迫於無奈，賦閑在家，瀏覽舊相，略舒鬱結, 敬祝各位，身心康健
五十年代張瑛同金庸簽約，買下倚天屠龍記的版權，自資拍成電影
七十年代末一班童軍行山，偶遇當時港督麥理浩夫婦，其時這班少年完全不知此對鬼佬夫婦原來是港督以及其夫人，只不過覺得他們好友善，所以邀請一起合影，事後才知道這對夫婦的身份
六十年代山頂的停車場，現在此處已改建成為山頂廣場。 圖左的 Peak Cafe今日仍然健在，早已被評為歷史建築物
Gloucester Hotel，即今置地廣場告羅氏打大廈，記得李我先生回憶錄說，當年因曾在此喝下午茶受辱，後來每天下午坐飛機從廣州坐飛機到酒店吃飯示威，想來只有那個年代，才能如此豪氣
六十年代從上環東街下望荷李活道， 其時生活環境艱難，婦女除了持家看顧孩子外，很多還會出賣勞力，賺取外快補貼家用，着實令人敬佩
五十年代的中環海濱長廊，正面可見皇后行，現已改建為文華酒店, 左邊可見部份匯豐銀行舊總行
六十年代的彌敦道，左邊可以見到麗斯戲院，是當的龍頭戲院，當年看電影是非常受歡迎的娛樂，旺角區有很多戲院，如東樂，大世界，百老匯，百樂門 ，文華等等，可謂百花齊放
三位來自星加坡的藝人，左起野峯，中間是鄭錦昌，右邊不用我介紹都知道是丑生王梁醒波了，可惜三位都已作古
六十年代占士邦片大行其道，香港片商見獵心喜，也拍了不少仿占士邦式的間諜打鬥片，此幀劇照來自1966年的金鈕扣，左邊的港版邦女郎是范麗，右邊則是怎麼樣看都跟占士邦沾不上邊的胡楓
六十年代尖沙咀彌敦道向北望向彌敦道和金巴利道交界, 樂宮戲院現已改建為美麗華酒店
七十年代的香港仔大街，不看照片還不知道，原來那時候漢華中學在香港仔設有分校
一幀色彩絢麗的干諾道中舊照片，圖片前方是永安公司舊大廈，現在當然已然改建，但原址仍是永安百貨公司， 一街之隔是海事處，現已拆卸並改建為無極限廣場
一輛拖着拖卡的電車，正緩緩駛過軒尼詩道，背景是灣仔地標舊循道衛理堂，此教堂於1992年拆卸後並已改建成為樓高22層的循道衛理大廈
六十年代干諾道中海旁，圖中四記白米那幢舊樓，我記得直至千禧年初仍屹立，可謂老而彌堅
六十年代初上環永樂街和林士街交界處，很喜歡那個年代女人所穿的大襟衫，讓我想起母親年輕的時候，也是這個打扮
四十年代中後期俯視文咸東街與孖沙街交界處，其時剛和平不久，香港市面普遍仍甚為貧困，一般人都是穿着唐裝. 圖左的梁財信跌打酒，算是香港的老品牌，我記得深水埗桂林街幾年前仍有間梁財信跌打館,不知道跟原裝正版的梁財信有沒有關係
我個人感觸很深的一幀照片，一電車，一斗蓬貨車，一前一後駛過填海前的西環海旁，絕對是我童年時代的美好記憶
估計是七十年代西環卑路乍街與和合街交界往東望向山道，其時未有山道天橋
六十年代維多利亞公園兒童遊樂場，我們這一代成長於六十年代的小朋友，都不會忘記那條又長又燙屁股的鐵皮滑梯
五十年代中環卜公碼頭，這是第一代的卜公碼頭，千禧年後政府將這個碼頭遷往赤柱， 讓港人憑弔. 當年卜公碼頭亦是巴士總站，可以說是當年的交通重要樞紐。這個位置現在當然已大幅填海，變成今天的交易廣場
五十年代第二街的露天街市，當年沒有什麼市政街市大樓，小販們只要看到空檔，便聚在一起售賣蔬果日用品，久而久之便變成為一個個露天街市
