舊物牽情 3

同場加映，剛在 Viu TV看了Grease (油脂），說來也真奇怪，這是我第一次看完整套Grease，以往曾經有幾次機會，但都是只看頭沒看尾，或者只看中間一段，這次是真真正正的坐定定把整套戲電影看完。坦白說電影的水準不算高，只是一齣很Easy Going 的青春校園片， 但，與別不同的是電影是由 Olivia Newton John 和 John Trovolta主演，兩人當年正值最爘爛的青春期，女的嬌俏甜美，歌聲動聽，男的俊俏，舞技超羣，兩個人的組合，所産生的發化學作用，彷彿將整套電影添上斑爛的色彩.  記得 Olivia Newton John在一次訪問中談及Grease，打趣的說，"Imagine that I have to dance with John Travolta (因為他是舞王),  and imagine that I have to sing with John Travolta(因為他雞仔聲)" , 短短兩句話已經將電影的特點表露無遺。不論電影的質素如何，Grease絕對是70年代末/80年代初一個很重要的印記，也許電影製作人無意拍攝一套經典的歌舞片，但因緣際遇下，Grease成了那個年代年輕人的一個共同回溯，我相信很多當年熱戀中的男女都曾拍拖看過這套電影，姑勿論他們日後能否終成眷屬，相信散場那一刻，他們心中都滿載著濃濃的情意。至於我自己，Grease之所以給我如此深的印象，全因為當年在英國，兩首電影主題曲 "Summer Loving" 和 "You are the one that I want" 長年累月的佔據著英國流行榜榜首，而由於Top of the Pops (一個播放流行音樂的電視節目)規定,結尾都要播榜首歌曲的MV，所以有兩至三個月，每星期的Top of the Pops都是洗腦般的播放 "Summer Loving" 和 "You are the one that I want" ，久而久之，這兩首從電影節錄下來的MV深深的印入我的腦際，也成了我一段不可磨滅的回憶.  還好，Olivia Newton John 和 John Trovolta的顔值很高，歌曲也百聽不厭，這個回憶也算是美好的.

兩個唔同年代嘅蓮香樓紙袋，右邊嗰個當然舊好多，係蓮香樓仲喺威靈頓街街口時代嘅紙袋，只要睇袋口所印嘅電話號碼係六個字，便知道呢個紙袋少說都有40年嘅歷史.  近月來去蓮香飲茶，發覺蓮香所派發嘅紙袋都唔印酒樓名，光溜溜的紙皮袋一個，感覺有啲突兀

兩張1991年由澳門返香港嘅水翼船船飛，注意係水翼船，唔係TurboJet，水翼船應該係90年代中退役，當年一張船飛都係$85 ，唔算好貴

圖為一張1995年由澳門返香港嘅飛翼船飛，當年英文叫做Turbo Cat，仲未有叫做Turbo Jet，當年票價為$142 ，今時今日大概都係$200樓下，相對之下呢程船飛都算貴

幾張深圳火車站嘅站台票，所謂站台票，就係容許你買咗票之後可以入閘送或者接乘客，當時火車站管理冇今日咁嚴格，可以容許非乘客入閘送或者接客，今時今當然已經取消咗呢個制度。站台票一律$1.5 ，印刷其實都幾精美

幾張70年代版嘅台灣鈔票

一張1993年由市區去羅湖嘅單程火車票，售價為$27 ，今日票價大約$50 左右，廿年間票價僅漲升一倍而已， 加幅算是克制

一張估計是60年代中巴嘅巴士車飛，當時應該有分段收費，車票內有啲車站我真係木宰羊，譬如蟠龍道，太古東閘等，真係唔知係乜地方

兩張山頂纜車嘅車飛，1996年收費$14 ，1998年則收費$18 ，不過呢個版本嘅車飛甚為簡陋，只係簡簡單單一張薄紙條，毫無設計可言，似乎與山頂纜車作為遊客主要觀光點有啲不相符

