燈火通明嘅英京酒家酒家同埋東方戲院，真係好夢幻嘅感覺。英京酒家曾經係一家非常著名嘅酒家，皇夫60年代訪港曾經喺度嘆過茶，而英京酒家亦都係第一聘用女招待嘅酒家，聽啲叔父講，當年上英京飲茶，女侍應會先遞上一塊熱毛巾比你抹面，貼心如此，點到你唔服 1
燈火通明嘅英京酒家酒家同埋東方戲院，真係好夢幻嘅感覺。英京酒家曾經係一家非常著名嘅酒家，皇夫60年代訪港曾經喺度嘆過茶，而英京酒家亦都係第一聘用女招待嘅酒家，聽啲叔父講，當年上英京飲茶，女侍應會先遞上一塊熱毛巾比你抹面，貼心如此，點到你唔服 2
家姐揹著小弟弟，踩著三輪車載着另一個弟弟在七層徙置區嘅空地轉，絕對是很美好的童年回憶。講起三輪車，我記得小學二三年班嘅時候，老爸不知從哪裏拿了架三輪車回家，讓我們幾兄弟興奮不已。問題是，那時候我們只是在老爸的蝦欄寫字樓租住個板間房，不能隨意走動，要等星期六，日所有人下班後，才可以把單車推出去大廳玩，但儘管如此，這已經是我童年最歡樂的回憶之一
估計係六十年代兵頭花園嘅噴水池，當年香港冇乜主題公園，星期日放假帶啲細路仔去兵頭花園玩，都係一個好熱門嘅放假節目，我記得當年有好多影相佬喺附近兜生意，同一家大小合照，即場沖張相出嚟俾你，相信唔少家庭嘅相簿裏面都有喺兵頭花園影嘅舊照
五十年代皇后大道中，威靈頓街和文咸東街交界處，正中是出名的半邊樓，街頭盡是人力車，手推車，儼然是當年民生的寫照
六十年代初嘅中環德己笠街，當時左邊嘅娛樂戲院剛被拆卸重建，另一邊係興瑋大廈，再往上望去係有排都仲未發展成為酒吧街嘅蘭桂坊
五十年代荷李活道已婚警察宿舍向東望，石牆上一格格的商品名稱，是當年非常流行的廣告手法，我真的很喜歡這種古樸純質嘅街道風情
兩位濶太喺淺水灣酒店露台咖啡前面嘅草地嘆下午茶，絕對係人上人嘅休閒生活. 此情此景，不期然讓我諗起沉香屑第一爐香嘅薇龍，同埋傾城之戀裏面嘅范柳原和白流蘇
五十年代從西邊街和干諾道西交界處往上望向皇后大道西，右邊是七號差館，而香港僅存的蒸籠公司德昌森記則位於左邊的舊樓叢中（拍此照片應仍未搬至此處）
車仔刨冰檔，簡直是夢幻的童年記憶。我記得以前西營盤近水街處有個刨冰佬，推車賣菠蘿冰，雜果冰，紅豆冰，和涼粉。你告訴刨冰佬要什麼冰後，他會先把所有材料放進高身杯，再在從身邊那個放在面盆上的雪塊刨下冰花然後放到杯裏面去，接過來大口喝下去，那種泌心涼的感覺我到現在還記得很清楚。當然那個時候大人會告誡說，那些刨冰很污糟，但小孩子嘛，大菌食細菌，細菌當補品，一點也不怕，一幌眼那竟是四十年前的事了
六十年代由皇后大道中和租庇利街交界處向西望，右邊可以見到陳春蘭茶嘅招牌，後些少應該係余仁生，左邊九龍醬園處便是嘉咸街口，再前些少可以見到仲未搬上威靈頓街嘅蓮香茶樓
電車緩緩駛過還沒有填海的西環海旁，如夢似幻嘅景象, 永遠是我童年最美好的記憶
一間名為光興嘅代理梅花嘜手錶嘅錶行，唔知點解佢嘅招牌用呢個鏢字，唔係正統嘅錶字。各位仲記唔記得梅花嘜錶嘅廣告？梅花嘜錶， 梅係梅花個梅，花係梅花個花，咁阿媽係女人嘅廣告口號，虧佢諗得出
五十年代一家人喺街邊坐埋食飯，兩碟餸一家六口食得津津有味，一副樂也融融嘅場面，所以話，當年嘅香港係窮，但係香港人窮得快樂
氣派堂皇嘅舊喇沙校園, 儼然成尊古堡. 1917年，港島聖若瑟書院神父在漆咸道成立分校，學位很快便供不應求，有見及此, 艾瑪撒隆修士遂於界限街購地建校，以12萬港元投得10英畝土地。1932年1月喇沙書院正式成立，至1939年，學生人數已高達1,060人。二戰期間校舍曾被日軍徵用為監獄、醫院。1956年喇沙取回校舍，並在翌年開設喇沙小學。1978年校方計劃重建，為了籌集資金，遂忍痛將部分土地售予長江實業，並建成碧華花園
七十年代嘅山頂的peak tower，當時嘅人叫佢做老襯亭，其實真正嘅老襯亭係另有其亭，真正嘅老襯亭係山頂嘅另外一邊，係一個供遊客俯瞰中環嘅瞭望處。我對呢個年代嘅Peak tower好有感情，中五周圍搵地方溫書準備會考，有人話山頂的Peak Tower 風涼水冷，係溫書嘅勝地，所以偶然都會帶齊notes，去Peak tower嘅Cafe飲一邊飲咖啡一邊溫書，但其實咁此情此景，點可能集中精神溫書，到最後都係同幾個同學吹水打鬧，然後各自打道回府
舊中環郵政總局，我夠膽話，舊中環郵政總局可以話係香港最宏偉同埋巍峨嘅建築物，拆咗呢幢建築物可以話係絕對暴殄天物
