老照片憶舊情 2

 

七十年代位於皇后大道中同埋威靈頓街交界處嘅得雲大茶樓。講起得雲有段古，話說得雲因為要做早茶，所以啲夥計好早（大概凌晨四點）就要返工準備，可能因為深宵寂靜，所以好應聲，竟然嘈到一街之隔，位於今日恒生銀行總行嘅舊消防局班消防員休息，消防處遂狀告得雲，禁制其過早開工，以免影響消防員休息.  得雲不忿反對，其抗辯理由甚為有趣，聲稱消防局位於中環，而得雲位於上環，兩者相距整整一個環頭，怎可能會騷擾到消防員嘅清夢。最後得雲竟然勝訴，可繼續於凌晨四點開工，消防局則如之奈何

六十年代由永樂街/皇后大道中交界處向東望向得雲茶樓 

五十年代嘅灣仔莊士敦道，左邊招牌處係龍鳳茶樓，遠些少嘅係龍門，右邊遠處可以見到馮良記錶行，今年年初因舊樓被拆卸才黯然結業

六十年代，位於太安樓嘅太安酒樓剛開幕，花牌佔咗半條街，不可為不墟冚 

六十年代位於上環永樂街嘅平香大茶樓，講起平香，唔少我哋呢一輩嘅同儕都會有記憶同埋印象，原因係茶樓位於中上環交界，地位適中，加上名氣大，所以我軰中人很多都曾經上過去飲茶.  話時話，當年呢類型嘅茶樓，因為多為自置物業，老闆都好捨得落本裝修，大都以雕龍雕裝飾牆壁，樓梯，所以一行入去，就覺得好有氣勢

; 彌敦道有好多經典茶樓， 照片中左龍鳯大茶樓，右瓊華大茶樓，簡直可以話係當年嘅重磅茶樓，聽講龍鳯以灌湯餃名震九龍，而瓊華則以水滾茶靚，星期美點綁住一大班熟客.   提起瓊華，不少五，六十後都會記得佢哋中秋節嘅大型月餅廣告板 

龍鳳茶樓正門玉照  

五十年代有柯士甸道望向彌敦道，右邊條橫街係覺士道。呢張相有幾樣野值得一提，一係圖左可以見到金門酒店，酒店門泊咗架酒店自置Van仔，估計應該係用嚟接送客人，足見酒店嘅規模都有番咁上下。前少少仲可以見到人力車，說明人力車喺五十年代仍然頗為盛行，成條街望落去好闊落，其實唔係因為條街闊，只係車輛同行人寥落，所以感覺好寬敞而已

五十年代中喺尖沙咀舉行嘅工展會， 此幅工展會所在地已建成喜來登酒店，向右望，一鐵路之隔便是藍煙𠧧貨倉，80年代拆卸後改建為新世界酒店及商場，再度拆卸後成為今日嘅K11商場 

五十年代末位於近尖沙咀碼頭嘅九倉遊客中心， 50年代開始香港外國遊客增多，故此到了50年代末開始此商場集中售賣遊客紀念品.   60年代初此地被霍英東收購後，改建為星光行。星光行本身又是一個傳奇故事，各位網友有興趣，可瀏覽小弟早前嘅網址 

從另一個角度所拍攝嘅九倉遊客中心， 時維60年代初.  60年代中遊客中心被折卸並改建為星光行.  前方白色建築物係九龍郵政局.  圖中可以見到一大班人力車夫喺度排隊等客，可見直到60年代，人力車仍然甚為盛行 

七十年代西營盤近桂香街處，電車上的嘅廣告賣嘅係增肥丸，當年普遍營養比較差，所以增肥丸有市場，今時今日，恐怕要賣減肥丸嘅廣告

五十年代中嘅中環同威靈頓街街交界處，如果我冇記錯，當時皇后大道中呢一段係雙線行車，不過由於車輛稀少，加上行人路狹窄，所以行人通常都會沿著馬路邊行.  照片左邊嘅恆安象牙係老字號，好像今天仍然健在，當然不能再賣象牙，只能賣犀牛角和仿象牙等工藝品