兩張90年代嘅北京巴士車飛，全程劃一收費一元

四張北京機場嘅機場稅收據。90年代至千禧年以前，旅客搭飛機要另外買機場稅（官方名稱係機場管理建設費）。問題係旅客要去到機場先至知道要另外交機場稅，好多旅客其時手頭上已無足夠人民幣，以至先要撲去兌換店兌換人民幣，然後再撲去售賣機場稅窗口買機場稅。擾民之餘，又造成怨聲載道，最後北京機場管局從善如流，將機場稅納入機票，皆大歡喜

早期惠康超市嘅膠袋，係我老媽子嘅珍藏

華昌超市 ？真係完全冇印象

兩個非常舊嘅紙手抽袋，左邊係中國國貨公司，右邊係一間名為二合嘅蠔油蝦醬舖頭，二合蠔油蝦醬位於皇后大道西316號，重點係電話號碼竟然只得五個字，相信呢個紙手抽袋起碼係50年代甚至更早嘅歷史文物

合勝隆蠔油莊嘅紙手抽袋。合勝隆位於西環吉席街同埋北街交界處，有個好醒目嘅招牌，曾經係吉席街嘅地標。我有個小學同學係合勝隆太子爺，所以我曾經入過合勝隆玩過幾次，依稀記得合勝隆大部份生產過程仍然係用人手操作，所以感覺好親切。合勝隆好似去到80年代仍然屹立在原地，直至90年代才結業搬離西環

圖為1993年香港/廣州直通鐵路通車，九廣鐵路發行紀念車票嘅兩款套票

四張印有恒生銀行廣告嘅地鐵票套。為什麼會有地鐵票套？原來80年代以前，八達通還未流行，一般人乘坐地鐵都是用單程票或者定額儲值票（ 如$50， $100等）.  為了保護地鐵票嘅磁性，地鐵公司會喺入閘口處免費派發這些地鐵票套予乘客使用.  90年代伊始，八達通逐漸流行，越來越少人買單程車票，地鐵公司遂停止印制和派發這些地鐵票套

另外四張地鐵票套

四張1979年版嘅外匯券。70年代末中國剛開始搞改革開放，並系統性歡迎港澳人士以及外國人到國內旅行，但那時候外匯管制非常嚴格，外國人兌換人民幣十分困難，加上黑市兌換人民幣甚為猖獗, 故此中國政府推出外匯券，以中國國內官價兌換人民幣面值嘅外匯券，供外賓使用.   這種特殊發行嘅人民幣被稱為外匯券，當時在國內非常受歡迎，除了一般友誼商店，酒店外，服務外賓嘅人員譬如司機，以致高級餐廳，酒樓都非常歡迎外匯券.  我記得有段時間去深圳以和廣州等地旅遊或者公幹，很多地方甚至聲明不收人民幣，只接受外匯券付帳。這種畸形現象至90年代前後才逐漸消失

三張（快報，信報，明報）回歸日出版嘅報紙.  我記得當時有謠傳，話97年7月1號嘅報紙因為有收藏價值，所以會非常搶手.  我一般冇咁早起身， 但我老爸因為工作同生活習慣，每日最遲清晨五點便會起床，所以請他當日同我去報攤掃晒所有嘅報紙，此所以我儲有差不多當日所有出版嘅日報

