粵語流行曲

 

香港五,六十年代的流行樂壇基本上是由粵語流行曲, 國語時代曲以及歐西流行曲三分天下( 五十年代以前香港的流行曲主要是由來自上海海派的國語時代曲主導﹐代表的歌星有龔秋霞﹑周璇﹑姚莉﹑李香蘭﹑白光﹑吳鶯音﹑張露等).  然而由於廣東人始終佔香港人口的比例甚大, 所以發展至五十年代中,後期, 粵曲/粵語流行曲可以說是接班成為當時的主流音樂.

 

當然, 粵語流行曲的流行也有著它獨特的因素.  粵語流行曲脫胎自粵劇或者是粵曲.  五十年代粵劇名伶有薛覺先﹑上海妹﹑白駒榮﹑馬師曾﹑廖俠懷等; 而粵曲方面有平喉四大天王小明星﹑徐柳仙﹑張蕙芳﹑張月兒﹐她們都是既在茶樓獻唱又灌錄唱片的女伶.  稍後由於社會經濟發展, 開始有一些早期的粵語流行曲出現﹐但名稱繁多﹐有粵語時代曲﹑跳舞粵曲﹑諧趣小曲和粵曲小調等.  早期粵語流行曲的曲式很接近粵曲﹐我想這是因為主唱者大多是與粵劇有關的伶人﹐而編曲/伴奏的亦是粵劇界中人, 故此旋律方面也大多採自廣東音樂或是粵劇裡的小曲.  那時候, 港產喜劇電影很多時候都會加插大量的諧曲(其中以新馬仔, 鄧寄塵, 梁醒波, 鄭君綿等人主演的電影尤甚), 這些諧曲慢慢分拆出來成為諧趣式的粵語流行曲, 加上收音機日益普及, 每日都播放著大量的粵曲/粵語流行曲, 市民大眾在茶餘飯後都能瑯瑯上口, 這個趨勢將粵語流行曲推上高峯.

 

細味著粵語流行曲, 其中最大的特色是歌詞非常口化, 具體一點來說是以當年的”潮語”嵌入歌詞, 但不一定低俗, 而且編曲典雅(編曲者很多都是響噹噹的人物如呂文成, 何大儍等), 所以歌曲悅耳動聽, 至於遣詞用語則盡量以日常用語入曲, 聽起來讓人覺得生動有趣, 猶如跟歌者對話, 感覺特別親切.  衆所周知, 粵語流行曲衍生自粵曲, 50年代粵劇撰曲人材輩出 , 為人熟知有王粵生、唐滌生、呂文成、尹自重、何大傻、程岳威、胡文森等, 由於社會經濟環境改變, 他們紛紛改以小調編曲, 而音樂演奏方面則加入西洋樂器, 塑造與粵曲區別的另類音樂, 行內統稱這股新創的潮流為新派粵曲小調, 填詞人有周聰、廖志偉、吳一嘯、朱老丁、後期則有柳生、李願聞、羅寶生、龐秋華等等.    由於撰曲者風格各異, 此類粵語歌曲於當時有[跳舞粵曲]、[諧趣新曲]、[警世新曲]、[粵語時代曲]之分, 箇中以周聰自填自唱且產量最豐, 並首先將粵語小曲稱為[粵語流行曲]最受著目 .  他捕捉到潮流趨勢, 其歌曲種類包括情歌, 勵志歌, 甚至創新與小木偶合唱等, 均大受歡迎, 所著作的歌曲亦大行其道,  [粵語流行曲]便成粵語歌曲代名詞,  而後人遂稱周聰為粵語流行曲鼻祖.  

 

早期粵語流行曲多以坊間小調入曲 因應民生困苦作題材, 主要的演唱者包括：走現實歌路的朱老丁、廖志偉、伍木蘭,  走諧趣歌路的鄧寄塵、何大傻、、鄭君綿以及走情愛歌路的周聰、呂紅 、許艷秋、李芬芳.  其他電影明星如鄧碧雲、芳艷芬、鄭幗寶、林鳳(陳維玲代唱)等則走鴛鴦蝴蝶派路線.  回顧這段時期的粵語流行曲, 可算是百家爭鳴, 各有千秋 至今仍為人津津樂道. 

