前兩天為了看「寅次郎返嚟啦」，特意入戲院（本來想說距離上次入戲院的時間已經很久了，但回心一想，原來上次買票入場是看「上流寄生族」，屈指算算也不是太久之前的事情）. 看「寅次郎返嚟啦」 是捧兩個人的場，一位是渥美清，另一位係山田洋次。渥美清當然已然離去，此片剪輯了他以往拍「男人之苦」的片段再拼湊而成，劇情設在他逝去後，以他外甥的生活為主線，某方面你也可以說，寅次郎將男人之苦的況味傳給他外甥。劇本天衣無縫，情節亦推進得很流暢，當然這得歸功於山田洋次此位日本國寶級導演，他年近九十，惟仍寶刀未老，功力深厚，電影的處理手法如流水行雲，甚是賞心悅目。日本人拍電影頗堪玩味，簡單來其光譜可以很兩極化，既可拍到好崩緊啜核，譬如「切腹」，「蜘蛛巢城」，「楢山節考」，「沙丘之女」等，敲打觀眾的靈魂，但他們拍溫馨親情片卻又另有一手，早期的譬如「東京物語」，中期的「永遠的三丁目」，以及近期一點的「麻煩家族」，雖然因為年代問題，描述親情以及人與人之間的感情表達手法唔同，但始終都入心入肺，引起共鳴。我想本片即使不是男人之苦迷，都不會覺得隔陔，陌生，人物描述簡單明快，好容易導人入戲（由於電影仍在上演，劇情內容不打算再此多説，以免劇透）。尾段將寅次郎和眾女神的片段剪輯播放，甚有「天堂電影院」（cinema paradiso)的片末催淚feel，我相信很多男人之苦迷會看得眼濕濕，結論是你若喜歡懷舊溫情電影，此片值得一睇。
寅次郎手提旅行匣的經典造型
寅次郎返嚟啦劇照 1，左起滿男, 寅次郎外甥（吉岡秀隆飾演）, 泉, 滿男初戀女友（後藤久美子飾演）, 櫻, 寅次郎妹(倍賞千恵子飾演), 博, 寅次郎妹夫 (前田吟飾演)
寅次郎返嚟啦劇照 2，左起 泉, 滿男, Lily, 寅次郎舊愛( 淺丘琉璃子飾演)
寅次郎返嚟啦電影中經常加插舊片段, 右邊是中村速人(飾演16歲的滿男), 左是當時差不多同齡的後藤久美子
大美女栗原小卷也曾當過寅女郎
大原麗子, 另一位寅女郎
男人之苦電影版第一集寅女郎光本幸子
男人之苦第五集中長山藍子飾演寅次郎女神
男人之苦電影版第九集的女神吉永小百合, 吉永小百合曾主演過1963年版的伊豆舞孃, 氣質甚是清新脫俗
男人之苦第45集中風吹純飾演美容師，不介意寅次郎吊兒郎當, 願意和他一起生活
在眾多寅女郎當中, 以淺丘琉璃子飾演的Lily和寅次郎最夾, 兩人甚至差點結成婚
倍賞千惠子和渥美清，在寅次郎系列中扮演一對兄妹
後藤久美子(左)和倍賞千惠子(右). 倍賞千惠子在寅次郎系列中由少女做到阿婆。樱是我在寅次郎系列中最喜愛的角色，她是寅次郎同父異母的妹妹，但卻一直很維護寅次郎，感覺上她愛和關顧寅次郎更甚於丈夫. 櫻秉性善良, 是很典型的舊式日本女性，她刻苦耐勞，溫馴婉約，是家中的頂樑柱，每次寅次郎鳥倦知還回家，都給予無條件的庇護. 一句題外話，倍賞千惠子之於山田洋次，有點像原節子之於小津安二郎，是導演最喜歡的女星，倍賞千惠子曾經主演過很多山田洋次導演的電影，其中最為人熟悉的有遠山的呼喚，幸福黃手絹等