三張（東方，新報，成報）回歸日出版嘅報紙

一本1990年出版創刊號壹週刊

兩本1984年出版嘅香港電視

兩本1984年出版嘅香港電視

舊物牽情 2

一句題外話，今晚剛在ViuTV看了顏聯武主持的譚炳文特輯，舊歡如夢。節目邀請了眾多譚炳文的舊朋友和同行，如李隆基，丁羽等上節目暢談了他們對譚炳文的回憶和印象，甚至越洋訪問了杜平和李司祺等歡樂今宵舊同事，內容雖了無新意，惟卻滿載著對逝者的緬懷和思念; 但看著看著，我卻有一種很不是味兒的感覺，這類型的節目，不應該是無線做的嗎？譚炳文服務了無線凡四十年之久，且剛在離世幾個月才和無線續了約，說好說歹都仍是無線的員工.  撇開這個不談，譚炳文由替無線配音（早期最深印象的當然是合家歡中的標叔叔），以致歡樂今宵，以致拍電視劇，他大半生都和無線結下非常緊密的關係，何解無線至今，除了在東張西望做了個簡簡單單幾分鐘的報道外，至今仍毫無表示, 表現得如此冷漠？我記得以前無線凡有老臣子逝去，都會搞個特備節目，找一些新請好友故知上節目詳談已故藝員的生平，並安排播映一些他生前的節目片段，倘若該位藝人曾主演過一些粵語長片，更會特地安排在深宵播映幾齣他/她有份演出的粵語長片，以向他/她致意，惟譚炳文離世，無線卻不聞不問，感覺真有些讓人寒心。側聞無線早陣子不和幾位老藝人如朱維德等續約，我明白無線是商業機構，凡事都會先從商業利益考慮，這個當然是無可厚非，但以一家如此歷史悠久的廣播機構來說，事情應該可以做得比較圓滑細緻，和更有人情。以前無線經常標榜自已是一家以香港為家，富人情味的廣播機構，每逢大時大節，如台慶，如香港小姐選美，不管節目製作質素如何，都濃濃的滲着地道文化和人情味，現在一個服務了幾十年老臣子逝去後，連一個紀念特輯也付之闕如，我真的有些無語.    此外，配音界這兩個星期頻傳噩耗，除譚炳文，消息傳來，為忍者小靈精，龍珠中孫悟空配音的配音員周婉侶亦在加拿大逝世，忽然想起， 七十年代紅遍配音界的兩位前輩，盧國雄和謝月美可安好，近況如何，網友有知道者可否告知？ 

呢張係叫做宣誓紙，相信好多人都未見過，甚至未聽過。因為我係喺澳門出世，冇香港出世紙，嚟到香港之後，要由老竇去當時嘅入境處宣誓，證明我係佢嘅仔，之後先至可以攞到香港身分證

八達書院嘅小學畢業證書

兩個位於西環卑路乍街嘅影相舖底片袋，兩間當中我幫襯豪光比較多，相信係因為近屋企嘅緣故.  當年差不多每年都要喺開學前去影學生相，一來學校要學生交相做學生證或者其他用途，二來申請政府文件/證件亦要學生相。影完相之後影相舖當然會將底片連相片交還顧客，圖下銀禧攝影院嘅底片袋應該係裝單人學生相，而圖上嘅底片袋嘅豪光攝影公司，裝嘅應該係自己攞菲林去曬相所冲出嘅底片

呢兩張明星貼紙，係我90年代去長洲玩嘅時候，係啲舊式士多嗰度買嘅，當時我已經覺得係懷舊物品，而家更加係舊上加舊

千禧年前後，我有一段時間要經常去北京出差，每次出差時間都超逾一個星期，週末沒什麼事做，便喜歡周圍逛。那時候北京的經濟仍未像今天般發達，市面尚算樸素，我喜歡包架的士，除了在市內溜澾外，也會出城往有特色的遊覽區溜灠，故此足跡所及，除了熱門的名勝古蹟如故宮, 天壇外，也會遍及郊外的旅遊點如懷柔, 十渡等.  其時國人郊游概念仍未十分普遍 ，故此即便是週末，此等名勝古蹟遊人仍不會太多，不會讓人有壓迫感.  我甚至可以在遊玩之後，回程中找個簡陋嘅餐廳吃個真正嘅道地農家菜，避過回城高峰期，才施施然打道回下榻酒店，今天若是要如此操作，相信非土豪不行了。圖為圓明園入場券，當時收費$10 ，着實十分超值，但是問題是現在從北京市中心往圓明園，坐車閑閑哋都要一個半鐘頭，若遇上塞車，來回起碼要三，四個鐘頭以上；所以也不是這般容易話去便去的