 

粵語流行曲的另一個特色是, 由於當年沒有CASH 和IFPI等組織, 固然也沒有版權等問題, 所以大部份的粵語流行曲都是隨手拈來的將國語時代曲, 歐西流行曲以至粵曲小調等音樂填上歌詞, 總之但求填滿一首歌交差便成, 末流所及即衍生了粗製濫造的問題; 另外由於舊曲一編再編, 做成一曲多版本的悄情况.  至於內容方面, 粵語流行曲以諧趣小曲為主, 部份加插一些警世意味, 其中以東方貓王鄭君綿的粵語流行曲可謂其中的表表者, 但發展至70年代中期, 這類型的粵語流行曲已不再予人以新鮮的感覺, 加上香港的經濟騰飛, 受教育的水準提升, 出現如許冠傑, 關正傑等新派歌手, 唱的是現今CANTONESE POP 的雛形, 老派的粵語流行曲遂逐漸式微以至消失. 

 

若問我為甚麼喜歡粵語流行曲, 我想那是另類的粵語長片情意結.  如果說粵語長片伴著我們成長, 那末粵語流行曲又何獨不然?  事實上粵語流行曲對我在某方面來多了一重意義, 此話怎講?  6/70年代收音機在[前電視年代]主導著一般市民的日常娛樂生活, 不論何時地,身在何處, 你都能聽到收音機的廣播, 除了廣受歡迎的[天空小說]外, 人們也愛寫信到電臺點唱 (最為人津津樂道的當然要算是商業電臺的[祝壽祝婚點播]), 而廣播員(那時候還沒有DJ的稱謂) 最流行的做法則是捧著十幾隻唱碟入播音室, 然後揀選其中受歡迎的輪流播送, 其中加插一些介紹/訪問等環節, 擾擾攘攘的又完成一個節目.  播歌的頻率既高, 久而久之粵語流行曲便深深的印在腦海裡, 從此落地生根. 

 

粵語流行曲對我還有另一重個人體會和經歷, 那便是經常受到身邊周圍的人不斷地[人肉重播]的轟炸, 在如此密集的催谷下, 歌曲和歌詞又焉能不深深的嵌入心坎中? 我記得有一段時間住在父親寫字樓的隔隣, 所以經常有事沒事的往那邊跑, 跟他的伙計玩.  事實上父親的伙計中也不缺小伙子, 有幾個和我也頗玩得來, 有時候走過去看見他們躺在碌架床上, 一邊刨馬/狗經, 一邊在哼著 ”佢個名叫阿珍,我愛佢珍珠都冇咁真”, “扮靚仔, 摩囉街舊鞋唔係曳, 美國製” 或者是 ” 擰冧六 長衫六 , 高腳七 一隻大頭六, 二三更瓜老襯 輸到我木”, 那時候聽在耳裏覺得很新奇有趣, 但卻從來都無法知曉整首歌的內容 (因為唱的人也只懂這三幾句), 而那個年代社會風氣甚為保守, 電臺對某些歌詞較為鄙俗的歌(如”行快啲啦”, “詐肚痛”) 好像有些顧忌, 甚少播出, 所以有幾首[至愛]我直至很多年後才有機會一窺全貌(即完完整整的聽完整首歌), 和知道歌詞的內容.

 

下面我揀選了十幾首當年紅極一時的粵語流行曲與你分享, 我相後信你該聽過其中部份幾首 (即使不是原唱, 你也很可能在近年的港產片中聽到不同版本的翻唱).  細嚼著歌詞,  你會感覺到歲月在嘴角裏流轉, 柔情在意念中盪漾.

 

(1) 星星愛月亮

 

原曲係台語歌[南都之夜], 許多人認識這調子是因為葛蘭的國語時代曲“台灣小調” 或者是譚炳文﹑盧冠廷﹑李克勤等人主唱過的粵語流行曲“舊歡如夢”; 不過眾個粵語版本中﹐我最喜愛的仍是“星星愛月亮”.   除了因為歌詞較優美外﹐另一個主要原因是此曲的開端是一段鋼琴引子, 頗有點藝術歌曲的味道﹐非常引人入勝.  “星星愛月亮” 原收錄於1961年的 ”和聲好女兒”大碟內.