貓紙說這裏是尖沙咀，看樣子很像是尖沙咀火車站，降車囗？我相信應該是停車處，但為什麼是降車口？真有點木宰羊
那張香港仔舊相是為七十年代, 雙喜大廈建成於72年
回覆刪除謝謝資料提供, 已修改~~
刪除你好，本人十分喜愛瀏覽閣下之相集，每張相片都極美外，還加上了閣下對每張相都描述得細膩動人，入木三分，簡直一幅一幅的活歷史湧在眼前一樣！
回覆刪除本人乃七十後，但常跟朋友說笑，若真的能時光倒流，我希望能回到六十年代的香港，因為我十分渴望能看看當年的事物、人物及景物。
另外，本人對閣人之珍藏(相片)十分讚嘆，當中有些五/六十年代的照片，色彩斑斕，層次分明，請問是否用正片菲林(Slide)來拍攝呢？
再次感激閣下無私地分享！
謝謝謬奬，有空請多來坐~~
刪除南紅當年真的很美！
回覆刪除也祝版主身體健康，如賦閑在家，可否多寫點文章呢？你的文章都很精彩！謝謝：）
刪除對啊， 六十年代初的女星中，除了嘉玲和林鳳，我最喜歡的便是南紅. 另外我正在寫一篇與書局有關的網誌，希望能在下星期貼出來~~
刪除西環兄，
回覆刪除---很喜歡那個年代女人所穿的'孖'襟衫，讓我想起母親年輕的時候，也是這個打扮....---
是否為'大'襟衫呢？如無記錯，又好似另有一名為短衫褲，以別於長衫(即所謂旗袍)。
家母後生時多穿長衫，而先祖父每每穿唐裝禮絨鞋，印象中差不多'70年代中才改穿恤衫西褲，先祖母早期多穿大襟衫褲，熱天就穿黑膠綢，後期多穿對襟衫(即中襟開鈕那種，因老人較易穿著)。
本人多年前亦曾貪得意做過一套冬天男裝長衫加西褲，以期農曆新年時穿著，但因各種原由從未披掛上身，現今身型膨脹不少，絕無可能穿戴得下。
對啊，應該是大襟衫，手民之誤，已更正，謝謝指正~~
回覆刪除西環兄，
回覆刪除https://www.chinapress.com.my/20170515/%E6%83%85%E7%B7%A3%E9%A6%AC%E6%88%B2%E5%9C%98%EF%BC%88%E4%B8%8A%E7%AF%87%EF%BC%89-%E6%B2%88%E5%B8%B8%E7%A6%8F%E6%94%9C%E5%A5%87%E4%BA%BA%E7%95%B0%E7%8D%B8%E7%B4%85%E9%81%8D%E4%BA%9E%E6%B4%B2-%E9%A6%AC/
以上為沈常福馬戲團一些資訊。
多謝資料提供，會慢慢㗳~~
刪除芳華正茂時嘅謝賢嘉玲簡直係粵語片界嘅奇葩、亦係我嘅至愛明星，甚或今天影視圈亦無人能夠代替其當時地位。
回覆刪除沈西城亦曾言佢個人認為無論粵語片界甚至國語片界小生來講單論外型風度謝賢殺哂。
刪除我有同感， 60年代嘅小生中，謝賢係我嘅首選，佢高大俊朗，有時代感，而且除咗做傳統嘅純良青年外，又可以做二世祖，花花公子，形象係當年來講算係百變，個人覺得比胡楓，曾光甚至呂奇嘅戲路更廣。另外佢同嘉玲嘅情侶搭檔，亦係一絕，佢哋喺現實生活裏面亦都曾經真係拍過拖，所以喺銀幕上面嘅感情來得特別真摯~~
不過李翰祥曾讚賞話外型身高 camera face 等等比例均勻殺食嘅係男星'白雲'。白雲本身都係廣東人。
回覆刪除嘩，白雲？我相信冇六張野嘅香港人都未聽過佢個名，白雲素有中國華倫天奴嘅美譽，可以想像佢嘅外貌有幾俊美，賈真兄講得啱，白雲可以話係個跨語系嘅演員，拍過國語，粵語，甚至廈語電影，不過佢下場都幾淒涼， 80年代喺台灣日月潭暴斃，出殯時只有一個堂姪女出席，雖然如此，身後蕭條仍無礙於他在中國影壇嘅地位~~
