七四年擺酒結婚，盛惠$365一圍，但裏便嘅嘢，依家$6000都未必食得到，我唯一有疑問嘅就係，點解擺酒咁隆重嘅事，係食鯇魚，唔係石斑？唔通當年石斑仲貴過魚翅鮑魚？另外金漢酒樓當年係一間好出名嘅酒樓，好多粵語片都借呢個場地拍過戲. 菜單上面有一道菜而家好少見;銀耳燉雙鴿，我相信呢個應該係湯嚟嘅，當時酒席好興一翅一湯，後來啲人可能嫌湯水多，所以cut咗個湯，加多個菜，但其實我好鍾意飲呢啲燉湯，當時最興嘅就係花菇火腿菜膽湯，好清甜，我覺得飲湯仲好過食翅
約五十年代從上環皇后大道中望向永樂街和文咸東街交界處，正中是添男酒樓，當年設有歌壇，我亦曾恭逢其盛，在七十年代末掹人衫尾上過去飲茶聽歌。右邊可以看到永利威的招牌，永利威今天仍屹立在原處，認真唔簡單。唔知仲有冇人記得永利威嘅招牌廣告；半隻雞，一壼永利威？
六十年代的大坑浣紗街，那年頭，抬頭望去竟可以見到虎豹別墅的白塔，浣紗街最出名的當然是那場大槍戰，至使一名督察受重傷，劉青雲更 根據其故事拍成電影無味神探，使浣紗街更添幾分歷史感
位於北河街和巴域街交界處嘅皇宮戲院， 1953年開幕，由銀壇鐵漢曹達華斥資興建， 1964年出售，現已改建為住宅大廈。一句題外話，我真的很喜歡當年戲院大堂人頭湧湧的歡樂氣氛，更懷念以前戲院大堂空地各式各類售賣零食的小販們，以及他們所售賣的各款讓人垂涎欲滴的零食. 俱往矣，現在戲院都開設在商場內，根本冇可能重溫那種喜氣洋洋，翹首期待入場的興奮
喺未有手機慨年代，艇上人家要煲電話粥，唯有上岸搵個電話亭，呢度我相信系銅鑼灣避風塘
六十年代中彌敦道近太子處，圖中的古老建築物是被清拆前的旺角警署，後面嘅邵氏大廈，拆除後改建為旺角中心一，二期
約五十年代的尖沙咀海旁，後面的白色建築物是舊水警總部，現已改建為HerItage 1881
色彩絢爛嘅干諾道中舊照，左邊係皇后行，拆卸後改建為文華酒店，其前方是第一代卜公碼頭，現在已經搬往赤柱，圖片前方兩人相信在結網捕魚，當年竟有漁民在中環碼頭附近捕魚，想來也覺匪夷所思
位於波斯富街嘅利舞臺戲院,我記得其隔壁禮頓中心地庫有新寧餐廳、 惠康超級市場、 煤氣烹飪中心、多間鞋舖, 樓上有美心快餐店、日本文具店， 霎東街未建成時代廣場前有建國酒樓、 意粉屋、 何洪記, 而波斯富街則有謝瑞麟錶行、 廣興書局、 恭和堂涼茶舖、 香河越南餐廳, 泉章居等
約五十年代的干諾道中海旁，沿海邊可以看到很多嘩啦嘩啦，那是當年的水上的士，在沒有海底隧道的年代，午夜時分只能靠這些小船往來港九兩地。遠處前方可以見到統一碼頭的巴士總站，後面則是舊中環消防總局，現在已拆卸改建為恒生銀行總行大廈
約七十年代從工人球場望向葡京酒店，當時我已經好奇怪，咁黃金嘅地段點解會用嚟俾人踢波？而且只係個沙地球場，似乎同個地段有啲格格不入，不過我靚仔嘅時候都喺度留低過唔少腳毛，而工人球場後巷有好多隱世美食, 譬如肥仔記熱炒, 各位有冇印象?