三張不同年代嘅故宮入場券，由$5至$20不等 ， $5入場一張故宮入場券，真不知人間何世。當年遊覽故宮，不需搞什麼實名制網上訂票，基本上可以抵達故宮後隨買票隨入，當然週末人流比較多，但整體上仍不算太擠擁.  近年在電視上看到每逢假日，故宮入場處萬人攢動嘅場面，真有點觸目驚心嘅感覺

幾張北京各類型博物館嘅入場券，票價由$3到$10 ，足見當年物價之廉宜，今日我估計起碼應該係要升三至五倍。另外可以看到，當年入場券嘅設計比較簡陋，簡簡單單薄薄一張紙，和今日制作得異常精美嘅入場券相比，真不可同日而語

幾張陶然亭入場券，票價亦是$2至$3不等.  陶然亭位於北京近郊，雖然建築和景觀無甚可觀，但因為曾有不少文人雅士，近代聞人在此留下足跡，加上離市中心不遠，是個消閑的好去處

幾張萬里長城嘅入場券，慕田峪還可以，八達嶺離北京市中心實在太遠，以今日北京塞車程度來說，去八達長城可能需要在當地附近找地方留宿，一天來回估計是不行的了。講起萬里長城，我記得當年經常帶外國人去參觀遊覽（我當時的工作包括接待外國投資者，外國人到北京，第一個想法當然是登上長城，做下好漢, 故此我去長城的次數不下十數次）.  記得有次在隆冬之際，和幾個來自北歐的投資者上長城，雖然我已經將所有保暖的衣服都穿上身，但仍難扺檔從塞外吹來凜列的北風，幾名北歐客一到長城，便興奮得直往長城高處跑，可憐我只能躲在城牆腳下面發抖，苦巴巴的等他們兩個鐘頭後盡興而歸，這才拖着凍僵的身體和他們踏上歸途。自此以後，每次聽到在寒冬帶外國客人遊長城便耍手擰頭，不想再當雪條

手頭上票價最廉宜嘅入場券，上海自然博物館入場票價竟是一角，真有點很夢幻嘅感覺

幾張天壇嘅入場券，當年都係$3至$5不等

一張1979年海洋公園兒童入場券，當年海洋公園剛落成不久，只有黃竹坑花園，還沒有建成南朗山山頂設施。我記得1977年海洋公園開張不到一個月便入場遊玩，當年票價都好像要12大元，不知記憶是否正確，還望識者指正

荔園遊樂場嘅入場券，相信係荔園宣布結業後我匆忙趕往朝聖之時留低落嚟嘅紀念品。荔園係我童年時代一個非常歡樂嘅回憶，各位若有興趣，可以瀏覽我早前所寫有關荔園嘅網誌

兩張新光戲院大戲戲飛，我很喜歡這類型嘅戲飛，有演出者彩照，很是鮮艷奪目。當年我老媽子經常去利舞台睇雛鳯，可惜當時沒有請她將戲飛留給我，否則便是個很好嘅記憶同埋收藏

兩張1979年麗宮戲院嘅戲飛，一張係睇野鵝敢死隊，一張係睇起尾注，當年中座收$2，頭等$2.5，問題係我知道前中後座，但係又唔係坐飛機，點解戲院都會有頭等，頭等坐邊？

英華戲院1979年嘅戲飛，睇嘅係胡慧中主演嘅歡顏，場次有啲怪，係早上10:45 ，當年一般戲院嘅場次有早場10:30 ，中午12:30 ， 2:30 ， 5 :30工餘場， 7:30 ，同埋一般最夜嘅9:30 ，甚至午夜場凌晨12:00. 10:45早場比較少見

倫敦戲院1978年嘅戲飛，睇嘅係桃李滿們（ To Sir With Love）， 戲當然係翻做嘅，電影首映應該係60年代中，78年一張後座戲飛都要$6 ，以二輪戲來講，似乎都幾貴

凱聲戲院1979年嘅午夜場11:30戲飛，睇嘅係暗殺目標（Brass Target），票價$7 ，睇落有啲貴（話時話，當年睇戲要俾娛樂稅，戲飛上會說明該張戲飛要付幾多娛樂稅，都幾均真）。我好鍾意電腦化之前嘅戲院戲飛，戲飛上大都印眀場次，價錢，以及座位檔次，睇張戲飛會得到好多訉息，偶然間某啲大片上演，戲飛仲會印上電影嘅戲名以及劇照，感覺好有心思