 

“星星愛月亮” 由周聰和許艷秋主唱.  周聰被譽為“播音皇帝”, 也是“粵語流行曲之父”.  周聰於廣州出生, 父親是公務員﹐他能寫能曲能唱﹐50年代初本是夜總會樂隊領班﹐同期由呂文成介紹﹐遂開始替唱片公司寫詞﹐50年代中期起穿梭於香港電台與麗的呼聲﹐聲音兩邊走﹐1959年商業電台啟播, 他為多套廣播劇譜寫主題曲﹐深受大眾歡迎.  周聰用詞文雅﹐不落鄙俗粗野﹐主要抒寫一些悲歡離合﹑風花雪月的主題﹐有時也涉及勵志的題材.  他最為人熟悉的是他温文爾雅的歌聲和唱法.   周聰在商業電台工作至80年代尾才退休, 1993年離世.  許艷秋有甜美歌后的美譽﹐但美中不足的是唱腔帶著濃烈的粵曲味道, 與粵語流行曲的唱法有點格格不入.

 
詞: 周聰

曲: 許石

主唱: 周聰 / 許艷秋

(女) 星月雙輝照天上 夜色倍明亮
(男) 妹你又以比月一樣 青春皎潔又漂亮
(女) 哥哥心中是否愛明亮
(男) 低訴我心像星一樣 星星愛月亮
(女) 嬌艷鮮花翠坡上 蝶影雙雙
(男) 妹美貌似鮮花一樣 青春嬌美又漂亮
(女) 哥哥心中未知你是何樣
(男) 低說我心亦一樣 相依永共偎傍
(女) 星月光輝照天上 夜色更明亮
(男) 妹你又似比月一樣 光輝皎潔又漂亮
(女) 哥哥好比夜星照明亮
(合) 星與月照影在天上 星星愛月亮

 

 

(2) 家和萬事興/一枝竹仔

 

此曲本是1956年由張瑛主演的電影”家和萬事興”中的插曲.

 

曲 : 周聰

詞 : 周聰

主唱: 周聰/梁靜

一枝竹會易折彎
幾枝竹一扎斷節難
孤掌莫持依
團結方可免禍患

花雖好要蝶滿枝
月雖皎潔有未滿時
孤掌莫持依
團結方可幹大事

大眾合作好相處
千斤一擔亦不遲
齊集勤力無猜忌
一切都好順利 嘿

 

(3) 扮靚仔

 

扮靚仔是1961 年由鄭君綿灌錄, 唱至街知巷聞的諧趣粵語流行曲.  此曲由Paul Anka的 “I love you baby”譜上歌詞, 可見當時中詞西曲甚為流行.  細味歌詞, 才知道原來那個年代流行穿二手貨 (囉街舊鞋唔係曳, 美國製), 而由於社會普遍甚為貧窮, 所以一般人都靠”充”來装濶, 以達至”追女仔”或者是”做成生意”的目的.  (題外話: 你知道”石罅米”的意思嗎?)

 

曲 :  Paul Anka的 “I love you baby”
詞 : 胡文森

主唱: 鄭君綿

扮靚仔 摩囉街舊鞋唔係曳 美國製
領呔摩登花式真美麗 扮靚仔
西裝豆泥唔係貴 咪當曳
人人話佢名貴

起勢充硬闊少咬批 大沓老西
鬼子佬屐夠威 查實鞋爛無底
來頭贈閉最架勢 闊手段 我學齊
實情我最豆泥

扮靚仔 絲巾預防流鼻涕 摺到細
灑 D 香水清香兼巍麗 扮靚仔
恤衫雜牌唔係貴 熨到靚
人人話佢名貴

起勢充硬闊少靚仔 大沓老西
皆因為女仔 錢淨埋亦要洗
由人話我石罅米 你有你話 無問題
為情最無問題

 

(4) 賭仔自嘆

 

這是東方貓王鄭君綿最著名的的首本經典金曲, 可謂百聽不厭. 他在不同的唱片公司都灌錄過這首歌, 所以賭仔自嘆有多個版本.  此曲是以推牌九為背景, 所以曲中嵌入很多推牌九的術話語, 如擰冧六,  長衫六 , 高腳七 大頭六等, 不懂牌九的人可能會聽得一頭霧水, 簡而言之那些牌在牌九來說其實是很蹩腳的牌. 