睇舊相先至睇到咁奇特嘅景象, 維多利亞公園與百德新街之間曾經是一河之隔. 呢條睇起嚟似係人工河道，其實係海面，而海嘅兩邊嘅土地; 即西面嘅百德新街/記利佐治街(大丸)/糖街等住宅區, 和它東面嘅維多利亞公園, 係喺不同年代嘅填海造工程做出嚟. 貌似運河的窄長河道其實係故意唔填上，其目的係留ㄧ條水道俾船艇泊近當時嘅牛奶製冰廠 (現已拆卸並改建成為皇室堡)提取生雪以作冷藏漁獲，或者提供予停舶在海港中其他船隻之用。直至上世紀七十年代，由於要興建海底隧道, 政府重整該區交通網絡，索性填平水道，成為了後來的告士打道，並興建道路/天橋接駁大坑道, 高士威道和維多利亞公園等地. 這中間有段幾有趣嘅歷史, 水道雖然被填平，但牛奶製冰廠仍繼續運作, 政府特意建造了ㄧ條運雪糟/隧道，將製冰廠嘅雪塊，沿著維多利亞公園西，從銅鑼灣避風塘出地面，供應俾漁民。 七十年代中置地成功收購牛奶公司, 冰廠被拆卸, 1979年在原址建成皇室大厦, 而運雪糟亦隨之而荒廢
七十年代嘅炮台山，照片正前面嘅係皇都戲院，今日仍在在原址屹立，戲院當然已經停業多年，而家係一個雜貨市集/商場. 皇都戲院對面係國都戲院，已然拆卸多時，並變成今日嘅國都商場. 照片右前方係世運酒樓，當年係一間頗具規模嘅酒樓
油麻地新填地街和甘肅街交界處，右邊是果欄，真係唔知手推車上邊載住嘅係乜嘢貨物，點解要咁多人推
六十年代嘅彌敦道，照片前方係文遜大廈，後面嘅鐘樓係九龍電話大廈
六十年代位於佐敦道和彌敦道口嘅裕華國貨公司，當時後面嘅嘉賓大廈仍未起
七十年代屈地街電車總站，右邊嘅舊樓群於九十被拆卸，改建成為今日嘅太平洋廣場
五十年代嘅佐敦道，左邊可以見到快樂戲院，快樂戲院後面廟街口那幢四層高嘅舊樓，今日仍健在，右邊見到牛奶公司單車雪糕佬，今日應該已經絕跡
有冇人喺徙置區/廉租屋嘅空地打過乒乓波？我自己就喺華富邨和觀龍樓打過唔少喇
七十年代尖沙咀天星碼頭入口收費處，可能因為係頭等，所以有鬼佬稽查在旁侍候
七十年代由豉油街同通菜街望向亞皆老街方向，當時通菜街仲未係行人專區，街嘅兩邊舖頭雜貨紛陳，完全係應街坊所需而開設嘅舖頭，右邊可以見到安康寧藥房，藥房喺彌敦道近太子嘅分店今日仍然營業，賣嘅唔係自由行貨品，都幾有性格
五十年代位於銅鑼灣軒尼詩道近今日鵝頸橋天橋處嘅大三元酒家，聽聞其出品嘅鴨腳扎獨步香江，今日除咗幾間老舊式酒樓外，相信都冇乜地方可以食到鴨腳扎，金錢雞呢類懷舊菜
五十年代薄扶林道近第三街交界處，左邊係玫瑰里遊樂場，右邊嘅舊樓群當然已然拆卸，並改建為萬林閣，照片右後方係今日仍然健在嘅李陞小學。呢條路我好熟，我中學母校位於般咸道上面，每逢放晏晝食飯，都會沿住呢條路行落去皇后大道西搵地方食晏，有啲時候會去茗芳酒樓，又或者去正街嘅聯華茶餐廳，此家茶餐廳今天仍健在，可謂奇蹟
五十年代灣仔軒尼詩道和堅拿道西東交界處， 其時寶齡頓明渠還未完全塡平，當然仍未有天橋，跑馬地嘅山水仍沿著此條明渠流出大海
七十年代初德輔道中和永樂街交界處，正中嘅金龍酒樓, 我哋曾經喺嗰度擺過酒，而家已經拆卸並改建為金龍中心，照片後右處可以見到永安公司
一碌竹，肩挑返鄉下嘅，除咗風扇同埋日用品之外，仲有滿滿嘅親情
以前啲人盂蘭節燒衣，會喺街邊撒散銀，引嚟啲圍觀嘅細路一哄而上搶拾呢啲散銀。以當年嘅物價來講，斗零可以買兩粒椰子糖，一毫子可以買條雪條，着實係一個唔錯嘅外快。有錢執當然好引誘，但當年老媽子好嚴厲咁警告我哋唔可以執呢啲散銀，因為有機會會引鬼入屋。盂蘭節過後，我偶然間會喺街邊執到毫子，既然唔係當場執到，咁就唔算執鬼錢, 所以都會攞呢啲錢去買零食，當係一種意外bonus吧
曾江同林翠兩兄妹喺雍雅山房嘆茶，男嘅俊俏，女嘅嬌美. 曾江不需多講，林翠係我一個好鍾意嘅國語片女星，佢喺四千金嘅爽朗形象喺我心目中留下好深刻嘅印記，可惜遇人不淑，嫁咗比秦劍，被逼不斷拍戲為他還債，甚是堪嘆