珠江戲院1979年中午三點嘅戲飛，票價$4 ，睇嘅係碧血長天（The Longest Day)。呢張戲飛有些少特別，用嘅係2:30預印戲飛，但加藍印改為三點，原因我諗係碧血長天套戲好長，所以要改正常場次去將就電影嘅放映時間

兩張印有戲名嘅戲飛票尾

兩張翡翠戲院1998年嘅戲飛，到咗90年代末，戲院已經取消分為前中後坐嘅制度，全院劃一收費，想坐後啲就要早啲買飛。戲飛票價$45 ，比70年代末足足貴咗近十倍，足見香港喺該十幾廿年物價飛升嘅情況十分厲害。戲飛有兩個值得留意嘅地方，一係戲飛上面印上不准吸煙字句， 1998年政府仍未實施全面禁煙，但娛樂場所可以自行禁止觀眾喺場內食煙，絕對係德政。另外戲飛右下角有個B字，估計係當時翡翠戲院已改建為迷你戲院，所以有A B院之分

幾張銀都戲院1998年嘅戲飛，留意不論場次同埋早晚都係一律$45 ，估計應該係當年嘅公價，唔知係咪銀都喺1998年嘅時候都已經改建為迷你戲院，所以有1，2院之分?

兩張皇都戲院1996年嘅戲飛，當年特等票價$33 ，反而大堂票價係$50 ，有啲難明（一般情況，舊式戲院嘅特等應該係全院最貴嘅戲票，點解反而仲平啲？

新都戲院1995（上）和1997年（下）嘅戲飛， 1995年嘅票價係$40 ，反而1997年嘅票價係$12 ，相信97年嗰張飛係早場嘅緣故。97年張戲飛印上三級警告字句，估計係用於三級場次，唔知係咪政府規定放映三級片要用印有三級警告字句嘅戲飛？

手頭上現存最舊嘅電腦戲飛，上面嗰張係1990年睇阿飛正傳，下邊嗰張係1993年睇愛登士家庭。電腦戲飛以保存價值來講，最致命嘅問題就係因為戲飛用油墨打印出嚟，時間一久，油墨便會褪色，裏面嘅資料便會變得模糊不清，對我此等喜愛收集戲飛嘅人來講，便會覺得好可惜同埋無奈

舊物牽情 1

 

疫情嚴峻，無奈被迫困在家中，百無聊賴中收拾舊物，才發覺自己其實儲了不少各式各樣的收藏品，幾經思量下決定將藏品公諸同好，供各位品賞。野叟晒曝，這些都不是什麼值錢之物，但或許，一件舊物，會擊中好幾個有心事的人.   又及:  因家居狹窄，藏品收藏頗為凌亂，故此敝網址內藏品之展示亦無甚章法，祈為見諒 .

我對舊錢幣知識甚為膚淺，不知道1947年嘅紅底是否仍是由人手手簽。其實手簽鈔票喺1946年曾經引起過小型金融危機，話說日軍佔領香港時，曾經逼匯豐銀行高層手簽過一批鈔票，日軍投降後，香港政府曾經對是否承認這批鈔票很有保留，但幾經思量後，仍然覺得因為要維持香港嘅信譽，決定承認呢批鈔票嘅法定地位，即容許此批鈔票喺市面流通

一張1970年嘅匯豐紅底，俗稱小聖書。1970年開始，香港兩間主要發鈔銀行，匯豐和渣打決定將$100鈔票嘅面積縮小，亦統一用紅色印刷，自此香港$100鈔票亦被䁥稱為紅底

