處即為今日嘅崇光百貨


五十年代的電車駛經西環海旁,晚霞滿天,極富詩意.  唔知點解每當我睇到西環海旁嘅舊相,腦海裏面都會響起一啲三四十年代嘅國語時代曲,好似三年,漁光曲,花好月圓等,可能童年時候行經海旁,都會聽到收音機播放呢啲歌吧


閣麟街.  閣麟街係我全家由澳門搬到香港嘅第一個落腳點,我仲記得嗰陣時候我哋住頭房,間樓係一間半木屋,半磚屋建築物,大風雨嘅時候木屋部份會搖幌,所以當年溫黛襲港,老爸要將我同細佬帶去舖頭暫避,以免全家一鑊熟


六十年代位於老虎岩(即今日嘅樂富)杏林街近聯合道嘅金國戲院,戲院廣告牌嘅兩套電影 “工廠玫瑰” 同埋“情至義盡” 都係喺1964年公映,無獨有偶兩套電影嘅男女主角都係吳君麗同埋胡楓


石硤尾巴域街總站,巴士站處已經係街市, 方便居民放工買餸


上環電車總站近急庇利街 轉角位處,電車後面係銀龍酒家, 我妹擺滿月酒都係喺銀龍,銀龍隔離舊樓地下有間士多所賣嘅自家製酸梅湯冠絕全港。銀龍酒家所在的金華座大厦呈半圓形,非常獨特, 其地下有間紅棉賣麵包舖,係當年附近白領嘅早餐首選


己拆卸近廿年的荃灣碼頭.  2000年因填海興建港鐵西鐵綫, 政府部門遷離,航線隨之而停辦。事實上荃灣碼頭往返中環統一碼頭的航線,因為西區海底隧道通車而開辦了過海隧道巴士930線,使來往荃灣區和港島區之間的車程大幅縮短,渡輪乘客量大減, 港九小輪遂於2000年年中決定停航。 現時的第4代碼頭在2003年啟用,在荃灣西站對出填海區,為荃灣最後一次填海工程完成後加建,惟只提供有限度往返馬灣珀麗灣渡輪服務


五十年代啲小販仲可以擔住竹籮隨街擺買賣.  相中女小販擺弄着一個很大的秤砣,看似是在秤粉葛.  呢種大秤我老竇都用過,佢係用嚟秤漁民交嚟漁欄嘅魚獲,當時一筐蝦閒閒地都4,50斤,只見他一手秤起筐蝦,另一隻手撥動砰砣去量重量,其臂力不不可謂不驚人


應該是80年代初皇后大道中東段起點,右邊是拱北行,左邊是正在拆卸,準備重建嘅匯豐銀行總行.  80年代中我喺中環返工,經常會上拱北行2樓嘅政府canteen食晏,當年佢哋好寬鬆,過咗中午一點之後會招待街外客,所供應嘅午餐性價比甚高,係好多中環白領嘅午餐熱點


應該係60年代嘅干諾道中,當時干諾道中對面海旁正進行大規模填海工程,遠處可以見到玉屋百貨嘅招牌,玉屋百貨係日資百貨公司,開設在上環國際大厦,但做不了多少久就結業了.  關於玉屋百貨,我最記得嘅係大廈頂樓設有模型跑車場,我每次經過中環都會情不自禁走上去睇人玩跑車,睇見其他小朋友控制啲模型跑車喺跑道上面風馳電掣,嗰種"恨到出汁" 嘅感覺我至今仍然記得好清楚


六十年代皇后大道中, 威靈頓街,  文咸東街和蘇杭街交滙處


六十年代彌敦道近油麻地處,可以見到好多老朋友,盤谷銀行,華人銀行, ABC餐廳,Sharp,仲有瓊天大酒樓,注意係真正嘅瓊天大酒樓,唔係canteen


從軒尼詩道往中環方向望去¸花牌處係頤園酒家.  右後方可看到鉅利醬園招牌,此店現已遷往堅拿道西繼續營業.  此圖可說是五十年代車展;左邊Vauxhall 右邊Hillman,中間Austin


六十年代的金鐘道(當年仍是皇后大道東) .  圖中紅蕃頭單層巴士俗稱水翼船,圖左美利樓由於要興建中銀大廈, 拆卸後遷往赤柱重建


六十年代雲咸街,相中巍峨聳立嘅Morning Post大廈已改建為南華大廈


六十年代樓梯街和荷李活道交界處,汽車左邊即為文武廟, 電影蘇絲黃的世界亦曾在此處取景


位於灣仔軒尼詩道(左)與駱克道(右)間的史釗域道.  我好鍾意牆上嗰啲廣告字體,端莊秀麗,又有一種好街坊嘅感覺.  不過用紅色喺牆上寫廣告標語又真係比較少見


七十年代中環海濱長廊,可一直通到當時嘅舊中環郵政總局,係拍拖嘅勝地, 不瞞你說小弟都喺呢度留低唔少腳毛


五十年代一間位於莊士敦道嘅士多,相中最搶眼處係士多頂處有個「維他奶 - 每枝二毛」嘅霓虹燈廣告,售價竟然以霓虹燈展出,平添一份天長地久嘅承諾


應該係60年代嘅莊士敦道,可見到雙喜大茶樓,對面係修頓球場,前面嘅大公報報社喺 80年代搬咗去軒尼詩道


灣仔石水渠街, 又見到維他奶廣告,足見當年維他奶嘅盛行程度.  我唔知你有乜感覺,但係我就睇到一幅好地道,溫心暖胃嘅街坊百相圖


榕樹頭棋檔,側聞檔主所擺得出嚟嘅,都係經過千錘百煉,百轉千回嘅殘局,不論你先行或者後手,最多都只能同檔主打和,冇可能贏佢,我就曾經喺普慶戲院門口嘅殘局檔奉獻咗唔少銀両