應該係六十年代新填地街嘅街景，靚師奶回眸凝望鏡頭，真係可以媲美國家地理雜誌當年阿富汗少女嘅凌厲眼神. 靚師奶揹個細路頭上起左個高樓，當年啲小孩子天生天養，手腳受傷，頭起高樓係閒過立秋，今日當然不可同日而語. 留意圖中亞婆着嘅木屐， 五¸六十年代木屐係好流行嘅鞋屣，以其鞋底夠高，去街市唔怕濕腳也
由亞皆老街望向廣東道，今日兩邊嘅舊樓大部份已經拆卸，但係呢段仍然係露天街市，我偶然間都會去逛逛，感受下嗰種真正街坊街里，人聲沸騰香港原味道
一幅既溫馨，又寫實嘅母子上街圖，阿媽一手挽住餸，一手擔住遮怕晒親揹住嘅細仔，冇手拉住個大仔，個細路唯有拉住阿媽條褲行，論盡得來，又完全反映嗰個年代阿媽係超人，能人所不能嘅形象
六十年代由上海街和豉油街交界處望向油麻地，真係好鍾意呢種色彩斑爛嘅舊相，完完全全呈現左六十年代嗰種雜亂無章，但係又生氣勃勃嘅街頭景象
彌敦道和豉油街交界處, 右邊可以見到國際酒樓夜總會，國際酒樓在1971年開業，開幕當日客啱啱打風，招牌都被吹倒. 大元和大大百貨公司相信唔使我介紹了罷. 左邊可以見到鱷魚恤, 龍鳳酒樓，新雅酒店, 以及位於新興大廈嘅五月花酒樓，要睇戲? 可以去南華戲院, 同埋對面嘅荷里活戲院. 當年彌敦道百花齊放, 吃喝玩樂, 民生雜貨應有盡有, 而家七, 八成店舖都是金舖、化妝品店、藥房和一些大連鎖店，毫無特色
六十年代嘅油麻地新填地街. 建築物前面嘅十字路口係公衆四方街與新填地街交界，街坊們應該仲記得九龍冰室，冰室對面則是黃碧山涼茶舖
維多利亞公園游泳池，絕對是我童年最美好的回憶之一，靚仔嘅時候除咗去金銀，鐘聲泳棚游水，偶然間老媽子會帶我哋去維多利亞公園游泳池游水，我都係喺維多利亞公園游泳池自學學識游水. 游完水之後會喺銅鑼灣附近，主要係怡和街搵間茶餐廳食晏晝（我就係喺嗰陣時候愛上食窩蛋牛肉飯）. 偶然間老媽子興起，會喺銅鑼灣搵間戲院睇場戲先至返屋企，一個節目豐富嘅週末就係咁樣溜走. 另外以前露天泳池有全日開放嘅露天茶座, 游到攰可以食完野再玩,如果唔怕曬, 夠精力可以由朝玩到晚, 童年真美好
五十年代銅鑼灣嘅堅拿道東同埋羅素街交界處，舊電車廠當然已被拆卸，並改成建為今日嘅時代廣場。當年呢度一帶係個好繁盛嘅露天街市同埋食街. 街巿有金魚檔, 肉舖, 豆腐舖, 叫得出名嘅舖頭有三利隆麵舖，合利粥檔，潮興潮洲檔，財記茶檔，邱仔記糖水，錦添花小炒，萬全雜貨，天鵝冰室等等, 都係啲街坊式環頭環尾嘅舖頭，而家因為時代廣場嘅進駐，成條羅素街都富貴起嚟，感覺就好似鄉下姑娘變咗富家小姐，賣嘅都係貴價鐘錶珠寶同埋化妝品，完全變了樣
銅鑼灣怡和街尾電車總站，樂聲戲院係我童年最喜愛的戲院之一，雖然唔係喺嗰度睇過好多齣電影，但每次若能去銅鑼灣睇戲，必然是節目豐富的一天，(因為去咁遠睇戲, 肯定會有餘興節目, 譬如行街買嘢, 晚飯等). 我記得我喺樂聲睇過"美人如玉劍如虹"和"坦克大決戰"。樂聲戲院當然已結業多時，並重建為樂聲大廈. 樂聲戲院最後放映嘅電影係"鱷魚先生". 戲院結業後曾裝修，並成為華潤百貨公司，惟由於經營不善，被逼結束營業，導令數百名員工失業
應該係五十年代嘅軒尼詩道，前方左邊係怡和街，左邊係東角道(即今日Sogo正門), 遠處嘅白色建築物係牛奶公司，當年位於海邊
由聖保䘵學校通往銅鑼灣電車總站的行人天橋俯視高士威道,最左邊灰色單層建築物係小童群益會嘅圖書館，童年時老媽子帶我哋去維多利亞公園玩，累了的時候便會躲進圖書館睇書，一個週末便這樣溜走了。隔離凉亭牆上掛咗部電視機, 當年只播麗的電視的節目。 睇電視雖然係我哋靚仔最鍾意嘅節目之一，但係電視機掛得太高，睇到頸都梗, 另外企喺下邊根本聽唔到聲，加上電視雪花好多，所以好少喺涼亭睇電視
