三十年代位於薄扶林嘅牛奶公司牧場， 六十年代牛奶公司結束本地牧場業務，並將此處改建為置富花園
五十年代位於青山道19米半嘅容龍別墅. 六七十年代每次澳門有親戚到訪，老竇都會搵人開車去用龍別墅飲下午茶（唔知點解佢對容龍別墅情有獨鍾），由此之故我亦恭逢其盛去過幾次，不過已經係幾十年前嘅事，而家已經完全唔記得容龍別墅嘅模樣
五十年代由莊士敦道望向菲林明道和灣仔道交界處，唔睇舊相都唔知，原來兩條路分界處曾經有間救世軍學校
五十年代由德輔道中望向畢打街（當時叫做必打街）. 左邊係告羅士行，右邊可以見到畢打行，正中係蜆殼大廈(即亞細亞行). 蜆殼大廈一直是蜆殼公司嘅香港總部. 蜆殼大廈最初只係間2層樓嘅房屋，拆卸後建成一幢7層樓嘅樓宇，1960年再改建為此幢樓高17層的建築物, 並命名為蜆殼大廈. 1993年蜆殼集團出售蜆殼大廈, 香港總部搬往銅鑼灣, 而蜆殼大廈亦隨即被拆卸, 並改建為中建大廈
五十年代灣仔軒尼詩道和分域街交界處，又見到我哋嘅老朋友交通亭，睇嚟當年交通亭處處. 香港六十年代才開始大量安裝交通燈，在此之前，道路交通主要仍是由交通警站在交通亭來指揮
燈火通明嘅得如酒樓, 標誌住得如嘅輝煌歷史. 得如酒樓位於油麻地上海街378號，自上世紀20年代起營業，直至2012年11月尾結業。結業當日黎姓老闆曾揚言會花費數百萬裝修翻新，結果還是不了了之。得如酒樓結業前我曾經慕名上過去飲茶，結果同當年嘅龍門一樣，頗為失望，其實呢類型老式茶樓，除咗因為裝修古色古香，俾人一種舊香港嘅感覺同埋情懷之外，出品其實不甚了了。側聞酒樓最近正進行裝修，酒樓上層會改為老人院，而地下大堂則將改裝成地舖
六十年代皇后大道中向東望，右邊係富隆大酒樓，值得一提嘅係左邊可以見到顏奇香茶莊嘅招牌，顏奇香是一家擁有近80年歷史嘅老字號，我曾經因為損友的關係，有一段時間愛上喝茶，也幫襯過當年位於皇后大道中的顏奇香幾次. 老細顏文正應該是第二代老闆，當然係愛茶之人，我有幸喝過他親手沖泡的茶. 和他談茶論道，甚為賞心悅目. 顏奇香現已搬往蘇杭街繼續營業
位於香港仔香港仔大道190號嘅香島戲院，1980年拆卸並改建為香島大廈. 我雷曾經喺度睇兩小無猜 ( Melody)
五十年代嘅灣仔軒尼詩道，沿路一系列嘅三層高唐樓，以及樓柱上面好有個人風格嘅招牌字體,予人以一種很厚實和樸素嘅舊香港味道
五十年代嘅德輔道中，可以見到兩幢已經湮沒很久嘅歷史建築物，貨車後方嘅係告羅士打行，前方嘅係歷山大廈
六十年代初嘅干諾道中，照片前係第一代卜公碼頭，後面咁古色古香嘅建築物係舊中環郵政總局，泊喺岸邊嘅小船係嘩啦嘩啦，喺未有海底隧道之前，當天星小輪午夜停航後，呢啲嘩啦嘩啦就係唯一嘅渡海工具，載客來往中環同埋尖沙咀, 據說搭客大多是返夜更嘅報館員工
五十年代從匯豐總行向西望去，右下角係太子行，遠處嘅鐘樓係告羅士打行，驟眼看去，完全是舊式建築佈局，有誰能上得到，這裏是60多年前的中環