戲院預售票窗口,特等超等都係五個大洋,估計應該係七十年代



2021年3月5日 星期五

粵語片特派員


 上世紀五,六十年代,是香港粵語片最蓬勃最輝煌的年代 (八十年代另一個粵語片盛世,我們稱之為港產片).  粗略估計,在這二十多年中,一共出品了不下三, 四千部電影,隨着潮流的推動,以及因應觀眾口味的變化,當年粵語片的品種亦甚為繁多,有倫理片,劇情片,寫實片,武俠片,喜劇,粵曲片,時裝愛情片,時裝打鬥片等等多不勝數,在此段時間內,主角們當然甚為搶手,何非凡,新馬仔,任劍輝等一線主角閑閑地都十套八套電影戲同時開拍,由於電影需求量大,配角們也忙得不可開交,那時候有一個比較有趣的現象,那便是個別配角因為演某個角色太入型入格,故此製片和導演們只要有相同的角色,便會邀請同一位演員演出該角色,久而久之,很多綠葉們便被定了型,以致他們一出場,觀眾便心中有數,他們在電影裏面的角色那管是叫做張三李四,其實其所扮演的角色都是一樣。現在看起來當然有些千篇一律,但正因如此,這些配角在我們這些粵語片迷心內塑做了一些很獨特的形象,由於他們扮演這些角色太入型入格,久而久之便在腦海裏面產生一種獨特的化學元素,感覺他們有點像自己的家人,前輩,或者朋友,每次看到他們出場,都有一股濃濃的暖意從心中慢慢滲透出來,這便是粵語片的魅力。以下是部份粵語片前輩最拿手演出的角色,我不憚拋磚引玉,煩請各位資深粵語片迷為我補充拾遺. 



(1)蠶蟲師爺:周吉


周吉的師爺扮相 1


周吉的師爺扮相 2


(2)探長:李鵬飛、司馬華龍, 駱恭


李鵬飛


司馬華龍


駱恭


(3)窮到燶,無錢交租租客:鄧寄塵,俞明,檸檬, 劉桂康, 西瓜刨


鄧寄塵


俞明


檸檬


劉桂康


西瓜刨


(4)惡死包租婆:陶三姑,陳立品


陶三姑


陳立品


(5)縮骨兼鹹濕包租公: 高魯泉,  其金句是; "你班依撈七,聽日再唔交租,我烹晒你地走"


高魯泉


(6 ) 奸妃:李香琴.  琴姐嗲聲嗲氣的拉住皇帝的衣袖說道 ; "主上,我唔制呀,你睇正宮娘娘咁蝦我法,你要同我作主" , 直讓人看得咬牙切齒


李香琴


(7)昏君: 張醒非


張醒非


(8 ) 奸國舅: 陳錦棠


陳錦棠


(9 )  反串安人: 半日安,半日安可說是粵劇界的瑰寶,他經常飾演諧角在主角身邊插科打諢(如夜光杯裏面的七成),引人發噱,但他有還一手絕活,便是反串飾演安人(即老婦人,我以前經常有個疑問,粵劇界裏面有眾多老旦,為什麼偏偏要找半日安來反串做安人,後來看過他幾次演出之後,不得不佩服導演們的眼光).  他演的安人毫無違和感,無論聲線,做手都恰到好處,你根本無法分辨出他是男是女,做功眼隨手走,扮相更是毫無破綻,堪稱一絕 


半日安


(10 ) 奸大伯: 劉克宣


劉克宣



(11 ) 忠臣: 靚次伯.  四叔眼神凌厲,工架十足,在粵劇片往往做忠肝義膽的忠臣,很有說服力,另外他扮演的包公,斷審奇案,也讓人覺得大快人心


靚次伯


(12 )  奸/貪心大嫂:鳳凰女.  鳳凰女後期因 "鳳閣恩仇未了情" 一炮而紅,成為正印花旦,便擺脫了做二幫時經常做貪心大嫂的角色


鳳凰女


(13 ) 慈母:黎雯, 此外黎雯也經常飾演奶媽


黎雯


(14 ) 善良包租婆:李月清.  李月清在電影中多數扮演善良的 “隔離鄰舍”,即便 “貴” 為包租婆,都是一臉慈祥,故此縱然窮租客如謝賢,周聰等欠租,她都是和顏悅色的,甚至讓他們 “黐飲黐食”, 與陶三姑凶神惡煞地追人交租的惡形惡相著實有天淵之別. 善良包租公:湯劍庭


