日前和一班老友飯聚，談起各自最喜歡的食物，這班老友經過半生打拼，雖然生活不算十分富裕，但經濟上可謂頗充為富足，幾十年下來所吃過的山珍海味相信不在少數，但他們所列舉最喜愛的食物，竟然是豬油炒田螺，或者街邊檔糯米飯，可想而知，人到了某個年紀，其實所謂最喜愛的食物，並不一定要甚麼名貴的食材，或者花俏的烹飪技巧，而是好像聽歌一樣，在最適當的時候，吃到最適當的食物，如此這般這些食物的味道便會深深的印入腦海裏面，幾十年不變。以下我列舉一些現在已絕跡（或者已改變售賣方式以至味道）的食品，看看能不能引起你美好的童年回憶，甚至讓你有味蕾大動的感覺。（以下食物品種排名不分先後，亦不分價錢貴賤, 喜好與否端視乎個人經歷和心情，各位可逕自隨意增刪此名單）.
(1) 和味龍, 和味龍其實即係水曱甴，六七十年代好多士多都有得賣，其做法多數是先灼後炒，或者先灼後炸，味道濃郁，估計係落咗好重嘅五香粉同埋調味料醃制所致. 除和味龍外, 還有炸蟬, 不過我未食過.
(2) 禾花雀,禾花雀喺五六十年代並唔係啲好珍奇嘅食品，每年大概中秋前後，便是禾花雀嘅季節，酒樓會即會大肆宣傳, 並美其名為天上人參。禾花雀嘅做法多數係稍作腌製，然後塞條潤腸入禾花雀肚內再作煎炸，味道甘香可口，惟近十年來禾花雀已被列為瀕臨絕種生物，故此早已絕跡在食肆桌上.
(3) 臭豆腐，而家臭豆腐好似已成為各大地方菜的上賓，你要去川菜，上海菜等菜館才食得到，而且做法五花八門，但已失卻原來嘅韻味。上世紀九十年代我仲見到有人推住車仔周街賣臭豆腐，賣臭豆腐其實唔需要叫賣，好此道者老遠聞到臭味都會逐臭而來。十幾年前仲有小舖賣臭豆腐（通菜街尾便有一間，不過好像已經結業），惟近年街邊檔鮮有臭豆腐賣。臭豆腐最佳嘅食法就係手捧一磚剛炸起嘅臭豆腐，塗上一大片甜醬和辣醬，大口咬落去，嗰種滋味真係不為外人所道.
(4)真正推車當豬皮豬紅油麵，我食過最好嘅豬紅豬皮係七十年代水街口嘅車仔檔，嗰個車仔佬提供嘅食物種類好少，記憶之中只有豬紅豬皮，魚蛋同埋油麪。讀中學嘅時候放午飯，有時為咗趕時間會幫襯佢食碗豬紅豬皮麵，佢嘅豬紅滑不留口，豬皮則爽脆入味，誇張啲講，佢嘅出品係我食過最好嘅豬紅豬皮，絕對無之一。
(5) 真正灌湯餃，真正嘅灌湯餃係一大個乾身嘅餃子，用筷子拆開後湯汁四溢，而唔係而家嘅流行嘅湯浸餃.
(6) 渡海小輪餐蛋麵，其實呢啲餐蛋麵一啲都唔好食，食嘅係環境同埋情調而已.
(7) 七彩蝦條，傳統百力滋，甘大滋, 皮禮士糖, 均為童年經典零食.
(8) 結連軟糖，大白兔糖，花街朱古力. 我不嬲都唔係咁鍾意食糖同埋朱古力，不過呢啲國產糖果通常都係新年去拜年嘅時候,啲人攞出嚟奉客，所以每次見到呢啲糖/朱古力都有種喜氣洋洋嘅感覺.
(9) 白雲汽水，印象中好似只係飲過一兩次，感覺味道好淡，加上又冇乜氣，口感同可樂甚至屈臣氏汽水都相差甚遠，當然揀白雲汽水係因為價錢便宜之故. 另外仲有歌喇汽水，沙士汽水, 但味道似咳藥水, 感覺好難飲.
(10)炸油滋，其做法係將麵粉調成的粉漿倒入特製的杯狀器，再加五和粉、胡椒粉、糖、鹽、蔴油調味的蘿蔔絲、蝦米、芫茜，然後以粉漿覆蓋後炸熟而成。炸油滋曾經喺市面消失咗一段好長嘅時間，但近年喺呢邊小食檔都經常搵得到，但問題係擺賣嘅大多數都係已經炸好了一段時間嘅製成品，凍冰冰，軟冧冧，毫無口感。童年嘅時候我係企喺檔口買啱啱煎好嗰個，入口嘅時候熱辣辣，脆卜卜，認真滋味無窮.
