總網頁瀏覽量

2020年8月7日 星期五

老照片憶舊情 1



舊照片對我來說其實便是回憶,一張照片記錄一段回憶,一段回憶牽出一個故事,一個故事代表一個歲月。翻看照片,即打開了那一刻的記憶,那一刻,在影像的敲打下,被禁錮在時間的回憶,瞬間如飛瀑般飛瀉而下, 瀉滿整個人的思緒;曾經的我們,擁有沒有污染過的心靈, 那時的愛很簡單,不費力. 只用心, 而整個的青春,最美的風景竟是你的笑容; 朦朧中我見到那鬱鬱蔥蔥的泥灘,感受到那早春絲絲咧咧的風,和嗅到那青草混合泥土的味道,於是, 那個下午,那年少的我,那已遠去的青春, 又彷彿回到眼底. 


五十年代中甄沾記位於堅道嘅舖頭,此處應該是堅道與些利街交界處,近太子台附近,對面應該是堅道浸信會。不知道什麼原因,我一直都不喜歡食椰子糖,童年時飛完髮後那個飛髮佬塞給我那粒椰子糖,我都是回家轉送予弟弟,可能我不喜歡椰子糖那種過甜的味道吧

五十年代油麻地段嘅彌敦道,右邊可見到彌敦酒店,大華戲院,高華酒樓等經典建築

經典嘅西環舊相,一輛電車緩緩駛經西環新海旁,左手邊嘅均益倉而家已改建成商住大廈,睇番舊照,童年種種生活點滴,瞬間湧上心頭來

五十年代上環德輔道西和皇后街交界處向東望,如果我冇記錯,當年左手邊有間叫天發嘅潮州酒家,甚為有名

五十年代末嘅中環雲咸街,當時仲有人用轎來做交通工具

喺美孚橋撐過艇仔, 應該都已年過半百.  此時此刻, 都忍唔住唱番句曳摇共對輕舟飄,互傳誓約慶春曉


五十年代嘅上海街,可以見到成條街主要係民生商舖,有錶行,疋頭行,錶行,同今日不可同日而語。圖右嘅橙色汽水車係淘大公司運送綠寶汽水嘅汽水車,車牌仲係HK字頭,當年香港行走喺街上嘅汽車真係唔多 

五十年代嘅太子道,美美得像洲小鎮,左方尖塔處係聖德肋撒教堂



五十年代干諾道中海旁,當時在沿海傍都係旅館,因為此處是來往中港碼頭的集中地,照片後邊白色建築物即為舊李寶椿大廈



六十年代由海中心望向域多利道沿岸處,兩支高聳入雲嘅煙𠧧處係垃圾焚化爐,今天當然已然被拆卸掉,左邊可以看到政府宿舍同埋屠房,後左方係西環邨,再遠啲嘅係觀龍樓



六十年代山頂,右邊是山頂餐廳, 巴士站處係今日嘅山頂廣場

六十年代初由維港望向統一碼頭,恒生銀行大廈左側嘅聯邦大廈(即今日的永安集團大廈)仍未興建起來,因此可以看見位於德輔道中的第一代萬宜大廈, 其後建成嘅國際大廈(今中保集團)曾經是香港最高建築物

靚到沊一聲嘅雍雅山房,冇嘢講

柴油火車年代嘅火車站,當年因為班期比較疏落,喺繁忙時間,車廂會好擠擁,乘客要喺車窗爬入去,有啲甚至要坐喺車卡中間嘅樓梯上面.  我仲記得七十年代曾經發生過慘劇,一位中大嘅教職員喺行走中嘅火車中跌落路軌,慘遭碾斷手腕,當時鐵路運輸情況可想而知。一句題外話,我記得當年好多大陸偷渡客匿喺載貨火車卡車底,企圖偷渡嚟香港,所以時不時都有喺火車卡下面搵到偷渡客嘅消息



七 十年代從卜公碼頭回望中環海濱長廊,長廊當然已被拆卸,並改建為交易廣場,黃色的小船是嘩啦嘩啦,說白了便是海上的士.  在還沒有海底隧道的年代,這些的士除了接載夜深人士過海外,也會接在越戰是來港度假的美國大兵來回戰艦, 據說一首嘩啦嘩啦可以養活全家人

