繾綣當年舊香江 1

 

唔講唔知，原來呢度係山道同埋皇后大道西交界處，同今日嘅風景真係完全拉唔上關係（今日此處已改為今旅酒店）。不過睇返舊相，呢個位以前原來係間酒莊

四十年代中上環皇后大道中嘅中央戲院，其時剛重光不久，戲院還未回復營業。中央戲院當然已然折卸，並改建為中央大廈

此處睇落似係啲離島碼頭，但其實呢度係四十年代嘅尖沙咀藍煙𠧧碼頭，拆卸後改建為新世界酒店及商場，再度拆卸後2019年重建為K11

七十年代嘅亞皆老街，右邊係恒生銀行大廈，而圖片正方嘅龍樓酒家已經變成馬會場外投注站

五十年代嘅新樂酒店，當年剛落成不久嘅新樂酒店，喺彌敦道顯得鶴立雞群，可惜呢座咁有標誌性嘅建築物，仍然難逃被拆卸改建嘅命運

由皇后像廣場向東望去，前面係舊香港會，後面即為富麗華酒店。我對富麗華酒店嘅最深印象當然係佢哋嘅旋轉餐廳， 70年代中學畢業舞會即在此舉行，喺酒店宴會廳食晚餐同埋跳舞，對我呢個鄉下窮小子來講，絕對係一個難忘嘅經驗

相信唔少六七十年代出生嘅小朋友都做過嘅暑期作業簿，當年我一邊做，一邊鬧，點解會有咁變態嘅人，連小朋友嘅暑假都唔放過，搞啲作業簿出嚟虐待我哋.  開始嘅時候我都好乖每頁都做，後來發覺老師既唔睇又唔改，於是學精左，隔一頁或者隔兩頁做，又過到骨。先此聲明，呢啲嘢小朋友唔好學

七十年代嘅灣仔莊士敦道，右邊可以睇到難得一窺全貌嘅蘭杜街麗都戲院，地盤處係今日仍然健在嘅大生商業大廈

五十年代往九龍城嘅灣仔碼頭

六十年代位於皇后大道中/水坑口交界嘅富隆大茶樓，富隆除咗係經典嘅舊式茶樓以外，最為人熟知嘅係南音大師扗煥曾經喺呢度獻技，被記錄下來，呢段錄音可算係非常珍貴嘅香港次文化歴史文物

五十年代從疏利士巴利道望向半島酒店，正中嘅噴泉柱頭，迄立在半島酒店正門至60年代中，後來因為酒店裝修，將噴泉柱頭拆卸後贈予大坑真光女書院，一直保存至今

七十年代中位於德輔道中嘅連卡佛大廈，一座如此經典嘅大廈於1977年被拆卸，重建為置地廣場。當年置地公司為了籌建置地廣場，拆卸了告羅士打行，連卡佛大廈，溫莎行，公主行，和公爵行等幾座非常典雅富有歷史性嘅中環建築物，連卡佛大廈後來搬往干諾道中，重建成連卡佛大廈，圖中連卡佛大廈右邊嘅地盤其實係已經拆卸嘅告羅士打行，據說曾是香港最高嘅建築物

五十年代嘅荷李活道/皇后大道西交界處，左邊直上係當年嘅大笪地，今日已改建為荷李活道公園

五十年代閣麟街和皇后大道中交界處，我有種感覺左邊個位仁兄喺度整緊捲煙。後邊可以睇到三陽醬院

五十年代灣仔莊士敦道近灣仔道交界處，左邊可以見到我哋好多老朋友，馮良記， 敏如茶室，梁蘇記，以及英家酒家。今年年頭連馮良記都因為舊樓拆卸而搬入大有商場，呢度嘅風景已然面目全非

呢度係銅鑼軒尼軒道與怡和街交界處，圖中那座淺啡色建築物係紐約戲院.  左邊嘅滄州臘味，唔知有冇網友食過

我好鍾意喺呢個位影嘅舊相，唔知點解有種好濃烈嘅熟悉感。呢度係德輔道西轉入德輔道中交界處，遠望係德輔道中海皮，再過啲就係港澳碼頭/大笪地

香港仔晨光大茶樓為擴張營業而掛嘅花牌，有成兩層樓咁高，真係好誇張

現實版嘅涼茶馬尾飛機頭，一睇到呢啲舊相，我個心就被融化掉，除咗童年時代好流行嘅理髮廳，涼茶舖外，外加一班靚仔喺度打康樂棋，活脫脫就係當時街頭嘅寫真

鍾意食乜嘢就叫，我請

七十年代般咸道/高街交界處，右邊嘅舊樓已然拆卸，改建為豪宅麗怡閣和般咸軒

從皇后大道中和金鐘道交界處往上望向希爾頓酒店，有一段時間因為我在附近工作，所以經常幫襯希爾頓酒店的餐廳，如Cat Street， Dragon Boat，California，以及鷹巢中餐廳，都是很美好的回憶，不知道網友有沒有在希爾頓3樓的大利亞理髮店理過髮?有一段時間我經常幫襯這家老式理髮店，師傅們都很細心貼心，希爾頓拆卸後大利亞曾搬往美國銀行中心，惟最終還是黯然結業

七十年代由皇后大道西正街交界處往上望，左邊可以見到好多凍肉舖，當年凍肉舖係比較新鮮嘅事物，我中學嘅時候每逢旅行都會去正街啲凍肉舖買雞翼，豬扒，作為燒烤之用

六十年代位於南昌街嘅有男茶室。睇照片就知道呢類舊式茶樓嘅死因，成幢樓一間茶樓，點會唔惹來地產發展商嘅垂涎？不過我真係好鍾意呢啲廣州騎樓嘅建築物，老闆仲喺向街方向加建帳篷，落雨天擋雨，大熱天就擋太陽曬，真係好貼心

六七暴動之後，香港政府為了粉色太平，凝聚民心，搞了個香港節，這是大概六九至七零年間香港節其中節目之一，夜間花車巡遊，相中霓虹燈招牌燦爛，伊人恤，醉瓊樓， A B C大飯店，聲寶電器，都是香港人幾十年的老朋友，看得讓人溫心暖胃