(11)真正手打九棍魚蛋, 五，六十年代周街都係魚蛋粉檔，老板會將新鮮劏好嘅九棍魚用麻油, 胡椒粉同埋鹽醃好，再用刀剁碎，然後好似武林高手練鐵砂掌咁不斷用手攪勻魚肉，期間不斷反覆撻落個大盤到，以期做到鬆軟爽口. 我靚仔嘅時候窮極無聊，會企喺度睇老闆撻魚蛋，如此這般便可消磨半個下晝. 另外魚蛋粉檔嘅即炸魚皮又係一絕, 不過記憶中好似不設外賣, 只供堂食.
(12) 舊版雀巢雪糕磚/雪山雪糕Mountain Cream. 唔知點解而家好似冇晒雪山雪糕呢個品牌。雪山雪糕當年可以話係同牛奶公司雪糕平分天下，基本上所有普通款式嘅雪糕同雪條，雪山都會出產.有返咁上下年紀嘅人，都會記得雪山雪糕這廣告Slogan :「雪山雪糕Mountain Cream，食過心都甜」.
(13) 魚腸蒸旦，某啲老式嘅酒樓仲有此菜式奉客，但唔知點解我總係覺得而家嘅魚腸蒸蛋嘅魚腸有啲苦,唔知係咪洗魚腸嘅時候洗得唔乾淨，或者醃製過程出錯. 另外早前我喺某酒樓食過蠔汁炆柚皮，又係完全冇六, 七十年代嘅風味.
(14) 蒸砵仔禾蟲，聽落好似好有啲得人驚，其實禾蟲一啲味都冇，食落嘅味道好似阿媽整嘅豬肉蒸蛋咁，主要只係食到蒸蛋嘅味道.
(15) 金錢雞，鴨腳包，其實金錢雞同鴨腳包裏便嘅餡料，譬如雞肝同雞腎都係啲下欄嘢，燒臘師傅將呢啲平價物品連同肥豬肉，鴨腳包埋一切燒製，竟然成為名菜，真係不可思議。不過話返回頭，鴨腳包我麻麻，但整得靚嘅金錢雞的確非常美味，肥豬肉淋牙香，雞肝如果醃得入味，則鬆脆可口，確係人間美味（當然大前提係唔怕食完之後提升閣下嘅膽固醇）.
(16) 淮山雞紥 ，雞紥而家好多酒樓都有，不過大多數都係棉花雞，或者北菇雞，即係魚肚或者豬皮加冬菇蒸雞件，但老式酒樓會用淮山包住雞肉蒸，我個人就覺得塊淮山好乾，而且冇乜味，但呢啲就係老式點心嘅特色. 講起老式點心, 點能夠少得雞球大包?雞球大包而家喺中央酒樓同埋蓮香居仲食得到, 感覺上蓮香居畧勝一籌.
(17) 芝麻卷，又稱菲林卷,以其外形黑色以及卷埋一舊，好似菲林咁樣，除咗芝麻卷，某啲酒樓仲會提供可樂卷, 橙汁卷.
(18) 砵仔糕，花奶啫喱.
(19) 蓮花杯，鳯仙雪條，孖條，童年夢寐以求嘅美食. 我靚仔嘅時候有個錯覺，以為孖條抵食，一條雪條價錢，可以有兩條雪條嘅享受，而且可以喺中間搣開兩個人食，真係無敵性價比，後來先至發覺老襯，孖條因為中間凹咗落去，其份量比一般雪條仲細，因此仲更加唔抵. 依家諗返起，童稚無知真係幾可愛.
(20) 戲院手卷棉花糖，爆谷，這些零食一般要喺戲院嘅小食部買，爆谷脆卜卜，熱辣辣，靚仔嘅時候覺得好好味，至於棉花棒就有啲搵笨，咬落其實只不過係發脹咗嘅砂糖，一味得個甜字，不過淨係揸住就已經覺得好幸福.
(21) 戲院門口煨魷魚，由炭煨出嚟嘅魷魚，味道零舍唔同，食之前最緊要抹上辣豉油，真係其味無窮.
(22) 鹹濕車仔檔沙葛，酸薑，鹹菜，蕎頭，食呢啲鹹濕嘢，就梗係要搽芥辣，辣到上頭，味蕾又酸又辣，咁至夠刺激.
(23) 新填地豉椒炒蜆，豬油炒田螺，碗仔翅,未食過，又點算係六七十年代長大嘅細路仔. 唔好忘記仲有凍到頭赤嘅椰汁.
(24) 中環春回堂苦到嗌救命嘅廿四味涼茶.
(25) 卑路乍街阿婆車仔檔熱辣辣嘅糯米飯.
(26) 域多利道八達書院門口矮仔佬滷味檔嘅橙色墨魚同埋雞腳，仲有豬頭肉同埋雞腎.
(27) 堅尼地城爹核士街香園咖啡檔嘅炭爐絲襪奶茶，外加炭烘多士以及西多，仲有後期用可樂樽裝嘅原味樽裝奶茶.
(28) 西豪酒樓逢星期日新鮮出爐嘅兩毫子三個雞尾同埋菠蘿包.
