總瀏覽量

2016年4月23日 星期六

廣東話童謠



朋友傳來幾十則廣東話童謠,看着看着,感到很窩心暖胃.  此輯童謠包括了很多童年時耳熟能詳的歌仔,如 "月光光,照地堂",也有一些甚為陌生的,如 "細蚊仔,瀡滑梯,因住跌落嚟".  老實說,即使熟悉如"月光光",我頂多只能背誦三, 五句,今天我是第一次從頭到尾讀到整首完完整整的"月光光".  我彷彿在童年時代,老媽子哄幼妹瞓覺的時候聽過月光光,而我自己則在和小朋友玩捉迷藏,跳 Over時唱歌部份童謠,但那已是幾十年前的往事了.  



縱灠這些童謠,大致可分為兩類; 一類是母親 "哄細路仔瞓覺"的呢喃語,第二類是小朋友們玩耍時的戲謔語,前者溫馨,後者調皮,但都趣味盎然.



讀這些童謠的另一種樂趣來自細嚼箇中的言語,童謠大都是以口語甚至俚語為主,說得白一點是粗俗,但正因他們簡單直接,不矯扭做作,所以有着強大的生命力.  當然童謠裏面的世界已距離我們很遠了,今天香港那來田基,而小朋友也不會玩掟石頭,抛手巾等洪荒時代的玩意吧,但我卻愛煞這種老式的廣東話,(或者叫廣府話),那是我童年時代老一輩的人説的廣東話, 今天社會充斥著潮語, 火星文, 那及得這些廣東話來得親切而道地.  



後記: 不知現今的媽媽唱什麼童謠哄她們的寶寶睡覺呢?




* 月光光,照地堂;年卅晚,摘檳榔;檳榔香,嚼子薑;子姜辣,買蒲達;蒲達苦,買豬肚;豬肚肥,買牛皮;牛皮薄,買菱角;菱角尖,買馬鞭;馬鞭長,起屋樑;屋樑高,買張刀;刀切菜,買籮蓋;籮蓋圓,買隻船;船浸底,浸親兩個番鬼仔;一個蒲頭,一個浸底;一個摸茨菇,一個摸馬蹄。


* 點蟲蟲,蟲蟲飛,飛到荔枝基;荔枝熟,摘滿屋;屋滿紅,伴住個細蚊公。
 

* 又喊又笑,烏蠅打醮,蠄蟧攋尿,老鼠行橋。


* 排排坐,食粉果;豬拉柴,狗透火;貓兒擔凳姑婆坐;坐埋一齊唱支歌。


* 凼凼轉,菊花園;炒米餅,糯米團;亞媽佢叫我去睇龍船;我唔睇,要去睇雞仔;雞仔大,搦去賣;賣咗幾文錢;我買隻風車仔,佢轉得好好睇,睇佢凼凼轉啊菊花園,睇佢凼凼轉啊凼凼轉啊轉。


* ABCD,大頭綠衣;捉人唔到,吹BB。


* 落大雨,水浸街,亞哥擔柴上街賣,亞嫂出街著花鞋,花鞋花襪花腰帶,珍珠蝴蝶兩邊排。


* 賣懶去,買精歸,賣左懶仔過新年,食過年飯好種田。


* 賣懶,賣懶,賣到年三十晚,人懶我唔懶。


* 細蚊仔,瀡滑梯,因住跌落嚟;咪學陳德貴,成日流鼻涕,跌親籮柚唔好睇。


* 河邊有隻羊,羊邊有隻象,象邊有隻馬騮仔,好似你噉樣。


* 咬蔗須,要睇毛,短毛輸,長毛贏,冇毛唔算數。


* 搣開柑,數柑核,邊個核多就邊個贏,唔准手賴就縮骨。


* 拍大骳,唱山歌,人人話我冇老婆,扚起心肝娶翻個,有錢娶個嬌嬌女,冇錢娶個豆皮婆,豆皮婆,食飯食得多,屙屎屙兩籮,屙尿沖大海,屙屁打銅鑼。


* 呈沉剪,呈沉包,呈沉糯米叉燒包。老鼠唔食香口膠,要食豆沙包。


* 點指兵兵,點指賊賊,點著誰人做大兵,點著誰人做大賊。


* 估手指,要估中,邊個唔中,就唔中用,褲浪底見個窿。


* 騎牛牛,牛牛走,牛牛響前咪回頭,若然回頭就打籮柚。


* 大眼雞,鹹魚頭,你屙尿,唔洗手。


* 轆銅仙,打銅錢,全憑眼界手出變,叮響銅錢畀個仙。打泥炮,泥炮響,唔使摣槍上戰場。折紙機,麻鷹飛,飛嚟飛去唔落地。


* 趌跛跛,跛咗蹄,冇米煮,煮泥沙,冇屋住,住樓梯,樓梯有只鬼,嚇到你嗊落床下底。


* 伸長手,頂手掌,死人都要頂硬上,依牙嘣哨就貓噉樣。


* 走得快,好世界,走得嚤,冇鼻哥。


* 鬥遠掟石頭,因住咪甩手,石頭最冇眼,掟親唔好眼淚流。掟磚頭,鬥大嚿,一掟掟到西門口,濺起浪花拋浪頭。


* 花手巾,真引人,基邊撈魚好過癮,一兜一條好手運,千祈唔好踎到你頭暈。


* 黐塘咪,塘咪飛,飛到菜田基,田基有條蛇,嚇親你兩仔爺。


* 一人騎膊馬,兩人騎豬乸,三步要埋頭,撞到面就打。


* 紅辣椒,綠辣椒,平時你嘴喵喵,今日你冇膽同我撩。


* 鬼叫你咁貪心,聞咗我個屁,嗍咗入個鼻,我要你賠翻二兩四。


* 眛水底,摸泥沙,摸到泥沙當金龜,摸唔到喺契弟。


* 陳德貴,住得矮,床下底有只鬼,嚇到嗊抬底。


* 一二三,三二一,肥婆跳舞頂第一!