六十年代皇后大道中由西向東望,右邊可以見到我哋嘅老朋友余仁生,梁新記,陳春蘭,再遠啲係中央街市,泊喺左邊架黃色貨車係運送可口可樂嘅汽水車,左邊嘅雙喜月金飾行係一間好有名嘅金行,另外亦都可以見到一間叫做蕭洒授舞嘅招牌,估唔到60年代已經有人教跳舞咁前衛



玩得咁過癮?一陣你就知

石硤尾窩仔街,難得晉升成為有車階級,仲唔义腰影相威下

第一代嘅聖佐治行,非常典型嘅維多利亞式建築,呢種咁巍峩莊嚴嘅建築物,香港剩返嘅恐怕只係得終審法院

一毫子一碗白粥,一條油炸鬼嘅日子,我真係經歷過

從軒尼詩道望向京華戲院,前面嘅道路係渣甸街,當年嘉美舞廳喺銅鑼灣甚有名氣 

七十年代上環大笪地嘅果汁檔,仲有冇人記得嗰啲凍到頭都赤嘅椰汁?  

五十年代嘅軒尼詩道,右邊係修頓球場

唔好搞錯,喺五十年代,呢種酒樓唔係乜嘢懷舊茶樓,而係正常嘅一般茶樓,不過有啲異於普通茶樓嘅係,呢度嘅顧客大多數都衣着新鮮,甚至西裝筆挺,我估呢間係位於商業區嘅茶樓,啲白領正在喺度午饍,亦都因為係咁,所以窗口冇掛到雀籠


20 則留言:

  1. 第16張圖: "另外亦都可以見到一間叫做蕭涵授舞嘅招牌"...應該係[蕭洒]授舞。

    回覆刪除
  2. 第21張圖: "前面嘅道路係渣甸坊"....應該係[渣甸街]。

    回覆刪除
  3. "六十年代由海中心望向域多利道沿岸處,兩支高聳入雲嘅煙𠧧處係垃圾焚化爐,"你我的家!

    回覆刪除
    回覆
    1. 圖片中煙囱正在冒煙,顯示當時垃圾焚化爐正在焚燒垃圾,當年住在西環,簡直係百臭俱發,垃圾焚化爐,牛欄,雞欄,屠房,污水渠,團團包圍,每日豬牛車呼嘯而過,可謂臭不可聞,但卻無減童年愉快回憶,那管他環境惡劣,也甭管生活條件差,只要不用擔憂明天無飯開,無書讀,放學後可以穿梭大街小巷遊玩,星期六,日有一,兩毫子看去涼茶舖看電視,去戲院看場電影,或者去域多利道沙山玩滑沙,便是個無憂無慮的童年~~

      刪除
    2. 當年夜晚就係你母校下底加惠民道同玩伴攞盤水係街燈下捉水曱甴。

      刪除
  4. 望穿秋水,版主終於有新文章了,希望 【老照片憶舊情2】不用等咁耐啦!

    回覆刪除
  5. 多謝捧場,有空請多啲嚟坐~~

    回覆刪除
  6. "經典嘅西環舊相", 跟西環大佬講過多次, 呢度是一生一世不能忘記的地方, 天天都走過, 亦在此看過不少青洲落日, 好可惜,家陣冇咗!

    回覆刪除
    回覆
    1. 而家都可以去西環碼頭睇日落, 但當然感覺已經唔同晒, 正所謂"青山依舊在, 幾度夕陽紅"~~

      刪除
  7. 馮良記還在大有商場附近營業

    回覆刪除
  8. 哦, 原來搬左入去大有商場~~

    回覆刪除
  9. 美孚橋往貨櫃碼頭方向,80年代頭還有一個「情人島」,啲人撐艇可能就是去嗰度。後來擴建葵涌道填咗。

    回覆刪除
  10. 這個我還真不知道, 謝資料提供~~~

    回覆刪除
  11. Oceandeep3000 兄, 偶然路過貴 BLOG, 欣賞了你大量的香港老照片, 謝謝你的分享 ! 你不單擁有海量靚相, 最重要的是你生動的文字介紹 ! 令人引起無限回憶.

    回覆刪除
  12. 上環新填地不是大笪地,兩個不同地方。

    回覆刪除
  13. 食粥的小妹妹那張相是在澳門沙欄仔影。

    回覆刪除