上集玩得興起，於是興起 "再斬四兩" 的念頭. 今次的題目有難有易，我相信認出其中十個八個應該不難，但要估中全部十五個便有點不可思議了，貴兄你看如何？
(1) John Austin, 飾演愛登士家庭 ( The Addams Family) 中的男主人高麥 ( Gomez Addams)
(2) Carolyn Jones, 飾演愛登士家庭( The Addams Family) 中的女主人摩蒂絲( Morticia Addams)
(3) Adam West, 飾演蝙蝠俠 ( The Batman) 中的布魯士韋恩( Bruce Wayne)，即蝙蝠俠
(4) Elizabeth Montgomery , 飾演歡喜冤家( Bewitched) 中的孫曼霞(Samantha Stephens)
(5) Linda Carter, 飾演神奇女俠 ( Wonder Woman) 中的戴安娜( Diana Prince)，即神奇女俠
(6) Stephen Strimpell, 飾演妙想天開 ( Mister Terrific) 中的史德(Stanley Beamish)，又名死火徳
(7) Lindsay Wagner, 飾演無敵女金剛 ( The Bionic Woman) 中的沈珍美 ( Jamie Sommers)
(8) Vic Morrow, 飾演百戰雄師 ( Combat)中的新德沙展 ( Sgt. Chip Saunder)
(9) John Hart, 飾演蒙面奇俠 ( The Lone Ranger)中的蒙面奇俠
(10) Chad Everett, 飾演杏林雙傑( Medical Center)中的加能醫生 ( Dr. Joe Gannon)
(11) Erik Estrada, 飾演鐵騎巡警( CHIPS)中的潘冶(Frank Ponch)，又名阿潘
(12) Diana Rigg, 飾演雌雄神探 ( The Avenger)中的費太太 (Emma Peel)
(13) Van Willam, 飾演青蜂俠( Green Hornet)中的布列( Britt Reid)，即青蜂俠
(14) Peggy Lipton, 飾演雌虎雙雄 ( The Mod Squad) 中的潘茱迪( Julie Barnes)
(15) Richard Dean, 飾演玉面飛龍 ( MacGyver) 中的麥嘉華( MacGyver)
難得有懷舊。我又再試猜。
回覆刪除(1)《愛登士家庭》男主角，忘記了他劇中的名稱。這套劇離經叛道，好玩到不得了，道德觀念簡直是為今人作了開創式的自主啟蒙。（話時話，記得安兄你有篇帖提到本劇是無線80年代播放，似是筆誤，應是無線60年代尾開台後一兩年間播放的，不過後來無聲無息在午間重播過，可能是80年代了，但又不久腰斬了。）
(2)《愛登士家庭》女主角，她吟詩或講國語什麼的，便會令男主角好high，不停吻她的手。
(3)《蝙蝠俠》主角Adam West喇。我仲睇過他的《蝙蝠俠》大電影，後來出DVD又買來收藏。
(4) 麗的劇，唔肯定。不過照查，可能係你舊帖提過的一套「神仙」劇，英文係Bewitched。
(5)《神奇女俠》Wonder Woman囉。呢個好易，佢保養得好。
(6)《妙想天開》（？）(Mr. Terrific)，男主角，食粒丸仔會飛天的。我記得有一集佢跌出窗口，在半空中食藥，即刻飛天保住命仔。（呢套劇好少人記得。）
(7)《無敵女金剛》沈珍美。保養得好好。
(8)《百戰雄師》(Combat)男主角（之一）。可惜佢有次拍片俾架直升機…（流淚中）。Combat遲至2000年代在内地播映，整套系列被人錄影然後翻成DVD在旺角舖頭售賣，估計老翻質素有限，我無買。佢最後套遺作電影"Twilight Zone: The Movie"我睇過。
(9)《獨行俠》（？）(The Lone Ranger)，呢套好難估，主角成日戴住眼罩，好難認。套劇好悶，我睇過幾集就無追咯。
(10)《杏林XX》（？），可能係《杏林雙傑》，呢套應該係第一套講醫生的電視劇，好睇。每集呢位英俊主角都醫好病人，終於有集佢醫唔到，睇到我眼濕。
(11)《？》，劇名忘記了，佢係兩位主角之一，做巡警駕電單車周圍巡邏。
(12) "The Avenger"，中文劇名在唇邊但又講唔出，女角Diana Rigg好靚，佢拍《鐵金剛勇破雪山堡》的尾場被槍殺，我真係對個編劇好不滿，又嬲又傷心。
(13) 哈哈，《青蜂俠》男主角呀。
(14) 嘩，《雌虎雙雄》都俾你搵埋出黎，佢係茱迪丫嘛，另外兩位男角係寧希斯（黑人）、比德（白人）。我最中意寧希斯，有一集佢地有仇家來報復，四個人處在室內講數，末場希斯發火想出手，被仇家近距離打一槍，佢咬住牙根再上前，對方再打一槍，天呀，主角唔可以死架，希斯倒下，同一時間比德飛撲推倒仇家，一邊怒吼一邊拳如雨下打到對方變豬頭，然後比德、茱迪淚流滿臉（我都係），大叫希斯你唔好死呀！完場。呢幕勁過「豆腐火腩飯」，完全係男人悲劇英雄式的浪漫。
(15) 估唔到。九成九係麗的劇。
安兄，我今次中幾多呀？
馮京作馬涼,西環大佬躺著也中槍,哈哈,快的同貴大哥搞清楚!你是你,老鬼係老鬼,嘻嘻!
