舊報紙廣告

好鍾意睇啲舊報紙嘅廣告，因為可以由呢啲廣告了解到當年嘅人情物貌，如果以今日嘅眼光嚟當時嘅社會情況，可能會覺得匪夷所思，但係亦都因為咁樣，覺得好有趣。最得意嘅就係如果你用當時嘅銀碼比較今日嘅物價，你會覺得嗰個根本係另外一個世界，甚至可能係另外一個星球。

東樂和東海都係何東家族嘅物業，剛落成嘅時候唔係用原有嘅名字，幾經轉折先至用聯合廣場嘅名字為物業命名

六十年代英皇道新樓， 一萬八千元有有交易，真係匪夷所思.  睇清楚個廣告有兩樣嘢幾得意，第一係買樓竟然會送樓，可惜係廣告裏面無交代清楚，第二係分期付款期限比較短，只能分15個月分四期期付清，同今日喺銀行做按揭，動輒30年嘅按揭期比較，當年嘅付款方式十分保守，所以你可以話真係好響應國內嘅口號「樓係用嚟住嘅，唔係用嚟炒嘅」。以六十年代人一般港人嘅收入，點可能咁輕易喺係一年內攞兩萬元出嚟買層樓

八十年代分類廣告，誠徵男友我明白，但係誠徵誼母，即係契媽？呢位仁兄嘅出發點又真係幾惹人睱想喎，最得意嘅就係佢會俾個選擇你，對象如果年輕，可以降為姊妹，但係講嚟講去，要搵個契媽或者姊妹做乜嘢呢？點解唔直接話誠徵女友？聽落都比較自然啲吖

圖為1963年嘅紅A牌花灑廣告，一般人都係用呢種花灑淋花，但係紅A牌就諗到，係制水期間，為咗節約用水，用花灑淋浴又真係幾好嘅限制用水方法，虧佢諗得到。廣告仲教埋你點用，你都唔好話佢唔細心。話時話，紅A都可以話係發制水財，當年佢啲水桶因為制水，啲人要搶購嚟裝水，所以曾經賣到斷哂市

哈哈，第一眼睇到呢個廣告，有啲納悶，點解頭痛都有三手嘅（二手頭痛都已經夠耐人尋味啦），睇清楚原來先至知道呢隻呢隻頭痛藥叫做三手頭痛粉，老實講，我都係第一次聽到頭痛要食藥粉，因為即使我靚仔嘅時候，都係聽見啲大人話頭痛食粒藥丸，所以估計呢個廣告應該係六十年代嘅事啦

五十年代嘅銀行廣告，當年崇尚儲蓄，亦視節儉為美德，所以好鼓勵兒童由細養成儲蓄嘅習慣，好多銀行亦因此推出兒童儲蓄戶口，除咗鼓勵兒童儲蓄外，亦希望呢個細佬成為銀行嘅顧客後，大個咗之後會繼續幫襯銀行。為咗吸引兒童開戶口，好多銀行會送一啲造型趣怪嘅錢甖，最經典嘅當然係匯豐紅色銀行總行嘅錢甖，依家相信身價不菲.話說回頭，我相信好多網友都會對崇僑銀行比較陌生，崇僑銀行其實五十年代由胡文虎創立，係一間規模比較細嘅華資銀行， 1972年被大華銀行收購，最後並被併入大華銀行

牛奶公司70年代嘅雪條廣告，其時雪糕市場競爭激烈，所以即使係老大哥牛奶公司都要別出心裁促銷產品，諗到用雪條棍做模型，你都咪話，呢個諗法都好有創意，雖然我諗唔到你要食幾多條雪條先至可以砌到一條橋或者個火箭發射台，但係站係公司角度嚟睇，當然你最好有咁多食咁多，最好就係買雪條為咗條雪條棍，咁就最理想啦（其情況就好似幾年前老麥推出買套餐送模型公仔，搞到好多人為咗個模型公仔買套餐，買咗又唔食嘅情況一樣）。另外佢哋又搞儲齊唔同嘅雪條棍可以換手錶，都可為謂絞盡腦汁，都係想你買多條雪條

上世紀初屈臣氏藥房嘅廣告，早年香港汽水俗名荷蘭水，原因係1850年代第一批汽水係由一首荷蘭商船運往中國，香港其實從未由荷蘭進口過汽水。另外我唔明點解由藥房買汽水先至最清潔衛生，當然當年藥房所售賣嘅嘢係最有保證，但理論上汽水係由汽水廠製造，同藥房無關。當然睇廣告唔好駁廣告

七十年代初地鐵最早期嘅規劃圖，當時唔係叫做地鐵，叫做地下火車，都幾過癮。原來當時規劃得好完善，將西環，何文田，土瓜灣等地都納入計劃內，何文田同堅尼地城要第一期通車之後30年先至開通，土瓜灣則起碼仲要等多三幾年

兩個1963年嘅廣告，一個去美國旅行一趟, 盛惠$6300 ，另外一個土瓜灣900尺唐樓售價$9400 ，相對返當年嘅人工，就可以睇到當年嘅生活方式同埋物價，以及香港樓價嘅荒謬.   1963年一般打工仔平均月薪大概$300 ，即係話你要儲兩年錢先至可以去到一次美國旅行，但係你儲三年錢就可以買到層樓，今日我諗去一次美加旅行都係萬五至兩萬蚊左右，係一個普通文員嘅一個至個半月人工，但係買層樓，就要起碼五至六年不吃不喝，兩者之間嘅差距不啻差天共地。 話時話，劉公子所講嘅去少兩次日本旅行就可以買到樓，如果佢講早50年可能會係啱㗎

荔園大概六十年代尾的報紙廣告，我仲記得當年荔園入邊有幾間戲院，可免費入場，放眏粵語片，西片，甚至有什技同埋歌舞表演，不過啲戲院嘅環境就好差，聲音同畫面差不在話下，戲院嘅牆壁甚薄，又透光，所以即使即使係靚仔，都唔鍾意喺嗰度睇戲。另外原來當年好多人喺荔園跌身分證，荔園就將成張身分證號碼列晒出嚟叫人認領，今日如果咁做肯定會俾人告佢侵犯私隱

穿銀行三萬幾銀櫃桶底，當年三萬蚊應該等於而家接近三千萬，呢位仁兄都夠狼死，唔知拉唔拉得返。又，當年應徵一啲同錢銀有關嘅工作，都要鋪保，其實係有道理嘅

 七十年代嘅先鋒牌音響系統廣告, 當時香港經濟逐漸起飛, 年輕人開始追求生活質素, 所以捨得使餞,  以一般打工仔平均月薪大概$600-$800嚟計, 拎$60出嚟供部音響設備唔算貴.  另外唔知你仲記唔記得"先鋒牌你的60天" 促銷活動? 呢個係當年先鋒牌由每年七月頭開始至到八月尾，即係學生放暑假時，做嘅促銷活動，通常呢個時候都會出新型號，加折扣優惠來推銷產品，而山水牌音響則用"買山水遊山玩水，得巨獎易如返掌"口號同佢打對台

秋風起，三蛇肥，酒樓食肆都推出蛇讌套餐，呢間金山樓每席$195 ，奉送蛇酒，啤酒和汽水，仲有鵲局蛇讌，打麻雀兼食埋蛇餐，每人都係15大元，我早排行過中環蛇王芬，一窩大蛇羹盛惠$1150 ，真係往事只能回味啦

六十年代觀塘剛落成嘅新樓賣$60 一尺，今日,,,,,