型到爆，仙姐拉住武狀元陳錦堂, Michael Jackson 80年代戴黑超比人話型，香港明星50年代已經戴黑超周圍威
灣仔太原街和莊士敦道交界的街市市集，非常地道的街坊風情，右邊是灣仔街坊念茲在茲的雙喜樓
五十年代銅鑼灣軒尼詩道和波斯富街交界處，小弟孤陋寡聞，未聽過呢隻永華湯火膏，但招牌搞到咁大，又夠膽號稱第三次世界大戰都唔怕, 感覺應該唔少野
六十年代仍然位於皇后大道中嘅高陞酒家，時為中秋佳節，酒樓張燈結綵地喜迎中秋，促銷月餅，今時今日好難再搵得返濃厚嘅節日氣氛
剛落成嘅紅磡火車站大堂，睇落美輪美奐，唔講仲以為係酒店大堂
未清拆前嘅九龍城寨，係無牌牙醫嘅集中地，唔知仲有冇香港人記得
呢處唔係雍雅山房，而係位於大埔道沙田嶺段沙田大酒店嘅露天茶座. 當年沙田仍算是郊外，但係就有兩間休閑度假式酒店，一間係華爾登酒店，另外一間就係沙田大酒店，由於當時交通不便，去呢啲酒店都要有架呠呠車，所以到訪嘅人都係非富則貴，而由於酒店環境優美，亦成為好多六十年代粵語片嘅取景勝地。沙田大酒店於1983年被拆卸，改建為豪宅，自此香港又少了一間具歷史價值嘅酒店
六十年代俯瞰深水埗昌華街，右邊可見到大大間奇華餅家
約七十年代位於九龍城福佬村道的洞天冰室，洞天冰室可謂港產片取景勝地，很多八九十年代的港產片如九龍冰室等，都曾在此取過景. 洞天冰室我曾幫襯過兩三次，最深印象的是老板在收銀處掛了一幅用扶乩寫成的詩句，當然內容深藏玄機，完全非我等凡夫俗子所可以洞悉
聽聞任姐最精神就係打返四圈嘅時候
圖中的白色建築物是牛奶公司位於銅鑼灣的冰廠，其前門是未塡海前的告士打道，冰廠當然早已拆卸，並輾轉改建為今天的皇室堡
細佬，咪郁啦，唔係剃親你㗎啦
睇返舊相，讓我記得返起海角皇宮，而家啲人講香港仔嘅海鮮舫，淨係識珍寶同埋太白，其實全盛時期係三雄鼎立，珍寶，太白，同埋海角皇宮。我記得靚仔嘅時候，仲未有珍寶海鮮舫，六十年代老爸嘅拍檔好鍾意喺海角皇宮為母親擺壽宴，當時好似冇接駁小輪，係坐啲水上人家啲搖櫓艇來回海鮮舫，靚仔嘅時候覺得好新鮮，好高大上，後來因為珍寶海鮮舫加入戰團，就淘汰左海角皇宮，拉左去澳門成為賊船, 而太白則成為珍寶嘅附庸艇
五十年代嘅尖沙咀加拿分道，正在搭棚起緊嘅大廈係霍英東嘅香檳大廈， 香檳大廈落成之初其實係座豪宅嚟嘅，喺當地比較高級嘅住宅，但係久而久之，大廈變得龍蛇混集。60年之後呢座大廈正準備拆卸，真可謂滄海桑田，左邊可以見到通利琴行
有冇人去過泰園漁村划艇仔/水上單車?我就去過好多次喇. 泰園漁村位於元朗青山公路廿八咪半. 漁村佔地數十萬呎，建有魚塘供人垂釣，赤有人工湖供遊人泛舟，湖上建有九曲橋，更設有湖上酒家，提供各類餐飲設施. 由於漁村充滿水鄉風情, 故此曾是不少粵語片的取景勝地. 泰園漁村在上世紀八十年代被填平, 並發展為錦綉花園
利舞臺那張照片，正上映沉默的羔羊，應是九一年。提及的建國酒樓，那年已沒有了。建國門口有一電動樓梯，周潤發及鄭裕玲在網中人的一幕是在那電梯拍的，印象深刻。
回覆刪除
刪除利舞台戲院可謂係小弟嘅蒲點，附近有好多各式各樣嘅食肆同埋商店，睇完戲之後，鍾意嘅可以去泉章居或者建國食個飯，又或者喺新寧中心商場逛下（雖然啲商品唔係好啱我），另外霎東街嗰邊亦都有好多舊式舖頭可以逛，或者信歩行去大丸同埋怡和街，走一圈都夠成個下午玩，而家利舞台廣場附近都陸陸續續建成高檔商場，問題係商店大都千篇一律，對我嘅吸引力似乎唔係好大~~