 

鄭君綿當年灌錄了很多粵語流行曲, 數量之大, 可說是粵語流行曲之王. 他主唱的粵語流行曲有諧趣的, 有情愛的, 也有警世的, 賭仔自嘆可算是後者.  談粵語流行曲, 怎可不介紹鄭君綿? 鄭君綿是廣東寶安人﹐家境頗富裕﹐父親是“東區遊樂場” 的老闆﹐而鄭君綿則肄業於香港華仁書院﹐是個典型的”番書仔”.  他早年曾演話劇﹑又在電台任播音員﹑另外又於粵劇界演出, 絕對是一位全能藝人.  當然他最為人熟悉的是他所灌錄的粵語流行曲唱片及拍電影等﹐他在電影裏通都是常扮演阿飛或歹角的角色, 至於在唱粵語流行曲方面, 他以獨特的[綿]腔獨樹一幟, 稱霸了5,60年代的粵語歌壇.  60年代尾鄭君綿投身電視圈﹐成為大型綜合節目“歡樂今宵”的開國功臣.  鄭君綿於1994年歿於深圳, 享年77歲. 

 

曲 : 載歌載舞 (胡文森)

詞﹕佚名

主唱: 鄭君綿

擰冧六 長衫六
高腳七 一隻大頭六
二三更瓜老襯 輸到我木
日夜賭場嚟侍候 生意唔撈我兩頭游
我嘅錢輸晒咯 真係無修
食更青頂肚癮揾菜頭
畫Cheque又怕佢彈番轉頭
問人地借佢又擰吓擰頭
籌碼部佢又詐嬲
兼出馬頭把本收
爛手錶都當晒 磡磞爛無茂
祖先不開眼 令我好擔憂
我從前知道係咁醜 我都唔使踎街頭

 

(5) 係唔係嘅啫

 

此曲灌錄於1964年, 由兩首歌組合而成, 中段是黎文所與鍾麗蓉所唱的“小冤家” 旋律﹐首尾則為王次龍﹑韓蘭根﹑殷秀岑﹑藍蘋 (江青) 等合唱的“王老五”. 

曲﹕任光 / 佚名

詞﹕佚名

主唱: 鄭君綿 /鄭幗寶
 

(男唱) 你條腰 真妙既 齊共起舞款擺若條蛇
(女唱) 你大話呃我想乜者 賣吓相思 黎靠借呢 挨冬撈你做乜野
(男唱) 你艷麗似天仙應份做世姐
(女唱) 吓 係時係既者
(男唱) 實堪許配呢個白面少爺
(女唱) 吓 係時係既者
(男唱) 今晚約定無謂辭謝 一心請你去消夜
(女唱) 咁去邊者
(男唱) 都話去消夜
(女唱) 有車咩
(男唱) 買架新賓士 正斗車 共試新野
(女唱) 真開心 你係得既

(男唱) 黎到呢間太白樓 蘭麝咁香真少有 裝飾真靚溜 嘉賓最上流
(女唱) 華貴大方最上流 同聚喜得知心友 今宵真有幸 花開結並頭
(男唱) 結婚最緊要講究 豪華場面少有
(女唱) 我聽見心裡好笑 佢為人絕無知醜
(男唱) 黎叻大家飲杯酒 牛脷炸雞真講究
(女唱) 唔 我要燒鵲脷 飲香檳正合喉

(男唱) 你與我定婚千樣有 人地想嫁我都擰頭
(女唱) 哼 實在你點會咁不知醜 賣錯相思
向人地猛挑誘 我不應該向你賣生藕
(男唱) 送你別墅一間等第日接收
(女唱) 吓 係時係既者
(男唱) 去日本歐美蜜月旅遊
(女唱) 吓 係時係既者
(男唱) 包你快樂如做皇后 心心相印過春秋
(女唱) 你靠把口 不靠雙手 你有乜收
(男唱) 你不必憂我有租收 外匯都有
(女唱) 一於走 無藥可救
(男白) 係唔係既者

 

 

(6) 落街無錢買麵包

 

鄭君綿於1965年為美聲唱片的錄音﹐收錄於同名EP內﹐原調則是古曲“妝台秋思”, 香港人熟悉這首曲當然是因為任白戲寶帝女花之香夭

 