刪除西環兄，
回覆刪除疫症當道，迫於賦閒在家，如不嫌我嘮叨，就講下電影以消磨時間。
上一次睇戲已是去年9月之事，因公在外，趁空去戲院睇 Downton Abbey(唐頓莊園)電影版，因我幾喜歡此類講及19世紀末20世紀初英國上流社會眾生相嘅戲劇，況且我一路都係其原版電視片集觀眾。
無可否認，英國佬拍此等片種係佈景道具、服飾裝扮、人物性格造型、對白表情、身體語言等等自有其過人之處，含蓄中暗藏階級歧視。嚴謹得蒞又不失人情冷暖，就算美國影視界財雄勢大，總無法拍出相同神髓，大英帝國爛船斬埋仲有三斤釘，無計。
我對個啲如超人，電光俠，鐵甲俠...等電腦合成電影從無好感，唯一會睇下蝙蝠俠個類。
---個人覺得比胡楓，曾光甚至呂奇嘅戲路更廣---
絕對同意，胡楓過於四平八穩，奸不起。曾江還好，可奸可忠兼充滿一種憤怒青年睥睨眾生感覺；難頂就係呂奇，過於奶油太刻意，講對白都滿含鼻音，非我所好。
謝賢中年後係無線拍嘅古裝武片造型演技，將其年輕時太富時代感負累盡掃。
---不過佢下場都幾淒涼， 80年代喺台灣日月潭暴斃---
不是暴斃，乃因年華漸老，生意失敗致財帛盡罄，前路無望，孓然一身，可能因年輕時過度漫浪，雖有子而不相往還，萬念俱灰下於日月潭仰藥身亡，或許有女兒或不致此亦未可料。
其生平可參考wiki: https://zh.wikipedia.org/zh-hk/%E6%A5%8A%E7%B6%AD%E6%BC%A2
回覆刪除哈哈，講起電影我就精神，尤其是係5,60年代嘅粵語片，我對呢個年代嘅粵語片情有獨鍾，主要係因為自己成長於呢個年代，所以對呢類型電影嘅文化，背景，以致傳統都有好深嘅歸屬感。最重要嘅係，睇返舊粵語片嘅演員所扮演嘅角色，以至喺電影裏面嘅語言，令我好自然就會諗起自已嘅長輩，親戚，每當見到譚蘭卿同梁醒波喺度嗌交，又或者高佬泉同埋陶三姑做嘅包租公，包租婆，內心就不期然有股䁔意，從心底升上來，呢個真係一種只可意會，不能言傳嘅心態。話返轉頭，5，60年代嘅男星之中，最型英帥靚正嘅無可否認就係謝賢，佢比同期嘅演員更多變化，當年嘅男主角唔會做奸角，但佢可以做花花公子，二世祖，所以比起其他同期其他男星更耐看，後輩演員當中，我相信只有劉德華可以與之比肩，但係兩人活躍喺唔同年代，所拍嘅片種唔同，所以好難做個公平嘅比較。一句題外話，小弟多年前曾經寫過一個名為街坊粵語片奧斯卡嘅網誌，詳列幾十位我最喜愛嘅粵語片演員嘅特色同埋專長嘅角色，唔知老兄有冇睇過？有何建議同埋看法？
西環兄，
回覆刪除當年粵語片撇除某啲(非全部)失準嘅七日鮮製作，最吸引我就係眾演員個種自然生鬼表演技巧，佢哋大多生活經驗充分，背景各異，嚐盡甜酸苦辣，又十之八九紅褲子木人巷出身，扮個樣似個樣，混身解數，睇佢哋做戲一大享受。
---後輩演員當中，我相信只有劉德華可以與之比肩---
所言甚是，就以鹿鼎記一劇來講，當年劉德華梁朝偉兩人年齡演藝經驗可以話差不多，但若將角色對調，劉自可輕易表達韋小寶特有輕佻脫兔性格，相反，梁就欠缺劉演康熙時滲透既英明神武、皇者風度。