照片中那間酒樓是敘福樓。有一段時期，敘福樓全港分店處處，後來日漸式微。不知到了今天是否仍在？
刪除此外，西環兄所提及位於利舞臺附近一帶的食肆及商戶，只有香河越南餐廳仍位於原址，新寧餐廳則遷至利舞臺廣場。這間餐廳的確歷史悠久，原先位於新寧道的新寧招待所。記得年幼時見到餐廳外牆上有「西菜牛肉」四字。
係喎，唔講我都差啲唔記得咗敘福樓，曾幾何時敘福樓分店處處，我喺中環返工嘅時候，午飯同同事聚餐好多時都會上敘福樓，而家真係好似冇晒影。另外新寧餐廳我只係幫襯過一次，好多年前同個朋友喺利舞台附近剛好碰見，順腳落去新寧餐廳午飯，印象之中其實同高及茶餐廳冇乜大分別，裝修亦都講唔到有啲乜嘢特別，當時叫咗個牛扒，可能冇特別吩咐，上枱嘅時候已經係七八成熟，感覺比較老，加上夥計亦都唔唔係特別好禮貌，所以對呢間餐廳嘅整體感覺唔係咁好，唔知搬咗之後有冇改善到~~
刪除泰園漁村，小時聽過未去過。另外，錦绣在七十年代已存在，查維基，說是七六年落成，錦綉落成應更早，記得在七二-七三年曾隨家人到那處探朋友。
回覆刪除泰園漁村我七四，七五年都去過，當年係幾好嘅郊遊地點，錦綉同埋加州花園都係建於泰園漁村附近，不過小弟係港島人，絕對係新界盲，泰園漁村關閉後原址作何發展，還請識者有以教我~~
刪除雍雅山房，沙田大酒店，華爾登酒店，Shatin Inn，容龍別墅，龍珠島酒店，鯉魚門酒店(?)等等都有遊蹤，但印象中就好似未去過青山酒店，記得曾光顧過仍泊在青山時嘅太白海鮮舫。
回覆刪除哈哈，睇嚟你老哥都算富貴，眾多郊外酒店之中，我淨係去過容龍別墅，六七十年代每次澳門有親戚到訪，老竇都會搵人開車去用龍別墅飲下午茶（唔知點解佢對容龍別墅情有獨鍾），由此之故我亦恭逢其盛去過幾次，不過已經係幾十年前嘅事，而家已經完全唔記得容龍別墅嘅模樣~~
刪除我對紅磡火車站並無愛惜，反而直到今天仍不捨尖沙嘴火車站。
回覆刪除
刪除我都有同感，雖然紅磡火車站比較新穎同埋光猛，但係我都係對尖沙咀火車站有不離不棄嘅感情，記得讀中學嘅時候要去新界旅行，都係喺紅磡尖沙咀火車站集合同埋出發，嗰陣時候大夥兒喺火車站對開嘅天星碼頭會面，再興沖沖咁上車去旅行，嗰種興奮同埋期待，而家諗返起都有一種莫名其妙嘅幸福感~~
現在去戲院，雖然音響聲光螢幕座椅等設備先進多倍，不過氣氛淡薄，小貓三兩隻，同舊日墟陷華麗一比，淡出鳥來，況且佳片難求，吸引有型有演技明星均缺，不去無損失。
回覆刪除
刪除對啊，所以而家啲片商都係傾向以動作以及後期加工製作上面落功夫，乜嘢3D， 4D，立體， IMX，就係要令到觀眾只能夠喺戲院先至感受到果種震撼感，以至得不買飛入場睇戲。不過老實講，大部份呢啲動作片（主要係超級英雄片）因為內容同埋情節薄弱，睇過一兩套之後，覺得大部份都千篇一律，所以都好難吸引到我花錢買飛入場，我反而會比較鍾意睇劇情片，對上一次買飛入場睇嗰套電影已經係係韓國片上流寄生族，差不多已經係大半年前嘅事~~
記得戲院除了零食，還有出卡的磅重機
回覆刪除當時的香港真的是花樣年華！