* 黑面李逵,紅面關公,三國水滸亂哂龍,打敗清兵系英雄。


* 乞兒仔,畫烏龜,一人一筆咪亂嚟,最後嗰個正衰仔!


* 大笨象,摣支槍,去打仗,打完仗,翻嚟食碗辣椒醬。


* 有隻雀仔跌落水,跌落水,跌落水,有隻雀仔跌落水,被水沖去。


* 肥仔個頭,大過五層樓,肥仔隻手,細過荷蘭豆。

11 則留言:

  1. 仲有,"肥婆學揸車,啤啤………史特勞斯嘅藍色多惱河…。

    回覆刪除
  2. Great ! 有4份1未聽過,得益不少 !

    回覆刪除
    回覆
    1. 有大半係四五十年代嘅,老鬼有幸,仲有機會聽到,到六十年代已經部份消失,七十年代差唔多剩番少少,八十年代冇乜人唱,九十年代除咗月光光有的後生仔攞來做保育,基本消失,今時今日,邊有家長再教?二歳已經開始"打機"咯!

      刪除
  3. 傳民謠在流傳過程中出現變化原是正常的,但有部分可見是後人刻意竄改。例如「月光光」,最面兩句字數和韻腳都有異於上文,由三這變成四五言,原本是一對對地押韻的,最後四五字的再沒有按照這規律;而且「蒲頭」是潮語。多年前曾聽過有人批評「船冇底,浸死兩個番鬼仔」鼓吹仇外。相信這是被竄改的主因。

    「點蟲蟲」是用來訓練幼兒指頭觸感的。大人抱著小孩,邊唱邊把孩子兩隻食指觸碰,到最後用手指指向他∕她鼻孔。

    「凼凼轉」最後幾句「金腰帶,銀腰帶,請個婆仔出嚟拜一拜」聞說有賄賂權貴的含意。

    「落大雨」那句「亞哥擔柴上街賣,細佬落地著花鞋」,聽聞是暗示細佬是後母所生,所以兩兄弟遭遇有這麼大的差異。

    回覆刪除
  4. 這裡有幾支兒歌與兒時祖母教我的版本有別:

    「月光光,照地堂;年卅晚,摘檳榔;檳榔香,嚼子薑;子姜辣,買蒲達;蒲達苦,買豬肚;豬肚肥,買牛皮;牛皮薄,買菱角;菱角尖,買馬鞭;馬鞭長,起屋樑;屋樑高,買張刀;刀切菜,買籮蓋;籮蓋圓,買隻船;船冇底,浸死兩個番鬼仔。」

    「點蟲蟲,蟲蟲飛,飛到荔枝基;荔枝熟,冇訂伏,伏去個鼻哥窿。」

    「排排坐,食粉果;豬拉柴,狗透火;貓兒擔凳姑婆坐;坐爛屎窟唔好賴著我。」

    「凼凼轉,菊花園;炒米餅,糯米團;亞媽佢叫我去睇龍船;我唔睇,要去睇雞仔;雞仔大,搦去賣;賣咗幾多錢,賣得三百銀錢。金腰帶,銀腰帶,請個婆仔出嚟拜一拜。」

    「落大雨,水浸街,亞哥擔柴上街賣,細佬落地著花鞋,花鞋花腳帶,胭脂兩面排。」

    口傳民謠在流傳過程中出現變化原是正常的,但有部分可見是後人刻意竄改。例如「月光光」,最面兩句字數和韻腳都有異於上文,由三這變成四五言,原本是一對對地押韻的,最後四五字的再沒有按照這規律;而且「蒲頭」是潮語。多年前曾聽過有人批評「船冇底,浸死兩個番鬼仔」鼓吹仇外。相信這是被竄改的主因。

    「點蟲蟲」是用來訓練幼兒指頭觸感的。大人抱著小孩,邊唱邊把孩子兩隻食指觸碰,到最後用手指指向他∕她鼻孔。

    「凼凼轉」最後幾句「金腰帶,銀腰帶,請個婆仔出嚟拜一拜」聞說有賄賂權貴的含意。

    「落大雨」那句「亞哥擔柴上街賣,細佬落地著花鞋」,聽聞是暗示細佬是後母所生,所以兩兄弟遭遇有這麼大的差異。

    回覆刪除
  5. 童年時聽這些童謠都是"水過鴨背", 記得三幾句已算不錯, 那能分辨出不同版本? 老兄的心思真細密, 可看穿童謠背後的深意, 佩服佩服~~

    回覆刪除