曲: 妝臺秋思 /帝女花之香夭

詞: 佚名

主唱: 鄭君綿

落街無錢買麵包　靠賒我又怕被人鬧
肚飢似隻餓貓　受了飢寒我開聲喊
皆因肚中飢餓　我裡面似係戰鼓敲
最衰平日結交埋一班損友任性來胡鬧

亞爹勸極我完全唔受教
皆因懶　趕出校　我o既頭毛電到以花棚
整得週身衰格扮到唔似男人貌

錢一多週身咬　總之係猛洗
若無錢個陣　返家中即刻抄
搵衫當　拎氈賣　更糾黨惹事去打交
更好尊車大砲　平素學到品質撈咁攪
我信用已失　又怕我難容在世
必要自少應當管教
奉勸人人萬大要關防
免使子女學我咁胡鬧

 

 

(7) 詐肚痛

 

此曲是1961年版本, 由諧曲泰斗鄧寄塵和 ”澳門之寶” 細碧鄭碧影主唱.  鄧寄塵唱諧曲別樹一幟, 他以聽似拖泥帶水, 其實悠揚悅耳的唱腔與鄭君綿同霸5,60年代的粵語流行曲歌壇.  此曲其實頗為[無厘頭], 內容是男女兩人對罵, 而且用語頗為惡毒, 惟亦十分幽默抵死, 在60年代甚為罕見.  此曲在”新不了情” 中由JOE JR. 和袁詠儀(該有人幕後為她代唱) 翻唱過.

 

曲 : Rosendo Ruiz Jr 的Tea for two cha chas /

詞 : 胡文森

主唱 : 鄧寄塵/鄭碧影

女：你詐肚痛　去廁所排長龍　詐詐諦　做工夫詐肚痛
男：你去買餸　又吼啱蛇王蟲　你兩個　拍起拖四處貢
女：你正衰公　一枝公　正孤獨蟲
男：唔在怕　我夠靚　做人輕鬆
女：你似足　一碌竹　一生冇用
男：大疊水　週身西紙刮左粗龍
女：你無貴格　鼻哥尖時時紅
男：正貴格　馬票都會買中
女：我咒你　病躝疸成年窮
男：我咒你　手生瘡夾眼痛

女：你詐肚痛　去廁所排長龍　詐詐諦　做工夫詐肚痛
男：你去買餸　又吼啱蛇王蟲　你兩個　拍起拖四處貢
女：你耳兜風　週身郁　眼圈又紅
男：你唇上竅　夾斜膊　擰頭偃胸
女：你腳瓜浪　生孖瘡　一個個烘
男：病壞豬　週身都腫似足碌粽
女：我發惡　撞起火無人同
男：當臭四　我識穿你個櫳
女：我摑你　亂巴冚玲玲瓏
男：你掂我　當偷雞咪靠碰

 

 

(8) 飛哥跌落渠坑

 

此曲本是1958電影”兩傻遊天堂” 的插曲, 由鄭君綿 , 鄧寄塵和李寶瑩主唱. 50年代末期,由於歐西歌曲文化入侵, 加上香港人的教育水準普遍提升, 對歌詞庸俗及題材侷限的粵語流行曲產生厭倦感, 故此很快因不合時宜而日暮途窮.   能在市場立足就衹有粵語電影插曲唱片.  那年頭武俠神怪 、青春歌舞、愛情、粵劇電影均如工廠流水作業 (當時將以 [七日鮮] 形容七天內完成整套電影制作), 而部份電影附有主題或插曲, 惟歌曲及歌詞急就章 , 有些甚而是拍攝中收音.  效果當然不理想,  故此這些電影原聲唱片乏善可陳,  卻造就很多幕前幕後主唱的歌者 如：陳維玲、冼劍麗、 崔妙芝、李寶瑩、鳴茜等.

 

 

曲: Three coins in a fountain

詞: 佚名

主唱: 鄭君綿/ 鄧寄塵/ 李寶瑩

 

男)飛哥跌落坑渠 飛女睇見流淚
(女)似醬鴨臭腥攻鼻 飛女夾硬扶住佢
(男)飛哥跌落坑渠 飛女心痛流淚
(女)臭夾壓果 d 滋味 飛女索著唔順氣
(男)索野索著 ammonia
(男)跳舞好似隻彭其
(女)應該跌落坑渠 百厭終歸會跌跛
(男)猛咁跳盞僕崩鼻
(男)一交撻直唔順氣
(合)難下氣難下氣難下氣

 

 

(9) 才子佳人

 

曲 : 來自”康定情歌” “馬車伕之戀” ”迎春花”