五十年代從高處俯瞰德輔道中，左邊係舊中環消防局，拆卸後改建為恒生銀行總行，右邊無入鏡係中央街市，遠處鐘樓處係告羅氏打行

如果唔係右後方嘅舊中環郵政總局，真係冇可能認得出，呢度係50年代畢打街同埋干諾道中交界.  當時仍未大幅填海，干諾道中海傍係往來國內嘅碼頭集中地 

五十年代嘅中環雪廠街，右邊近鏡頭處係皇后行，拆卸後重建為文華酒店，中間係第一代太子大廈，遠處即為廣東省銀行，都說照片可以反映當時嘅風土物貌，雪廠街係中環嘅主要街道，但行人可以企喺街中心閑聊，可見當時嘅街上車輛如何稀少

五十年代中環德輔道中向東望，右邊可以見到永安公司。50年代嘅德輔道中已然非常旺盛繁榮，沿路所見，有製衣廠，茶樓，茶行，藥房，甚至售賣單車店舖，可謂百業賣百貨，似市集多於金融中心

三十年代灣仔軍器廠街，左邊係海軍俱樂部，右邊係1938年開始經營嘅油站，今日已然被拆卸掉

 五十年代西營盤皇后大道西和正街交界處，右邊是我們的老朋友多男茶樓

五十年代油麻地彌敦道，右邊可以見到普慶戲院，以及上一代彌敦酒店嘅招牌，右邊人群處即為今日嘅永安百貨公司

甚為罕有嘅旺角百老匯戲院正面照片，百老匯戲院喺60年代中被拆卸後，被重建為匯豐九龍總行

六十年代尖沙咀加拿分道和加連威老道交界處向上望，左邊嘅建築物拆卸後重建為東英大廈，東英大廈亦已被拆卸，再重建為The One，直望紅寶石餐廳處係今天仍健在嘅香檳大廈，右邊遠處白色建築物即為上一代嘅美麗華酒店

五十年代位於油麻地甘肅街廟街交界處嘅廣智戲院，廣智戲院雖然簡陋，但有卻保持幾個頗有特色嘅紀錄，第一廣智戲院係九龍首間影畫戲院，於1919年開業， 六十年代末拆卸，由於開業於20年代，曾經放映過默片，所以需要人坐喺二樓用咪解畫，相信有網友曾親臨其盛。另外廣智戲院從沒有安裝過冷氣，相信到後期老闆無心經營，所以不願花費投資所致.  又及，我真係好鍾意戲院門前小販售賣各種零食嗰種墟冚情況，小時候冇錢睇戲，卻仍喜歡逛戲院，一則喺大堂可以喺戲院大堂涼冷氣，睇劇照，二則穿梭於各零食㰙檔中，嗅嗅煨魷魚，番薯的香氣，解解嚵也是好的

五十年代中環威靈頓街和嘉咸街交界處向東望，紅色貨車身後係位於嘉咸街口嘅永和雜貨店，於2017年被列為一級保育建築物

七十年代中環畢打街，右邊係未重建成為置地廣場嘅告羅氏打行，左邊遠處可以見到小部份嘅舊中環郵政總局，正前方則為太古大廈， 2002年再重建成遮打行  

六十年代嘅皇后大道中，右邊係我唔使講網友們都認得出嘅皇后戲院，左手邊可以見到正在興建中嘅興瑋大廈 

六十年代從漢口道/海防道交界處望向廣東道. 右邊原本係軍營，現已改建為九龍公園和柏麗大道，我特別欣賞痞喺消防水龍頭上邊嗰位大叔，佢應該食過下夜粥，下盤功夫睇落甚為穩健 

六十年代末嘅中環動植物公園（但係我仍然鍾意叫佢做兵頭花園），照片後方所有大廈均已被拆卸重建，最明顯嘅當然係半山名廈花園大廈(重建後仍沿用花園大廈舊名)

六十年代初北角英皇道，照片右後方係今日炮台山地鐵站所在地，左後方遠處係皇都戲院，剛剛被強拍成功，相信不久後便會被拆卸，所幸者係圓頂建築部份將會被保留，否則北角此一地標性嘅建築物將會消失¸而北角人的美好回憶亦無處尋覓