四張1981年嘅$50鈔票。匯豐$50被暱稱藍屋，而渣打$50則被暱稱為獅子踩波

四張匯豐1988年嘅$20鈔票，鈔票嘅簽名者係當時匯豐總經理Wrangham，中文譯名為雷悟因，外號雷老虎。我很喜歡他的簽名式樣，很有學者嘅氣派

兩個1894年嘅香港一毫，當時仍然係維多利亞女王在位，所以印係銀幣面嘅係事頭婆像，唔係伊利沙伯女王，而係佢嘅曾曾祖母。唔知點解當年嘅一毫應該都具備好高購買力，但係面積就非常細，比5，60年代流行嘅斗零仲要細同薄，袋係袋裏面輕飄飄，一啲安全感都冇

兩個1891年嘅斗零

兩個香港一仙硬幣，左邊嘅係1893年維多利亞女王像硬幣，右邊嘅係1924年佐治五世像硬幣

一張60年代嘅兒童身分證，當年嘅兒童身分證當然冇相，但係原來只係列明姓氏，冇標示名字，感覺真係好兒戲，隨時可以俾人借用/盜用  

回港證，我相信好多90後嘅香港人都未用過，甚至未見過.  回港證主要係用嚟往返澳門之用，當年去澳門除咗身分證之外，仲要出示回港證，其作用同護照差唔多，出入境嘅時候海關人員都會喺回港證上面蓋印，以作為出入境記錄

七十年代中期開始，由於港澳人士入出入境中國越來越頻繁，不可能再用回鄉介紹書如此原始嘅入境文件，所以推出簿裝回鄉證.  回鄉證其實近似一本護照，每次出入國內，國內關員都會在回鄉證打印，以記錄出入境資料。好像至90年代中，才以回鄉卡代替簿型回鄉證

回鄉證簿嘅內頁，每次入境，都要填上隨身攜帶嘅貴重物品，因為根據法例，你若不登記，離境時便不可以將沒有登記的貴重物品帶出境 

這本旅遊證件叫做CI，身分證明書，是六七十年代沒有BNO的港人所用的護照，我70年代末去英國的時候便是用CI作為護照，我估計CI是當時港英政府為非英籍嘅港人所發出嘅護照，作為外出旅遊之用

八十年代嘅借書證，留意發出借書證嘅部門係已經唔存在嘅市政局。當年仍未可以用身分證借書，每個香港人可以申請三至五張借書證，每張借書證可以借一本書，借書嘅時候圖書館管理員會將書卡插喺借書證入面，還書嘅時候會將借書證還返俾本人。由此之故， 借書人只能去番借書嘅圖書館還書

曾經有段時間我好瘋狂咁收集同儲蓄火柴盒，因為我覺得火柴盒印刷精美，盒面上或印上商舖嘅名稱，或印上精美圖案,  故此甚有珍藏價值, 後來因為數量太多，不得不把部份拋棄，只保留自己覺得最有收藏價值嘅火柴盒。這個是匯豐火柴盒，不翻出來也不知道，原來匯豐銀行也出過火柴盒贈送予顧客

金豪酒樓嘅火柴盒， 金豪酒樓位於山道同埋皇后大道西交界處，現址為麥當勞餐廳。火柴盒上面嘅電話號碼係六個字，所以估計此火柴盒起碼有40年以上嘅歷史  

英豪酒家嘅火柴盒， 英豪酒家位於卑路乍街尾，近加多近街。 由於英豪酒家近漁市場，所以老爸經常在此請客，或者一家晚飯。我記得有一次全家在英豪吃晚飯，但當晚卻踫巧是青春火花大結局嘅播映時間，在魚與熊掌不可兼得下，我在晚飯中途找了個藉口溜回家，犧牲了一頓晚飯，去看青春火花的大結局（當年沒有錄影機，錯過了心愛的電視節目，不可能隨意翻看得到）

康年酒家嘅火柴盒.   康年酒家位於西環卑路乍街尾，鄰近告士打道餐廳，酒樓所在處現已成為實惠以及肯德基等舖頭。康年迄立於此處一段頗長的時間，相信資深西環友應該記得。我對康年最深印象的記憶，是當年酒樓仍未實行點心卡制，伙計埋單時一般都只是計算桌上點心籠嘅數目，有些貪小便宜嘅茶客遂於吃完點心後將點心籠掉棄，以期伙計計少一, 兩籠點心，找數時俾少一元幾角.  另外火柴盒上廣告標語說筵開百席，著實是有點誇張了，據我記憶，第一很少人在康年擺酒，，第二以康年嘅樓面面積，開20席都已經好汶水了

