舊物牽情 1

 

疫情嚴峻，無奈被迫困在家中，百無聊賴中收拾舊物，才發覺自己其實儲了不少各式各樣的收藏品，幾經思量下決定將藏品公諸同好，供各位品賞。野叟晒曝，這些都不是什麼值錢之物，但或許，一件舊物，會擊中好幾個有心事的人.   又及:  因家居狹窄，藏品收藏頗為凌亂，故此敝網址內藏品之展示亦無甚章法，祈為見諒 .

我對舊錢幣知識甚為膚淺，不知道1947年嘅紅底是否仍是由人手手簽。其實手簽鈔票喺1946年曾經引起過小型金融危機，話說日軍佔領香港時，曾經逼匯豐銀行高層手簽過一批鈔票，日軍投降後，香港政府曾經對是否承認這批鈔票很有保留，但幾經思量後，仍然覺得因為要維持香港嘅信譽，決定承認呢批鈔票嘅法定地位，即容許此批鈔票喺市面流通

一張1970年嘅匯豐紅底，俗稱小聖書。1970年開始，香港兩間主要發鈔銀行，匯豐和渣打決定將$100鈔票嘅面積縮小，亦統一用紅色印刷，自此香港$100鈔票亦被䁥稱為紅底

四張1981年嘅$50鈔票。匯豐$50被暱稱藍屋，而渣打$50則被暱稱為獅子踩波

四張匯豐1988年嘅$20鈔票，鈔票嘅簽名者係當時匯豐總經理Wrangham，中文譯名為雷悟因，外號雷老虎。我很喜歡他的簽名式樣，很有學者嘅氣派

兩個1894年嘅香港一毫，當時仍然係維多利亞女王在位，所以印係銀幣面嘅係事頭婆像，唔係伊利沙伯女王，而係佢嘅曾曾祖母。唔知點解當年嘅一毫應該都具備好高購買力，但係面積就非常細，比5，60年代流行嘅斗零仲要細同薄，袋係袋裏面輕飄飄，一啲安全感都冇

兩個1891年嘅斗零

兩個香港一仙硬幣，左邊嘅係1893年維多利亞女王像硬幣，右邊嘅係1924年佐治五世像硬幣

一張60年代嘅兒童身分證，當年嘅兒童身分證當然冇相，但係原來只係列明姓氏，冇標示名字，感覺真係好兒戲，隨時可以俾人借用/盜用  

回港證，我相信好多90後嘅香港人都未用過，甚至未見過.  回港證主要係用嚟往返澳門之用，當年去澳門除咗身分證之外，仲要出示回港證，其作用同護照差唔多，出入境嘅時候海關人員都會喺回港證上面蓋印，以作為出入境記錄

七十年代中期開始，由於港澳人士入出入境中國越來越頻繁，不可能再用回鄉介紹書如此原始嘅入境文件，所以推出簿裝回鄉證.  回鄉證其實近似一本護照，每次出入國內，國內關員都會在回鄉證打印，以記錄出入境資料。好像至90年代中，才以回鄉卡代替簿型回鄉證

回鄉證簿嘅內頁，每次入境，都要填上隨身攜帶嘅貴重物品，因為根據法例，你若不登記，離境時便不可以將沒有登記的貴重物品帶出境 

這本旅遊證件叫做CI，身分證明書，是六七十年代沒有BNO的港人所用的護照，我70年代末去英國的時候便是用CI作為護照，我估計CI是當時港英政府為非英籍嘅港人所發出嘅護照，作為外出旅遊之用

八十年代嘅借書證，留意發出借書證嘅部門係已經唔存在嘅市政局。當年仍未可以用身分證借書，每個香港人可以申請三至五張借書證，每張借書證可以借一本書，借書嘅時候圖書館管理員會將書卡插喺借書證入面，還書嘅時候會將借書證還返俾本人。由此之故， 借書人只能去番借書嘅圖書館還書

曾經有段時間我好瘋狂咁收集同儲蓄火柴盒，因為我覺得火柴盒印刷精美，盒面上或印上商舖嘅名稱，或印上精美圖案,  故此甚有珍藏價值, 後來因為數量太多，不得不把部份拋棄，只保留自己覺得最有收藏價值嘅火柴盒。這個是匯豐火柴盒，不翻出來也不知道，原來匯豐銀行也出過火柴盒贈送予顧客

金豪酒樓嘅火柴盒， 金豪酒樓位於山道同埋皇后大道西交界處，現址為麥當勞餐廳。火柴盒上面嘅電話號碼係六個字，所以估計此火柴盒起碼有40年以上嘅歷史  

英豪酒家嘅火柴盒， 英豪酒家位於卑路乍街尾，近加多近街。 由於英豪酒家近漁市場，所以老爸經常在此請客，或者一家晚飯。我記得有一次全家在英豪吃晚飯，但當晚卻踫巧是青春火花大結局嘅播映時間，在魚與熊掌不可兼得下，我在晚飯中途找了個藉口溜回家，犧牲了一頓晚飯，去看青春火花的大結局（當年沒有錄影機，錯過了心愛的電視節目，不可能隨意翻看得到）