刪除係呀，以前睇戲絕對有種興奮感，如果大人話俾你聽聽日帶你去睇戲，嗰晚多數都會開心到瞓唔着，其實好多時候並唔係真係咁鍾意睇戲，而係享受去睇戲嘅期待同埋箇中氣氛，譬如可以喺戲院周圍零食檔掃街，而且睇戲等於去街，又多咗個開心嘅理由。當年戲院大堂有好多有細路仔興奮嘅設施，譬如即爆爆谷，磅重機，有啲甚至會有簡陋嘅機動遊戲比細路仔玩，儼如一個小遊樂場，總括來講因為當時娛樂途徑比較少，睇戲對小朋友來講係一件天大嘅喜事同埋樂事~~
以當時物價，成條石班好貴，雙頭也不平，
回覆刪除成條大睇好多。鮮鮑片平好多！
閣下所言固然不虛，但係我估以價論價，鮑片同埋魚翅價值亦不菲，正如你所言，擺酒當然係想好好睇睇,上莱嘅時候原條石斑，應該都幾有face。一句題外話，當年好多人會自來海鮮，原因就係驚洒樓代購嘅海鮮唔新鮮，或者斤両不足，我老竇做魚蝦，老式人擺酒好講面子，所以擺親酒都係自來石斑，以保證質素~~
刪除非富貴也，只不過孩提時代多隨長輩抆衫尾去而已。尤其容龍別墅及龍珠島，皆因長輩門喜歡攻打四方城，於夏日炎炎時特租此等房間作長途雀局耍樂，我等就趁機游水嬉玩。而租用鯉魚門酒樓旅館乃較後時期，因其較近市區，彼時我等亦多已成長，故每於放工後方至以便一嚐海鮮晚餐，另一方面亦可於飯後攜同祖母返歸，
回覆刪除沙田酒店同華爾登都係成長後才光顧，特別後者，聽知有可能拆卸改建才急去打咭。
回覆刪除靚仔嘅時候，當然都係跟住長輩吃喝，我老豆因為工作關係，長年一星期七日都要開工，所以根本冇乜親子時間，更加唔好話帶我哋周遊周圍去郊遊，吃喝玩樂。佢唯一會同我哋去郊外，就係有外地親戚嚟香港要招呼嘅時候，但係唔知點解佢淨係識去容龍別墅，我懷疑可能佢喺嗰度有熟人嘅關係，當然自己年紀大左，有獨立消費能力後，就會周圍去捐窿捐罅搵食，但係其時好多呢類型嘅郊區酒店或者消閑餐飲譬如沙田酒店，華爾登酒店都已經結束營業，所以同呢類型嘅郊區酒店/食肆緣慳一面~~
牛奶公司冰廠那張照片，令我想起兒時每到維多利亞公園，就見到冰廠和停在那裡附近的船隻。依稀記得有一條槽將冰塊從冰廠運出來的。
回覆刪除嘩, 應該係洪荒年代嘅事了罷~~
回覆刪除西環兄，
回覆刪除---所以同呢類型嘅郊區酒店/食肆緣慳一面~~ ---
地產發展話事，錢錢錢。
我真係懷疑是否係60年代尾70年代初英國政府已知香港前景，所以意興闌珊之下就乜野歷史建築物不作保留，話拆就拆，哀莫大於心死，如中環郵政總局、尖沙嘴火車站、海事處...等等，美其名發展賣地蓋樓大有收益，何樂而不為，保育奈我何其哉乎？
記得兄台出生地應為澳門，當地另一景點我幸好係'80年代中與同學同事等曾遊玩入住，此乃峰景酒店(Hotel Bela Vista)，現今有錢都無得住也。多年後有一位共事同事乃中葡混血兒，經我提及此酒店，如來是其家族曾經擁有。
峰景酒店小弟都未住過，其實90年代澳門訂定回歸日子後，隨即宣佈將酒店改建為葡國駐澳門大使館，此消息一出，訂房更加難上加難，（如果我冇記錯，成間酒店得十幾間房，加上只能訂週末，所以試咗好多次都冇辦法訂到房）。後來有個朋友通過關係訂到房，我哋相約喺風景酒店嘅露台飲下午茶，當日由下午坐到黃昏，睇住個鹹蛋黃慢慢沉落澳氹大橋後面，箇中感覺真係有種日盡西山，依依不捨嘅味道~~
回覆刪除入住過後另一次再訪峰景酒店，個次純粹於其餐廳露台嘆茶(or食早餐?)，彼時南灣尚未填海到遠不見水，感觀開揚氣氛悠閒，就趁機扮下布爾喬亞一族享受點點末代殖民地風情，事後沿酒店前山坡花園拾級迂迴而下返回山腳馬路。