大約四十年代由弼街望向洗衣街，右邊是一間名為熾昌士多的商店，奇怪士多兼營冰室，不知道他們如何經營？是否以茶檔方式待客？
哈哈，你有你飛髮，我有我埋首睇公仔書。當年去飛髪，有公仔書睇，有椰子糖食，其實都算係一個幾好嘅假日節目
六十年旺角段嘅彌敦道，右邊嘅旺角廣場已經改建為創興廣場，前些少嘅玉鳯時裝公司，係第一代玉女明星林鳯所創立嘅品牌，左邊可以見到中國國貨公司，前些少係ABC餐廳，中文有個好特別嘅名字，叫愛皮西餐廳
七十年代初，天星小輪渡海費係每位2毫半子，那時候還沒有八達通，支付過海費還是人手收費同埋找續。這張照片肯定攝於1967年後，當年因為天星小輪加價斗零，導致九龍暴動，甚至引起死傷， 而1966年暴動亦成為六七年大暴動嘅導火線
余生晚也，可否介紹半邊樓的故事
回覆刪除
回覆刪除其實所謂半邊樓，只係坊間嘅俗稱，意思係幢樓因為地理原因嘅緣故（通常係位處於兩條街嘅交界處嘅尖角位），地盤會比正常嘅狹窄同埋尖長，所以起出嚟嘅樓嘅形狀會受到好大嘅局限，一般會比普通嘅樓窄好多，睇落去就好似一幢正常嘅樓俾人削去一半嘅有趣外型。除咗呢間之外，威靈頓街同埋皇后大道中交界處，以及灣仔道同軒尼詩道交界處度，都有半邊樓嘅存在~~
講起威靈頓街皇后大道中交界，在那個尖角位仲保留著三棟唐樓，在鬧市中格外顯眼。
刪除係呀，但係冇辦法，地盤嘅面積同埋形狀所限，起出嚟嘅樓就係咁奇形怪狀。我記得十幾年前，呢幢樓嘅2樓係間西餐廳，我上過去食過幾次飯，入邊嘅佈置亦都因為幢樓嘅面積所限，變得好奇怪~~
刪除西環兄，
回覆刪除---女侍應會先遞上一塊熱毛巾比你抹面，貼心如此，點到你唔服---
個時酒樓服務當客係客，家下當客係水流柴或水魚。
---對徙置區有著不可磨滅嘅緬懷同埋依戀---
雖然對當時嘅設備(特別係廁所同浴室)毫無留戀，但無可否認最不捨係鄰舍關係，因打開門口出入就會互相接觸，互相啟動，現在你隔離個家姓甚名誰做乜階都無有得知，搬出搬入鎖門閉戶毫無關心。
---兵頭花園---
我鍾意呢個名，動乜鬼植乜鬼公園唉！佢＊味。
---石牆上一格格的商品名稱，---
何濟公，保濟丸，濟眾水，肥仔水...名牌產品。
---電車緩緩駛過還沒有填海的西環海旁---
'80年代中後期仍有類似情景，'90年代開始封哂個龍位，香港無運行。
---梅係梅花個梅，花係梅花個花，咁阿媽係女人嘅廣告口號，虧佢諗得出---
雖然得啖笑，不過廣告算成功，幾十年後你我仲記得。
---五十年代一家人喺街邊坐埋食飯，---
家陣一家人大中細三代能係"屋企內"同枱食飯簡直係夢想。
---氣派堂皇嘅舊喇沙校園, 儼然成尊古堡.---
有幸細個當小童軍時，一次陸運會借(or)租用佢哋運動場舉行，休息時得以遊逛其中小撮校舍建築，個種深幽廣闊、寧靜巍峨、磚牆豎立型態，(估計同英倫古老學舍有幾分相似，兄台曾負笈彼邦，應明我感受)，數十年後記憶猶深，途中誤闖類似一地庫之際，遇一神父指示出路，當時此神父並無怪責我等幾個無知小孩。後來喇沙書院要出賣校舍園地，我雖非其學生，亦永無資格成為其學生，總覺得有點侮辱失望。
---peak tower---
係咪叫爐峰塔呢？老襯亭係一個中式亭台瞭望亭。
---舊中環郵政總局，我夠膽話，舊中環郵政總局可以話係香港最宏偉同埋巍峨嘅建築物，拆咗呢幢建築物可以話係絕對暴殄天物---
我直情咀咒港府到依家，環球大廈係個毒瘤，無咁大個頭點食呢個位嘅氣場。
---左邊可以見到中'國'國貨公司，前些少係ABC餐廳，中文有個好特別嘅名字，叫愛皮西餐廳---
圖中巴士應該向南即尖沙嘴方嚮走，間大陸公司實挺係中'僑' instead of中國，原址就係現今信和中心前身嘅唐樓地舖，後來('67)暴動後好一段日子才搬去山東街自置數層物業總店，可惜總店同油麻地彌敦道窩打老道口分店都係1996年結束營業，因啲第二第三代代唔願守業也。
ABC餐廳係彌敦道旺角道口都有一間，呢間我記得好似做工後有幫趁過，但信和呢間就應該無啦，因大廈重建時怕且我仲好細個。
---照片嘅背景係凱悅酒店，現在已拆卸並改建為iSquare---
凱悅酒店好似去過佢哋大堂Cafe一兩次咁上下，冇記錯嘅話撞過Ah Lam同威利。反而尖東凱悅去得多啲，因有好幾年聖誕節前夕party去佢哋有live band嘅disco/lounge/coffee shop渡過.