康年酒家嘅火柴盒.   康年酒家位於西環卑路乍街尾，鄰近告士打道餐廳，酒樓所在處現已成為實惠以及肯德基等舖頭。康年迄立於此處一段頗長的時間，相信資深西環友應該記得。我對康年最深印象的記憶，是當年酒樓仍未實行點心卡制，伙計埋單時一般都只是計算桌上點心籠嘅數目，有些貪小便宜嘅茶客遂於吃完點心後將點心籠掉棄，以期伙計計少一, 兩籠點心，找數時俾少一元幾角.  另外火柴盒上廣告標語說筵開百席，著實是有點誇張了，據我記憶，第一很少人在康年擺酒，，第二以康年嘅樓面面積，開20席都已經好汶水了

男爵酒樓嘅火柴盒。男爵酒樓位於康年酒樓對面，規模比康年酒樓還要小， 80年代初結束營業後其位置長期被丟空，新中華酒樓結業後，曾在此處重新開業，名為新中華寶湖，新中華寶湖結業後，由富寶軒補上，但最終仍敵不過疫情，黯然於年初結業，舖位至今仍然閒置

珍寶海鮮舫嘅火柴盒。珍寶海鮮舫出火柴盒係理所當然，火柴盒面嘅設計都好新穎同埋有創意，以菲林底片嘅方式印上海鮮舫嘅外貌，睇起上嚟好新奇有趣。海鮮舫嘅地址係香港仔遊艇灣，唔講真係唔知，當年有呢個咁嘅名稱

彌敦酒店嘅火柴盒，酒店外貌幅相嘅設計都幾獨特，另外留意電話係K字頭，即係撥打彌敦酒店嘅電話要先打3字，呢個做法喺80年代電話公司取消分港九新界字頭區，統一所有電話都係八個字嘅號碼前係指定動作

悅興盛酒家嘅火柴盒。悅興盛酒家位於德輔道西同埋修打蘭街交界，而家已經被改建為普頓台。我對悅興盛嘅記憶，係老竇通常每個月都會同啲行家喺嗰度開會，開嘅唔係乜嘢業務會議，而係一班人夾錢做會，會員用暗標投得該批會銀，下個月底連本帶利還返俾個會，如是者周而復始（美其名為開會，其實係搵個藉口大家食餐飯打麻雀）。老竇開完會之後， 例必會攞一甖熱騰騰嘅西米布甸返嚟，我不嗜甜品， 但呢個西米布甸可謂甜品中嘅極品，每次攞返嚟我都盡兩大碗，而家諗返起都回味無窮 

夏蕙夜總會位於皇后戲院地牢，屬於陸海通公司，公司旗下還有兩間很有名嘅夜總會，一間叫「仙掌」，一間叫「甘露」，設於六國飯店（後來改為六國酒店）.  夏蕙屬於中式酒樓夜總會,  中式酒樓夜總會60年代興起，不設舞小姐，只提供晚飯、跳舞及歌唱表演，係有錢人的銷金窩.  提起仙掌夜總會，好多人仍然記得1959年富商黃應求在仙掌夜總會附近被三狼綁架嘅歷史

四海保齡球場嘅火柴盒，四海保齡球場係當年三大保齡球場之一，除咗南華， 星光， 便數到四海，係當年好多年青人嘅熱門蒲點。四海雖然為地理位置上不及星光，但總算位處窩打老道中段，附近有好多學校，酒樓，學生們放學後都會呼朋引類咁喺嗰度聚會，吹水，打保齡球。我都曾經喺四海打過保齡球，感覺上設備似乎比較殘舊，配套亦稍嫌不足，可能已經係後期嘅緣故

呢兩張八角櫈真係好有歷史，據我老媽子講，其年紀比我還要大。呢兩張八角櫈亦都係我哋由澳門搬到香港所攜帶嘅唯一傢俬，陪伴我哋全家由中環搬到西環，即使我呢十幾年幾度搬家，仍然唔捨得丟棄。我曾經喺呢兩張櫈仔上邊沖涼，剝蝦，穿膠花，後來家里環境比較寛裕，買得起比較似樣嘅傢俬，呢兩張八角櫈便被老媽徵召入廚房，放置砂煲，此所以其中一張櫈面已被辣燶。講起呢兩張八角櫈，唔好睇輕佢咁外型咁唔起眼，其實都係用中國最傳統嘅做傢俬方法嵌制而成，成張凳冇一口鐵釘，而係用入榫嘅方法拼合而成