位於銅鑼灣軒尼詩道嘅紐約戲院，而家已經拆卸改建為銅鑼灣一期，唔知有冇網友曾經喺度睇過戲？
五六十年代開喺徙置區附近嘅露天飛髮檔，一個幾毫子搞掂，當年有種講法，飛完髮之後返去要即刻洗頭，如果唔係個頭會生瘌痢，當時唔知點解，而家我諗係因為呢啲飛髮檔啲工具唔衛生，返去唔即刻洗頭, 細菌傳染導致瘌痢頭一啲都唔出奇
六十年代一架駛往香港仔嘅7號單層巴士駛經皇后大道中，我好鍾意唐樓上邊嘅招牌，同埋原汁原味嘅書法
估計係五十年代嘅中環租庇利街，由皇后大道下望德輔道中，右邊係中央街市，左邊可以見到品珍醬園，如果我冇記錯，品珍後來搬咗上去嘉咸街，其後結業
五十年代由軒尼詩道同史釗域道交界處往海傍方向望去，其時路口有個交通亭指揮交通，今日90後嘅小朋友應該都未見過，右邊係好多舊相都見過嘅灣仔大酒樓，聽講係曾經喺灣仔嘅龍頭酒樓之一，余餘生也晚，未及恭逢其盛
六十年代三個邵氏打星，兩個show 肌，一個扮cool，左起鄭雷，羅列，王羽
一架紅番頭雙層巴士駛經上環威利麻街， 4號巴士由中環去華富邨，但華富邨未建成之前，總站喺瑪麗醫院
六十年代位於德輔道中嘅東方錶行，今日東方錶行仍喺原處繼續營業，認真唔簡單，東方錶行以代理名錶起家，自六十年代起迅速擴張，今日有八間分店，並在聯交所上市, 可謂香港地道老字號
七十年代上環文咸東街和禧利街交界處，唐樓上面好大個唐拾義招牌，唐拾義我最清晰嘅記憶係佢哋嘅杜蟲散，白色粉末開水飲，我細個時飲過唔少。另外我亦都好鍾意圖片內嘅布篷貨車，細個時老竇有夥計識揸車，暑假時會開車送我哋去深水灣游水
七十年代西洋菜街近奶路臣街處，可以睇到大大個蛇王源嘅招牌，蛇㷢係係香港人喜愛嘅菜式之一，但係而家連銅鑼灣蛇王二都結業，真係有啲唏噓，圖中有好多已經消失嘅事物，譬如辦館，譬如甲蟲車，譬如中僑百貨
五十年代嘅汀九，絕對可以用風光如畫嚟形容，現址嘅泳灘仍在，好似仲有個泳會，真係好有思故幽情嘅味道. 此情此景，讓我諗起當年謝賢同嘉玲，或者呂奇同陳寶珠郊遊嘅景象
五十年代嘅東興樓，拆卸後改建為今日銅鑼灣東角道百利中心。單單一棟大廈，便看到很多有趣味的東西和事情，第一是大大個女子公寓嘅招牌，然後樓下係北京樓，樓上有一間名為英英波樓同埋冰㕔嘅綜合娛樂場所，認真唔簡單
六十年代嘅花園道纜車站，可以睇到當時搭纜車上山頂嘅都係外國人，從側面證明當時嘅山頂係外國人嘅旅遊勝地，地道香港人好少識上山頂遊覽，右邊係當時仲有露台嘅美國領事館
正！多謝版主為我們解悶！
回覆刪除辦館好像未完全消失，有些舊區都仲見有。
閣下講得啱，喺好多舊區，譬如深水埗，或者土瓜灣都仍然有辦館嘅存在，不過規模已經不可和全盛時期同日而語~~
回覆刪除西環兄，
回覆刪除---'右'邊是尖沙咀警署，'左'邊則是以曲奇餅出名的老牌餐廳車厘哥夫...---
恕我再次多事，是否應將左右調返轉才是，因巴士向北走之故，應以車頭方向為準。
---不過已經係幾十年前嘅事，而家已經完全唔記得容龍別墅嘅模樣---