男爵酒樓嘅火柴盒。男爵酒樓位於康年酒樓對面，規模比康年酒樓還要小， 80年代初結束營業後其位置長期被丟空，新中華酒樓結業後，曾在此處重新開業，名為新中華寶湖，新中華寶湖結業後，由富寶軒補上，但最終仍敵不過疫情，黯然於年初結業，舖位至今仍然閒置

珍寶海鮮舫嘅火柴盒。珍寶海鮮舫出火柴盒係理所當然，火柴盒面嘅設計都好新穎同埋有創意，以菲林底片嘅方式印上海鮮舫嘅外貌，睇起上嚟好新奇有趣。海鮮舫嘅地址係香港仔遊艇灣，唔講真係唔知，當年有呢個咁嘅名稱

彌敦酒店嘅火柴盒，酒店外貌幅相嘅設計都幾獨特，另外留意電話係K字頭，即係撥打彌敦酒店嘅電話要先打3字，呢個做法喺80年代電話公司取消分港九新界字頭區，統一所有電話都係八個字嘅號碼前係指定動作

悅興盛酒家嘅火柴盒。悅興盛酒家位於德輔道西同埋修打蘭街交界，而家已經被改建為普頓台。我對悅興盛嘅記憶，係老竇通常每個月都會同啲行家喺嗰度開會，開嘅唔係乜嘢業務會議，而係一班人夾錢做會，會員用暗標投得該批會銀，下個月底連本帶利還返俾個會，如是者周而復始（美其名為開會，其實係搵個藉口大家食餐飯打麻雀）。老竇開完會之後， 例必會攞一甖熱騰騰嘅西米布甸返嚟，我不嗜甜品， 但呢個西米布甸可謂甜品中嘅極品，每次攞返嚟我都盡兩大碗，而家諗返起都回味無窮 

夏蕙夜總會位於皇后戲院地牢，屬於陸海通公司，公司旗下還有兩間很有名嘅夜總會，一間叫「仙掌」，一間叫「甘露」，設於六國飯店（後來改為六國酒店）.  夏蕙屬於中式酒樓夜總會,  中式酒樓夜總會60年代興起，不設舞小姐，只提供晚飯、跳舞及歌唱表演，係有錢人的銷金窩.  提起仙掌夜總會，好多人仍然記得1959年富商黃應求在仙掌夜總會附近被三狼綁架嘅歷史

四海保齡球場嘅火柴盒，四海保齡球場係當年三大保齡球場之一，除咗南華， 星光， 便數到四海，係當年好多年青人嘅熱門蒲點。四海雖然為地理位置上不及星光，但總算位處窩打老道中段，附近有好多學校，酒樓，學生們放學後都會呼朋引類咁喺嗰度聚會，吹水，打保齡球。我都曾經喺四海打過保齡球，感覺上設備似乎比較殘舊，配套亦稍嫌不足，可能已經係後期嘅緣故

呢兩張八角櫈真係好有歷史，據我老媽子講，其年紀比我還要大。呢兩張八角櫈亦都係我哋由澳門搬到香港所攜帶嘅唯一傢俬，陪伴我哋全家由中環搬到西環，即使我呢十幾年幾度搬家，仍然唔捨得丟棄。我曾經喺呢兩張櫈仔上邊沖涼，剝蝦，穿膠花，後來家里環境比較寛裕，買得起比較似樣嘅傢俬，呢兩張八角櫈便被老媽徵召入廚房，放置砂煲，此所以其中一張櫈面已被辣燶。講起呢兩張八角櫈，唔好睇輕佢咁外型咁唔起眼，其實都係用中國最傳統嘅做傢俬方法嵌制而成，成張凳冇一口鐵釘，而係用入榫嘅方法拼合而成