老照片憶舊情 3

有冇人認得呢度係邊度？呢度咪係新蒲崗啟德遊樂場門口囉，而家已經改建成為公園 

六十年代，一艘來往中環和離島嘅小輪駛經西環對出海面嘅小青洲，對面係當時仍然一片荒蕪嘅青衣島 

六十年代中由皇后大道中向東望，真報後面嘅恆昌象牙，今日好像仍然健在。當年呢段路好多金鋪，最出名嘅當然係張麗珍，但寶光，大成， 陳廣記等老字號都好有名，好受尊重。左邊遠處可以睇到得雲茶樓

六十年代由柯士甸道/佐敦道交界處向西望，左邊係倫敦戲院，我曾經喺倫敦睇過幾套戲，包括兩套鐵金剛。戲院而家已經拆卸並改建為倫敦廣場，後些少可以睇到剛結業嘅新樂酒店

六十年代中環砵典乍街，擺花街和威靈頓街交界處嘅士多，我真係好鍾意呢種氛圍，女人揹住個仔坐喺路邊，一班細路喺士多裏面看看這個，摸摸那個，即使冇錢買，有得睇吓，摸吓都係好嘅，絕對係我童年嘅寫照

六十年代九龍城向東望，左邊兩層高白色建築物是太子酒店。酒店本來打算招待啟德機場旅客,但是生意一直虧損,無奈之下唯有將面對旋處的低座重建為出租公寓Katherine Building，招待俄羅斯/烏克蘭難民. 70年代,酒店偶爾招待來自台灣的舞台表演隊和藝人. 80年代以來,酒店客房幾乎空置,剩下來的唯一收入來自餐飲業的租金(食為先).  高座在90年代被拆卸,並發展為Padek Palace

六十年代嘅干諾道中海旁，貨車停泊處即為當時嘅港澳碼頭，日間係碼頭/停車場，夜晚就搖身一變成為平民夜總會 

六十年代嘅北角英皇道，我真係好鍾意睇舊相裏面嘅招牌，從中可以發掘到好多當年嘅民生民情，右邊可以見到快活留產所嘅招牌，表示即使到咗60年代末，仍然有人寧願去流產所生仔，都唔去醫院。左邊遠些少可以見到同心攝影館，賣嘅係Ilford 菲林，我記得自己都用過呢隻菲林，唔知大家有冇印象? 佢上邊個上海456飯店嘅招牌就真係幾有創意，數字係用骰仔面顯示，真係幾有心思。再遠些少可以見到鹿鳴菜館嘅招牌，唔知同尖沙咀間鹿鳴春有冇關係？

六十年代嘅佐敦道碼頭，我對呢個碼頭最深刻嘅印象，就係靚仔嘅時候每憑農曆新年，都會坐船過海，到佐敦道碼頭轉巴士去黃大仙同埋深水埗向親戚拜年，所以每次經過呢度，都會不期然有種興奮同埋幸福嘅心情。巴士站對面矮牆油上各式各樣嘅廣告，呢個係當年常見嘅賣廣告手法，而何濟公就係經常出現喺呢啲廣告牆上邊，相信藥廠好捨得出錢買廣告之故

 五十年代中環德輔道中向東望，遠處可以見到中央街市，沿着皇后大道中百貨林立，有賣煙仔嘅，有銀行，又有賣𤴓頭，有錶行， 有當鋪，但我對兩間店舖嘅情況有啲唔明，奇香村明明係茶葉行，點解變成咖啡室？另外永利眼鏡，又何解升呢為貿易公司?真係令人費解

六十年代中環皇后大道中/雪廠街交界處，右邊應該係渣打銀行總行，呢個交通要衝設有交通亭，由交通警指揮交通，足見當時交通燈仍未十分盛行，交通樞紐仍交由人手操作同埋指揮

三十年代嘅德輔道中末端近金鐘道處，當年嘅建築物都甚有氣勢，睇落令人肅然起敬，左邊係銀行集中地，中銀，匯豐，渣打總行，右邊前方係高等法院，後方係舊太子行，加上中間新古典電車，構成一幅完美嘅舊中環圖  

我知道我貼過好多相同位置的舊相， （即由皇后大道中中央街市向西望），但這幅舊照的色彩着實太絢爛; 所有老友，三陽醬院，余仁生，廣州臘味，金菊園，陳春蘭都濟濟一堂，看着看着，心內便好像有一股暖流湧上心頭，不容我不貼出來 

六十年代干諾道中通往天星碼頭嘅行人隧道，左邊係皇后行， 60年代中被拆卸後，改建為文華酒店.   當年香港交通繁忙處仍有好多交通亭，由交通警指揮交通，我印象中好像直至70年代中交通亭才完全被交通燈取替