李月清


湯劍庭



(15 ) 忠僕,花王, 管家:檸檬,楊業宏


檸檬


楊業宏


(16 )  飛仔:麥基, 丁羽, 飛女:李香琴



麥基


丁羽


李香琴


(17 ) 貴利王: 馮敬文


馮敬文



(18 ) 黑社會大佬: 金雷, 手下: 香海, 萬靈, 林郁, 黎明, 袁立祥


金雷


香海


萬靈


林郁


黎明


袁立祥



(19 ) 嚇人大隻佬: 楊斯,蕭錦


楊斯


蕭錦


(20 ) 有錢佬(通常是為富不仁): 李鵬飛,駱恭, 李亨


李亨


(21 ) 發花癲少女: 譚倩,梅蘭


譚倩


梅蘭


(22 ) 店小二: 西瓜刨


西瓜刨


(23 ) 貧困慈父: 黃楚山,  貧困慈母: 黃曼梨,黃曼梨做惡家姑固然入型入格,但她在很多倫理片裏面都會飾演貧困慈祥的母親,譬如在危樓春曉裏面便飾演黃楚山老婆,李小龍母親,她在貧困交迫之下茫然無助的表情,著實入木三分


黃楚山


黃曼梨 


(24)女傭: 許瑩英, 尤芷韻


許瑩英


尤芷韻


(25) 風騷壞女人: 秦小梨 (50年代),余美華, 孟莉(60年代)



秦小梨


余美華


孟莉


(26)壞男人:時裝姜中平,古裝蕭仲坤



姜中平


蕭仲坤


(27) 老太爺: 盧敦,林坤山



林坤山


(28 ) 惡家姑:黃曼梨


黃曼梨


(29 ) 打手: 唐佳,劉家良.  當年兩位名武術指導在粵語片裏面多飾演「行行企企,行就行先,死就死先」的打手角色,你通常會在很多時裝或者古裝武俠片裏面發現到兩位的身影



唐佳,劉家良



(30 ) 餐廳侍應:  高超, 周鑾.  粵語時裝片裏面,男女要行落一條圓拱形的樓梯才可坐下,然後由高超, 周鑾所飾演的餐廳侍應, 禮貌周周的遞上餐牌,男主角通常會要杯咖啡,女主角則來杯橙汁. 


高超


周鑾 



(31) 會計:黃侃.  黃侃外型斯文老實,戴副黑框眼鏡,最適合做會計或者主角同事的角色


黃侃


(32 ) 探長助手:朱由高.  時裝偵探片片尾,探長將壞人一網打盡,通常都會大喝一聲:  "將呢班人帶晒返去", 那站在探長旁邊,飾演助手的朱由高便會應聲地再說一遍,之後電影便隨即結束


朱由高


(33 ) 嗌交八婆: 大聲婆


大聲婆



(34 ) 粵劇片家丁: 朱少坡


朱少坡


(35 ) 粵劇片男主角朋友: 蘇少棠


蘇少棠


(36 ) 粵劇片員外:少新權


少新權外造型


少新權


(37 ) 粵劇片富家小姐: 金影憐, 英麗梨. 英麗梨最為人記得的角色,便是在紫釵記裏面所扮演的盧太尉女兒盧小姐



金影憐


英麗梨


(38 ) 古裝武俠片主角師傅: 楊業宏, 張生


張生


(39 ) 惡死經理, 老千: 林甦,  林魯岳.  林魯岳飾演老千, 我記憶最深的是他和新馬仔合演的一部喜劇 (電影的戲名我已忘佚),林魯岳邀請新馬仔吃飯, 兩人在餐廳大吃大喝後,林魯岳告訴新馬仔說: "我的名字叫候素,現在我有事先走,但會先埋單,待會你見到我和夥計打招呼時大叫我的名字,表示你認識我便可以了"。説畢便起身離開,新馬仔依言在座位裏大叫候素,林魯岳便對夥計說:"你都聽到我的朋友叫候數,待會他找數便可以了"。結果當然是新馬仔起身離開的時候被夥計要求埋單,惹來一身蟻. 



林甦


林魯岳


(40 ) 傍友: 鄭君綿 (60年代), 馮應湘,周志誠(50年代)


鄭君綿 


馮應湘


周志誠


(41 ) 粵劇片侍婢: 任冰兒.  細女姐兩三年前,以80多歲的高齡仍然踏枱板,為梅雪詩跨刀,其敬業樂業的精神,著實讓人甚為欽佩. 



任冰兒 


(42 ) 時裝片男主角同事: 香海,黎明,何壁堅


何壁堅


(43 ) 醫生: 張志蓀, 何壁堅. 兩位演員的外型也是斯斯文文,說話比較陰聲細氣,頗有專業人士的造型,所以很多時候在電影裏面都飾演律師,或者醫生,可惜他這個醫生的角色一般都是報憂不報喜,向主角宣佈壞消息,要主角籌措一大筆醫藥費,讓人心情沉重


張志蓀


(44 ) 喃嘸佬 : 高魯泉



高魯泉