刪除六十年代老鬼尚在"奴隸"身分時代,無緣睇電視同電影,所以西環大佬呢幾篇嘢,老鬼冇聲出!
貴兄果神人也，請受小弟一拜，老哥所估的14條全中，老實說其中有幾套片集如「妙想天開」，「百戰雄師」等，唔好話認得出主角個樣（仲要係老年版嘅樣貌，因為冇得Google ,認得出全憑對主角容貌嘅記憶），要講得出套片集嘅名都唔容易，因為呢啲片集係喺四，五十年前播映嘅，不過我有啲奇怪，點解你講唔出「歡喜冤家」個名，呢套片集絕對係六十年代配音片集經典中既經典，是否要怪罪伯母唔俾你睇麗的之故（一笑）。
刪除貴兄估唔到15號那位仁兄，我有啲驚訝，是否因為片集太新，（播映期由1985年至1991年）所至？，一句題外話，CBS最近重拍此片集，當然主角另有其人。另外，呢位仁兄近年身型暴漲，與主演片集時有天淵之別，可能也是令你認不出來的原因~~
可能我用尊稱時產生了誤會。「安兄」是「安東尼兄」的縮寫，「安東尼」是音譯Anthony，指博主。
刪除Kam On兄也是「安兄」，我初來甫到，不知名稱規例，講句對不起！敬請On兄見諒。
The Lone Ranger譯《蒙面奇俠》，對！點解我省唔起呢！
刪除《妙想天開》講主角會飛天，確實妙想天開，是我看的第一套「飛天」劇，所以記得劇名。第二套飛天劇似係無線的《艷尼傳》，相信博主亦記得。
新德沙展樣子沒多變，加上我看過他的遺作Twilight Zone，片中樣子跟你的貼圖同一樣子，自然一眼認到。
《歡喜冤家》其實我唔熟，以前只看過一些片段。我猜到主要係憑你舊帖的資料，和你對女角漂亮容顏的讚美，兼估你多數先用舊帖談過的視劇。我記得"Bewitched"係因為詞義跟劇情有關，但中文劇名就跟女巫、神仙、著魔等無關，所以連繫不上。
《玉面飛龍》完全無睇過。自無線開台，對大部份麗的節目我都無緣，阿媽話事。
哈哈,都是"谷哥天下吝盡人,相逢有運齊相識"老鬼叻唔切,會錯意,抵打!貴大哥, 我要道歉才是,老鬼主要唔敢滔大佬光,心急護大佬,謝過,謝過!
刪除西環大佬資料一籮勁過一籮,死人都要捧塲!!!
On大哥，西環大佬的資料勁到爆，我頂多稍稍認得舊片集主角樣貌，但大佬連所有劇中角色名稱都記得，我是佩服到五體投地。
刪除兩位兄台無須如此客氣，入得黎睇小弟個 Blog，都係想輕鬆下，懷下舊，緬懷一下昔日嘅美好時光，最緊要開心，係咪？
刪除剛才翻看安兄兩篇談配音電視片集的舊帖，發覺我真笨，劇名你早已寫過了。現在補抄過來。
回覆刪除(4)是《歡喜冤家》(Bewitched)。
(12)是《雌雄神探》(The Avengers)。
《愛登士家庭》你原文是寫七十年代播映，我錯記了你寫成八十年代。抱歉。你好厲害，連他們的角色名稱也記得。BTW，《柔道小金剛》我記憶中是六十年代的麗的片集，但我不肯定七十年代是否重播過。
(11)的劇名我查到是《鐵騎巡警》(CHiPs)。
(15)我無睇過，但查到了是《玉面飛龍》(Macgyver)。
全中, 相信又係開估既時候了~~
刪除