五十年代嘅軒尼詩道，右邊係大佛口，左邊最近鏡頭處係警察宿舍，遠一啲嘅白色兩層建築物係麗的呼聲總部大樓，1969年被拆卸改建為熙信大廈，熙信大廈喺2013年被拆卸，於2019年改建為One Hennessy

五十年代嘅灣仔軒尼詩道，右邊係舊循道衛理教堂，即今日嘅循道衛理大廈，左邊嘅四層高舊樓，而家亦已經改建為百利酒店

五十年代末嘅皇后大道中娛樂戲院，唔知點解舊相當中，皇后戲院嘅數量比較多，以呢個角度（由皇后大道中影向娛樂戲院）真係比較少.  左手邊可以見到模漢裁縫店，佢哋喺尖沙咀嗰間總店規模甚大，甚至有間模漢大廈，都算威威。前少少有間可以見到京華飯店，當時亦都係一間比較高級嘅飯店，係唔少有錢佬嘅飯堂

四十年代嘅金鐘道（當時仍然叫做皇后大道東）,左邊嘅軍營而家已經改建為統一中心等商業大廈，留意電車轉彎嗰個彎角相當陡峭，當年叫做死亡彎角， 經常發生撞車同埋翻車事故，50年代政府將路拉直，減少交通意外

六十年代由灣仔菲林明道/莊士敦道交界處，馮良記錶行門口向西望，最醒目吸睛嘅當然係龍門酒樓

位於彌敦道油麻地段嘅彌敦酒店.  照片係第一代嘅彌敦酒店, 故此睇上去似旅館多於酒店. 第一代彌敦酒店於 1930年開業, 可謂係九龍區酒店業嘅老前輩 (比早前結業嘅新樂酒店歷史還更悠久)。講起彌敦酒店有段故, 聽講當年彌敦酒店動工時, 曾經拆咗附近一座廟仔, 由於廟下埋有金塔，故此觸發咗啲靈異事件。1965年彌敦酒店被陸海通栠團收購, 並將酒店重建為逾廿層高嘅現代化酒店大廈 , 並經營至今

 五十年代灣仔莊士敦道近蘭杜街和中華循道會禮拜堂處，右邊可以見到好醒目嘅麗都戲院招牌.   麗都戲院嘅前身係中華戲院， 1952年開幕，1977年結業， 現址已改建為麗都大廈

六十年代嘅灣仔莊士敦道，鏡頭前呢幢舊樓被保留，發展成為飲食及商業中心，當然徒有形而無神，但係點都好過全幢拆咗佢，改建成為牙簽式單幢住宅

六十年代嘅灣仔皇后大道東，左邊係香港大舞台，拆卸後改建為合和中心

五六十年代生活條件簡陋，好多人喺街邊用街喉水同啲細路沖涼，我記得啱啱由澳門搬到香港，住喺中環閣麟街嘅唐樓嘅時候，老媽子都係喺廚房用膠盆同我沖涼，當時已經有四五歲，其實已經覺得好唔自然，但環境如此，冇辦法

 五十年代嘅銅鑼灣怡和街，拍攝者應該企喺樂聲戲院向西拍攝，左面係豪華戲院，中學時代我喺呢度留低唔少腳毛，週末去海軍球場踢完波後，經常會順便喺呢兩間戲院睇場戲先至返屋企，絕對美好嘅回憶   

位於干諾道中嘅Butterfield and Swire Building ，建於1897年，於1960年被拆卸，現址是友邦金融中心。此愛德華式建築物外觀巍峩壯麗，是典型的歐洲古典建築，拆卸了當然可惜，但Butterfield and Swire Building畢竟係商業建築物，連中環舊郵政總局都要被拆卸，改建為商業大廈，那麼Butterfield and Swire Building又怎能逃得過被拆卸的命運？又及;1974年太古洋行（Butterfield & Swire）為與英國母公司（即英國太古集團）統一名稱，更名為 John Swire & Sons，從此抹掉了Butterfield 這個名字

六十年代中環威靈頓街，當時嘅救火車原來係橙色嘅，好鮮艷搶眼 

五，六十年代非常流行嘅街邊涼粉檔，售賣唔止涼粉，仲有紅豆冰，菠蘿冰，雜果冰等凍飲，我哋呢輩腦友相信都幫襯唔少。小販先喺面盆里面撈一舊涼粉，切碎後放入高杯裏面，然後喺舊冰塊上面用冰刨刨一個大冰花出嚟，放入杯裏面，再澆一匝花奶或者糖水，一杯沁人心脾嘅涼粉便製作完成。當然大人們會告誡說咁樣喺街邊食冰凍飲品唔衛生，冰塊，泡在水中嘅涼粉都佈滿細菌，但係靚仔以食先，大菌食細菌，細菌當補品，冇有怕