睇番一套薛家燕沈殿霞嘅粵語片(唔記得片名)，係有關歌舞團一事，好多外景係容龍別墅旅館範圍同游泳池所拍。
---六十年代由彌敦道望向美麗華酒店...---
向金吧利道方向走差不多接加拿芬道口，曾有一間帝國酒樓夜總會，內裡有個舞台好似可以旋轉，佢哋嘅蝦餃腸粉又薄又滑，牛肉炒河色香味俱全，灌湯餃一流，帝國唔做之後無處食番同樣質素。
---而蜆殼大廈亦隨即被拆卸, 並改建為中建大廈---
我印象應有間較細商廈叫'大廈行'，不過講親都唔見有咩人識或記得，好似係近亞細亞行，不過前者應早拆過後者，希望網上有人知道此大廈行曾存在歷史，證明我無失憶。
---五十年代從匯豐總行向西望去，右下角係太子行，遠處嘅鐘樓係告羅士打行...---
唔講真係以為係一個歐洲小城市，尤其見到太子行個格局。
---六十年代由皇后大道中上望向雲咸街，可以見到成條街都係英文招牌...---
家下無講話英文小見，連正體字都萎縮，尤其大廈啲招牌，土型土相，污染眼球。
---'左'邊係好多舊相都見過嘅灣仔大酒樓---
Sorry, 應該係相片右邊。我真係厚多士。
---...譬如中僑百貨---
話時話，'7/80年代時我都幾鍾意行下大陸公司，雖然個時啲貨品仍較老套，但大致貨真價實，價錢相宜，加上有啲特產真係大陸公司先有得賣，而一般舖位面積頗大，人流較疏落，無其他百貨公司咁人頭湧湧，或價錢昂貴，所以空閒時耐唔耐都去逛吓。
去得較多依次為觀塘中匯，紅磡新中華，旺角中橋，北角華豐，佐敦裕華，德福裕華，旺角及銅鑼灣中國，中環大華，中藝偶爾為之，可惜現存者只得一二，希望佢哋仍堅持，因香港百貨公司買少見少，只有名牌店充斥，買唔起，無癮。
前年曾到華豐買兩枝墨水筆以作收藏。
---五十年代嘅汀九...---
細時聽啲大人講話去九咪半或十一咪半游水，有啲有錢人又話有別墅係當地，十一咪半者即汀九及其附近。
---右邊係當時仲有露台嘅美國領事館---
未知是否有關保安抑或建築物結構理由，所以美國領事館將所有露台拆掉，如果講到美觀，咁真係舊底靚過依家囉。幾時拆走晒嘅呢下！
千祈唔好話厚多士，賈真兄睇得咁仔細，小弟覺得開心同埋榮幸之至，我係以觀圖者作為定位，正面睇照片來分左右，並已經對於錯誤嘅左右掉轉嘅解說作了改修，謝謝提醒~~
刪除在纽約戲院看電影? 有呀，看「大地震」。:)
回覆刪除我自己就從未喺紐約睇過戲，反而喺利舞台，樂聲同埋豪華就睇好多，有啲可惜同紐約緣慳一面~~
刪除我未見過樂聲，利舞台及豪華都有，豪華大堂有一美人魚銅像，小時候覺得很特別。那些年，那一帶有很多戲院，由天后的百樂，到新都，豪華，翡翠明珠，京華，紐約，碧麗宫，總统，利舞台...一下子記憶返哂來。
回覆刪除係呀，當年睇戲係香港人嘅主要，甚至係最重要嘅娛樂，所以戲院可以話係五歩一樓，十部一閣，好多時候兩間甚至會戲院打對面，就好似豪華同樂聲，但係各有各做，有熱門大戲上映嘅時候，照樣係全院滿座，熱鬧非常~~
回覆刪除