詞:  佚名

主唱: 鄭君綿/ 鄭碧影

 

(女唱) 擰柳腰好似蘇菲亞羅蘭 又似惹火寶烈吉妲
佛見到 都會起大痰 花靚仔想到心爛
嫩坑中坑都無限 No Money一概斬纜
(男唱) 我係大闊佬 派駕雪佛蘭 袋美金都起碼一萬
伴女人 好似加利格蘭 心郁郁 想錫一啖
(女唱) 喂 慢慢 先生 摩登百萬 飲杯先兼吃餐飯
(男白) 同你遊車河 (女白) No
(男白) 同你跳番Part舞 (女白) No 最好去食野嘞
(男白) No (女白) 食咖哩雞
(男白) No (女白) 哼 樣樣都話No
(男唱) 樣樣我吃慣 攬腰好過吃飯 現在拍拖 等我擝纜
(女唱) 拖砵有拖例 傍水先至駁纜 任你拖喇要兩萬
(男唱) OK 多多有照寶 先拖再傍 我會贈送多兩萬
(女白) 真嘅 (男白) 係
(女唱) 係我一於照辦 睜開風騷柳眼 拍拖拍緊啲 咪斷纜 去咯
(女唱) 等我拖你小心 慌你跌落泥坋
(男唱) 大眾小心 兩家拍硬 駛乜慌跌 我地行慢
(女唱) 攰夾汗流 踱咁遠路程 我實在不習慣
(男唱) 用私家車 砵一聲 車你去中上環
(女唱) 個啲貨物真合眼
(男唱) 嘩 襯佢岳頭四邊望 靜靜鬆 買親嘅就梗一頸血 確係寧願斬斷條纜

 

 

(10) 行快啲啦

”行快啲啦” 和 ”一心想玉人”是1965年意外地從新加坡流入的單曲唱片.  歌曲改編自Beatles的兩首熱門流行歌曲﹐由上官流雲主唱.  由於歌曲己然大熱, 加上歌曲生動鬼馬, 因此甚受港人歡迎.  歌詞 "行快啲啦喂"及"亞珍已經嫁咗人" 至今仍成為土生土長港人的口頭禪.

說實話上官流雲的唱功真的不怎麼樣值得恭維, 其唱法近似唸口璜﹐毫無抑揚頓挫之感, 但"行快啲啦" 及"一心想玉人" 卻在香港樂壇中有著重要的地位﹐也算是粵語流行歌曲歷史上的一個異數.  兩曲同是收錄自1965年馬標唱片"行快啲啦"EP內.

 

曲: 1963年Beatles的 ”Can't Buy Me Love” by
J. Lennon / P. McCartney

詞 : 劉大道

主唱: 上官流雲

行快啲啦喂 喇喂 行快啲啦喂
我招呼果個丁老八 佢就夠肥夠辣塌
週身鮮癩一撻撻 佢學啲狂人披頭髮
一身污糟 不怕失禮 把口鬼咁滑
睇真果對腳似鴨 佢條腰肥褲又狹
痞響街邊揾野擦 佢唔食燒鵝食燒鴨
切的又燒 斬隻豬腳 蝦碌點芥辣

行快啲啦喂 一於走去揾野擦
行快啲啦喂 大注挾喇
死咯一對燒乳鴿 佢話最平四元八
擦左呢餐揾拖拍 佢就連咀都唔抹
幾蚊身家 一晚輸晒 皆因中發白
行快啲啦喂 喇喂 行快啲啦喂

 

 

(11) 一心想玉人

 

曲: 1963年Beatles的 “I Saw Her Standing There” by J. Lennon / P. McCartney

詞 : 劉大道

主唱: 上官流雲

佢成日對我鬼咁親　講真就冇句真
睇佢咁斯文　真係想到我失魂
談情共說愛　認真風韻
噢！我一心想玉人

呢　佢個名叫阿珍　我愛佢　珍珠都冇咁真
睇佢咁銷魂　著條鴛鴦繡花裙
郎情共妾意　心心相印
噢！我一心想玉人

學唱相思引　大跳周身 UN
夢裡高聲嗌　叫句阿珍　唔......
相親愛 不變心
托亞三姑去說親
佢話呢趟弊　亞珍已經嫁咗人

情人實已嫁 　心都灰哂
噢！一於走去轉個運
噢！一於走去轉個運

 

 

(12) 哥仔靚

 

此曲調寄廣東音樂“餓馬搖鈴” ﹐歌詞以當年的社會尺度來說可謂十分大膽﹐早一輩的人視之為淫歌﹐因為此曲直接把女人對男人示愛的心情赤裸裸的表露無遺.  此曲原收錄於1959年“一路佳景” 大碟內﹐但最流行的卻是李燕萍 (即無線第一代處境喜劇”73”中做劉天賜的媽咪那位女演員) 所唱的版本, 後來梁家輝在王家衛的電影 ”東成西就” 中亦唱過.