回覆刪除情景又使我諗起'80年代某一星期六下午，跟幾位所屬部門同事經理等，一幫人特意走去淺水灣酒店露台餐廳嘆茶，景況心態頗有相似之處，總想挽留一點逐步消失嘅生活型式意態。
講開峰景酒店，附近個間佛堂菩提園(未重建時?)，如去食齋就最喜歡佢哋啲白粥(好重腐竹味，滑及甘香)，任食。
由峰景酒店，讓我想起兩間澳門嘅古老酒店，一間係竹灣，另外一間係聖地牙哥。先講竹灣，竹灣位於路環，由於交通頗不方便，所以唔係咁多人知道/鍾意住，呢間酒店我曾經住過一次，老實講設備真係比較殘舊，如果想住得舒服，竹灣唔係首選，但佢有佢嘅優點，一係環境比較幽靜，唔會有大陸客，如果想安安靜靜咁睇吓海，飲下嘢，悠悠閒咁過一個週末，唔係太在意裝修同埋交通，其實都可以一試。聖地牙哥係另一間歷史悠久嘅酒店，某方面可以話同峰景齊名，我未曾住過聖地牙哥，但喺嗰度飲過好多次下午茶，聖地牙哥位於南環尾近媽閣，甴古堡改建，歷史悠久，我睇過葡萄牙人喺五十年代已經去聖地牙哥飲下午茶跳舞嘅舊相，係一間好有葡萄牙色彩嘅酒店。由於酒店有古堡改建，所以有自己嘅小教堂同埋大露台，葡萄牙氣息濃厚，入酒店要經過山窿，好有特色，即使唔係去住，經過飲個下午茶亦都係個唔錯嘅消閑嘅選擇，起碼比去金光大道嘅酒店更有味道同風格~~
回覆刪除西環兄，
回覆刪除一間係竹灣，另外一間係聖地牙哥。---
未曾得知竹灣酒店，是較新酒店抑或古蹟酒店？願聞一二。
聖地牙哥古堡酒店歷史曾有覽閱，多年前亦有去遊訪一次，但從未入住，亦從無興趣入住光顧，因個人對其並無好感，皆因當時其酒店太刻意包裝得過度高級兼不近人情，過度商業化，我此類低端遊客非其服務對象是也，況且現今落在數字姨太手上管理更形折墮。
有錢我會花費落峰景呢類古老但有人情味嘅酒店，或者鍾情於未全盤失控開發氹仔時嘅凱悅，因無咁多賭客及流鶯，對家下所有澳門大型酒店賭場深惡痛絕。
竹灣酒店小弟所知不多，只是曾在十幾年前入住過一次，覺得他地處路環交青山綠水處，而且裝修簡樸，甚為適合想遠離塵囂嘅休閒渡假需要，所以在此一提。我了解賈真兄對聖地牙哥酒店嘅看法，但無論如何，澳門能與峯景歷史比肩嘅酒店，就只有聖地牙哥，商人經營酒店，當然以利掛帥，將其商業化，或者說得更直接一點，將利潤最大化無可厚非，但不管如何，其本身基礎建構仍在，一瓦一石都是歷史，這個是金光大道諸酒店所無可比擬的。另外老兄特意提及凱悅酒店，小弟對此酒店亦頗有感情， 90年代小弟每一兩個月都會往赴澳門到週末，俗話說是叉電一下，其中一間我經常入住的酒店便是凱悅酒店，酒店頗有葡萄牙傳統特色，樓下建有太白渡假村，面積雖然不大，但當年的算是創舉，我亦甚喜歡其葡國餐廳Flamingo ，餐廳依小湖而建，坐在那裏吃個午飯，環境算是頗䖇鬱葱蔥，甚至有些與世隔絕嘅感覺。俱往矣，我已有兩三年沒有去澳門，亦坦白說今時今日嘅澳門沒有什麼吸引我去的理由和地方，一想到大三巴或者議事亭前地的肩摩轂擊，便打消了去澳門的念頭~~
回覆刪除你好！想請問知唔知道影到永利威嗰張相嘅出處係邊度？我幫手寫緊一本書，需要用到永利威嘅舊照。
回覆刪除唔好意思, 網誌刊出後,一般都會刪除原稿, 故此無法幫你追尋照片嘅出處, 請見諒~~
回覆刪除我的人生足跡跟你有點相似
回覆刪除澳門讀書
係葡京後面嗰幾間爛屋其中一間住過, 因此亦係工人球場踢波
住銅鑼灣
去過英國住
唔知會否有更多的相似呢哈
哈哈, 真係相當多交疊處~~
回覆刪除