即等於我依家仲講緊、當年搵梁朝偉做虯髯客真係得啖笑。除非係拍減肥廣告，減肥前嘅虯髯客係盧海鵬咁款，減肥後係梁咁款就無得講，梁無一忽似虯髯客，選角夾硬蒞，不過佢演憂鬱內斂就勝劉。
---小弟多年前曾經寫過一個名為街坊粵語片奧斯卡嘅網誌---
何時？Yahoo?新浪？Google? 時間久已，不能確定曾有否拜讀，文章今安在？可有留存於網海？
小弟自始至終都認為， 8，90年代係香港嘅黃金年代，唔講其他，就以今日嘅天王巨星而論，愚見認為，佢哋最巔峰嘅演出（未必係最好嘅作品）係8，90年代所拍嘅一系列港產片。（先此聲明，此處不論電影嘅質素，單論演出之生猛盞鬼），我對劉德華同買梁朝偉兩人最深印象嘅演出之一，就係有套名為「中環英雄」嘅港產片，唔知賈真兄有冇睇過? 兩人表演之生鬼，笑位嘅精準，可謂妙到毫峯。另外周潤發進軍荷里活前，亦拍過一系列嘅港產喜劇，撇開佢成名作如「英雄本色」或者「龍虎風雲」，我反而好欣賞佢拍過嘅一系列小品，譬如「長短腳之戀」，「鬼新娘」以及「義蓋雲天」等，好有香港仔嘅味道，傳承咗佢喺無線做爛達達青年嘅形象（譬如親情，網中人等）。 周潤發演技固然爐火純青，但係我始終喜歡佢鄰家青年嘅親切感，一種好貼地嘅情懷，而家環顧影視圈，似乎搵唔到邊個可以比到我呢種香港人/香港仔嘅味道。另外小弟 "街坊粵語片奧斯卡"網誌連接如下:http://oceandeeop3000.blogspot.com/2013/04/blog-post_16.html
回覆刪除又或者可以就咁喺Google搜尋 西環的黃金歲月 街坊粵語片奧斯卡~~
兄台提及嘅電影我非全部有睇，但閣下嘅意見本人絕對認同。不過，比較之下，我都稍為偏愛5/60年代明星演員，其中一位我覺得係極度underrated嘅就係'梅綺'，佢嘅演技簡直超班，如我係影展評審，實頒影后獎過佢；無論老嫩忠奸富或貧，風騷潑辣性感、楚楚可憐保守、古裝歌唱、時裝舞蹈樣樣皆能，同佢個阿叔---南海十三郎一樣，都係天才一個，亦同時係天妒英才遭遇。
回覆刪除我會去兄台提供有關網誌link慢慢細讀，唔該哂。
同意，同期女星之中，梅綺，紫羅蓮，周坤玲，都是比較under rated，尤其是梅綺，正如賈真兄所說，梅綺戲路很廣，既可以在危樓春曉做楚楚可憐的弱女子，又可以在金山大笑做傻大姐，更可以在情劫姊妹花中做陰險蛇蠍嘅妹妹，可以話係做乜似乜，入木三分，可謂係個天才型演員，可惜梅綺嘅一生亦甚為坎坷，日佔時期曾被日兵當着丈夫張瑛面前侮辱，此事造成兩人的心結，終告離異，另外她因為宗教信仰的原因，雖然身患舌癌，卻不肯接受傳統醫學治療而逝世，死時年僅43歲，甚是讓人惋惜~~
回覆刪除博主，你好
回覆刪除本人乃五十後，見證香港幾十年來興衰！感謝你的“西環的黃金歲月”提供歷史記錄，牽動無限回憶！請問 貴版的相片容許下載嗎？
此版中有關“降車口”的照片，如果地點是尖沙咀火車站，那是否在日治年代的呢？因“降車口”是日文來的。而且車種和行車方向都異於香港傳統。
另關於卜公碼頭的照片提及，碼頭於千禧年後搬到赤柱。在此豐富一點資料，其實卜公碼頭在六十年代拆卸後，被遷移至黃大仙區的摩士公園，重置在一個水池中央，是當區的一個景點。但是在千禧之後被遷往赤柱的。
多謝資料提供. 網誌內的相片當然可以下載, 但請不要轉載及用作商業用途, 謝謝~~
回覆刪除博主，
刪除謝謝！
不客氣~~
刪除