曲﹕餓馬搖鈴(佚名)

詞﹕朱頂鶴

主唱: 李燕萍

哥仔靚靚得妙
哥仔靚咯引動我思潮
我含情帶笑把眼角做介紹
還望哥你把我來瞧

哥仔靚靚得妙
潘安見了 (哥仔靚咯) 都要讓你擔摽豐雅別饒
揾通世界咁靚嘅男人確係少
我為你病染單思愛戀 險送命一條
思君心更焦 三魂都被你勾了咯

個種痴心執筆亦難描 一見左見左你就情醉心動搖
願作同林鳥 長慰我寂寥
我要哥仔你把我願消 不忍我身葬於愛河潮
我認你係我心肝你都未曉
叫一句我地有情哥仔
尋歡樂最緊要咯
我唱共彈琴你吹蕭
今生永久兩家快樂逍遙
真係其樂不少恩義情同鴛鳥
只要多歡笑 跳舞重妙
又睇下影戲咯 中國調真夠俏
情詞彈來妾嬌郎更嬌 天下有情人求祈心照咯

 

 

(13) 紫娟花之戀

 

紫娟花之戀由周聰﹑呂紅合唱, 年份不詳﹐原是印尼歌曲“峇里島”﹐潘秀瓊首錄於巴樂風唱片﹐其後加盟百代唱片再度灌錄. 此曲柔揚悅耳, 不論國, 粵語版都曾風行一時.

 

周聰和呂文成的千金呂紅合作過很多用小曲填上廣東詞的唱片,呂紅在和聲﹑鑽石唱片都灌錄了不少歌曲﹐1952年和聲唱片出版的第一批粵語流行曲唱片﹐便大部份由她主唱﹐是第一代粵語流行曲的歌手.  呂的丈夫是香港早年的琵琶名家呂培源的胞兄呂振原﹐兩夫婦為人十分低調, 自移民外地後即絕跡於本地樂壇. 

 

談粵語流行曲怎可忽略呂文成? 呂文成是著名的作曲家﹑演奏家和演唱家﹐擅唱子喉﹐幼時隨父親旅居上海﹐20年代已開始灌錄粵樂/粵曲唱片﹐後移居香港﹐繼續從事音樂事業﹐單在香港時期﹐便灌錄了超逾100張唱片.  在廣東音樂方面﹐他的作品有“平湖秋月”﹑“步步高”﹑“醒獅”等.  呂文成對粵語流行曲的貢獻在於發掘了周聰, 把他介紹給和聲唱片公司﹐周氏力求遠離粵劇的曲式或諧趣的歌詞﹐並大量改編國語時代曲或歐西歌曲﹐致令粵語歌曲得以全面發展, 值得留意的是當時這批歌曲不是為本地市場﹐而是為星馬一帶而設的.

 

曲﹕佚名

詞﹕周聰

主唱: 周聰/呂紅

 

(女) 自那天共你船上初見面 才是最快樂無牽掛
(男) 兩人默語向坐對月光下 妳好比一朵雨中花
(女) 願每天共你成日都見面 才是最快樂無牽掛
(男) 我曾為你留下了紫娟花 紫娟花開相見歡也
(女) 我只怕霧雨中 方向迷失會命如花
(男) 只要共你為伴 常對住同看天空晚霞
(合) 願每天共你成日都見面 才是最快樂無牽掛
(合) 兩人默語同伴月光下 紫娟花開相見歡也
(女) 我心已是愛哥 一旦離開我命如花
(男) 不會共你離別 何故自煩惱心緒以亂麻
(合) 願每天共你成日都見面 才是最快樂無牽掛
(合) 兩人默語同伴對月光下 紫娟花開相見歡也