去得較多些少係海運大廈連接既香港酒店六樓池邊吧/coffe shop。
天星小輪服務好過油麻地小輪好多，人手收錢後好多時會有印籍usher指示乘客去左定右方向候船。
多謝賈真兄嘅回應，某方面詮釋左亦都豐富左我嘅解說，唯一我想補充嘅係， Peak Tower嘅正式名稱當然係凌霄閣，但係唔知點解當時嘅人都叫佢做老襯亭，雖然大家都知道老襯亭係喺山頂嘅另外一邊，但可能啲人淨係聽過個名，好少行過去，習非勝是，將一落纜車見到嘅建築物叫做老襯亭就算~~
刪除馮展萍先生嘅離世，我都係啱啱喺網上得知，雖然好愕然，但係亦都唔能夠算太驚奇，因為都畢竟係八十幾九十歲嘅老人家。賈真兄講得啱，一位喺播音界如此享負盛名嘅老前輩，死後喺傳媒中竟然無聲無息，商台固然難辭其咎，即使係香港電台，佢哋應該有非常豐富嘅資料庫，冇理由唔表態或者做個特輯。講返商台就更加抵打pat pat，馮展萍雖然已退休多年，但畢竟曾經係商台嘅大哥大，或者曰而家後輩對馮展萍先生冇乜認識，但馮嘅眾多徒弟仍在，譬如18樓C座嘅金剛，朱雪梅等都曾受教於他，搵佢哋出嚟做個特輯一啲都唔難，呢啲我諗就係今日社會風氣所致，對昔日嘅前輩亳無尊敬之心，或者某方面來講根本唔重視歷史，對傳統嘅尊師重道拋諸腦後，可能剩返嘅，就係我哋呢一輩嘅人對馮展萍先生嘅認知同埋懷念。話說回頭，其實我對馮展萍先生認識唔深，若問我對播音對各天王們嘅聲音印象，我反而好記得李我，鍾偉明，鄧寄塵，林彬甚至胡章釗，反而對馮展萍先生把聲頗為陌生，呢兩日喺YouTube搵返一啲佢嘅錄音，發覺佢把聲比上述諸位更貼近日常生活，某方面來講更街坊，佢嘅發音高低音固然非常清朗，但卻不失隔離屋阿叔嘅親切咁，比起鍾偉明，胡章釗嘅聲音，可能佢哋講故比較多，總有一種隔陔感，馮展萍就親切得多了。一句題外話， 70年代中期我曾經喺商台兼職過一段短時間，同馮展萍公子馮偉棠有過一些交集和互動，馮偉棠比我嘅感覺係好親切近人，把聲比乃父稍為低沉，但亦都不失為一把靚聲，話時話，都好耐冇聽過馮偉棠嘅消息，唔知係咪已經移左民？
刪除英京酒樓，很多回憶。7O年代後期時常去，記憶中沒有熱毛巾招呼：( 但它的腸粉很出名，三元一碟，剩白腸粉同價，蝦腸是用淡水蝦，好味。已過身的父親6O年代做設計傢具，他說當年英女皇到英京時坐的椅是他設計的，現在當然死無對證了：))
回覆刪除
回覆刪除哈哈，多謝老兄提供嘅花邊歷史，當年英女王訪港都算係盛事，小弟學校都好似特登放假一日，俾我哋去趁下熱鬧。英京酒家我只係幫襯過兩三次，當時酒家已經踏入倒數階段，招呼同食品都係水準之下，但我依稀記得裝潢甚有氣派，裝修雖然有啲破舊，但比多男得男等舊式茶樓仍勝一籌，所謂爛船有三根釘也~~
提起「梅係梅花個梅，花係梅花個花」，因梅花嘜錶是電台報時的贊助商，每次報時都賣這廣告，怎能沒有印象？
回覆刪除