(29) 陳李濟門口只在夜晚才營業嘅雲吞麵檔.
(30) 位於北街同埋吉席街交界嘅平香，佢哋嘅新鮮滾熱辣啱啱煎好嘅生煎牛肉包，童年時覺得係天下美食之最，加埋杯凍冰冰嘅豆漿，絕對係星期日早餐首選.
(31)加多近街腸粉佬所煎嘅腸粉，外脆內軟，加埋啲芝麻醬同埋甜醬，至今仍然回味無窮，另外建文街（今天已消失在泓都豪宅內）曾經有兩公婆獨沽一味賣魷魚煎腸粉，呢個fusion可謂天下無雙; 先煎香腸粉，加幾條水魷魚入鑊裏面炒，再淋上一框豉油，香脆，爽口，唔知點解今日冇人提供呢種食品，赤好奇怪點解當年佢哋會諗到呢個組合?
(32) 冷糕，叫得做冷糕，都諗得到係起緣於廣東潮州嘅特色小食，外層塊餅似，Pizza, 入面夾芝麻、花生碎、椰絲、同砂糖餡，對摺切成三角形賣，又係嗰句，要熱辣辣先至好食.
(33) 龍鬚糖, 克力架餅乾夾麥芽糖, 以及即場開鑿開嘅叮叮糖.
(34) 車仔檔即炸大腸，識食嘅就一定要食腸頭，當然仲要新鮮滾熱辣炸起嗰塊，然後塗滿芥辣，一啖咬落去，絕對係人間美味.
(35) 即炸乒乓波大小嘅魚蛋.
(36) 老式冰室特色飲品，和尚跳海，黑牛，唂咕，阿華田, 好立克, 同埋細路仔鴛鴦.
(37) 面盆涼粉，雞蛋杯大菜糕，手鎅大菜糕.
(38) 老媽子過年整嘅豆沙角.
(39) 送中藥嘅山楂餅同埋嘉應子.
(40) 單車雪糕佬硬過石頭嘅雪杬，雪木瓜，雪菠蘿，雪李, 雪油柑子.
(41) 糖蔥餅，梳打餅夾麥芽糖，我記得六十年代卑路乍街尾域多利道頭，八達學校門口有個糖蔥餅佬有生意頭腦，除咗賣糖蔥餅外，仲加插賭博節目，豆零可以抽簽一次，如果抽出嚟嘅簽上面嘅點數超過某個數目，即獎糖蔥餅六件，有次我得到幸運之神眷顧，竟然抽中大獎，贏得六件糖蔥餅，卻又不敢帶糖蔥餅回家（怕老媽子追問點解一次過買咁多糖蔥餅), 惟有一口氣一個人幹掉六件糖蔥餅，結果把肚撐到不行，當晚完全吃不下晚飯.
(42) 傳統錦鹵雲吞，而家酒樓提供嘅錦鹵雲吞除咗必備嘅炸雲吞皮之外，其甜酸茨嘅內容簡單得可憐，傳統嘅錦鹵雲吞，碟甜酸茨裏面號稱有八珍，包括蝦仁，叉燒，雞肝，鮮魷，菠蘿，青椒，豬什等。早前我喺某連鎖酒樓叫碟錦鹵雲吞，佢竟然俾幾粒炸雲吞加個冇料嘅甜酸茨，真係令人啼笑皆非.
(43) 麵包皮/邊蘸糖水, 其實係好唔錯嘅下午茶, 唔信你試下?
(44) 豬油撈飯加鹹欖角，千祈唔好以為食豬油撈飯好陰功，其實熱辣辣一碗白飯， 放一匙羹豬油喺上邊，待其溶化後再繞上一框豉油，隨時都可以幹掉兩三碗白飯，如果加啲鹹菜或者鹹橄欖菜，碗飯就更加提升層次.
(45) 去澳門必買手信： 豬油糕，蟠桃菓.
(46) 蓮蓉西米布甸, 而家有唔少酒樓都會供應，我自己食過最深印象嘅蓮蓉布甸係當年老竇經常去西營盤嘅悅興盛酒樓，其時佢哋一班行家借開會嘅名義搞大食會/打牌,散會之後佢會捧一兜完全未食過嘅西米蓮蓉布甸返屋企俾我哋食，唔知點解拎到返嚟仍然熱辣辣，香噴噴，開心感覺除美味之外，仲有老竇嘅餘溫.
(47) 附送印水紙嘅吹波糖 , 我記得當年嘅印水紙有馬蘭奴李雲等摔角手，亦有二次世界大戰嘅新聞圖片，可惜幾經搬屋，已經全部散佚.
(48) 油炸糉, 油炸糉嘅起源都幾得意, 起初店舖賣煎糉，後來發現煎糉需時，客人一多便難以應付，靈機一觸之下便將糉放落鑊油炸，糉子竟然更香脆可口,而且油炸操作較煎更為便捷，故此不少小販索性提供炸糉，逐漸成為受歡迎嘅街頭小食.
