童年趣事

上星期和幾個睽別兩年多的朋友吃晚飯，長時間不相見，大家再聚首，興奮之情自不待言，席間當然是大談童年或者年青時代的趣事/瘀事。感嘆之餘，遂把大家記得的往事記述如下，或者，當年那幾個懵懂少年可能曾經與各位擦身而過

*坐車去新界旅行，捐山窿之前火車司機會喺廣播系統預先宣布，叫各位乘客閂窗，以免煤屎飛入車廂內，期間車廂內會熄燈，於是火車捐山窿嘅時候車廂內一片漆黑，靚仔嘅時候覺得既刺激，又興奮。又及，我到而家都唔明點解火車過山窿嘅時候會有煤屎飛入車廂

*靚仔嘅時候旅行目的地大多數係沙田，估計六，七十年代沙田仍處於半開發，半郊外嘅狀態，交通比起其他新界地方都方便，但又保持住鄊郊嘅風味，所以無論學校或者家庭旅行，都會選擇沙田作為目的地。去沙田旅行嘅目的地大多數係西林寺，萬佛寺，紅梅谷等地方。去西林寺就梗係食豆腐花，去紅梅谷就梗係野餐，但唔會去龍華，一來唔就腳，二來價錢比較貴。至於拍拖勝地雍雅山房，童年時代從來未去過，呢啲有錢人飲下午茶嘅地方，我等窮家小子，何來此等等閑錢/閑情逸致去嘆茶

*新年𢭃咗利是，就會第一時間去荔園。荔園就相等於而家嘅迪士尼樂園，或者海洋公園，小朋友趨之若鶩。去荔園入場第一時間會去探大笨象天奴，跟住掟階磚，中咗就會贏排白箭香口膠，跟住就會成班嘩鬼入鬼屋探險，反而好少入劇場睇過表演，可能靚仔無此等耐性，因此與未成名之前嘅鄭少秋，梅艷芳，或者七小福緣慳一面

* 坐纜車上山頂，然後用望遠鏡望落中環，睇吓有幾多個老襯。又係嗰句，冇資格去凌霄閣飲咖啡，另外我好大個都唔知原來所謂老襯亭唔係凌霄閣，而係要行多幾步，去到盧吉道嗰邊嗰個獅子亭先至係名副其實嘅老襯亭

*去旅行就一定要帶個紅A水壺，食嘅就係方包，夾嘅食物包括蜜汁豆，午餐肉，罐頭沙甸魚，零食有花生，大白兔糖，偶然富貴啲嘅會有幾粒農曆新年食剩嘅花街朱古力

*睇戲就梗係要買買埋埋好多零食入戲院，一邊食一邊睇（有時候我都會懷疑，究竟入場係為咗睇戲，定為咗食零食）.  戲院門口星羅棋布嘅零食檔簡直可以話係個小夜市，你諗得出嘅有，諗唔出嘅亦都有。最受歡迎嘅當然係煨魷魚（一定要加搽辣豉油），炒栗子，熱蔗等。另外亦有口立濕嘢譬如話梅，酸薑，鹹酸菜（一定要加好多芥辣），其實仲有好多攞唔到入場嘅熱食，譬如牛雜，魚蛋等，就要入場前食完，因為守喺門口嘅職員唔會俾你攞住串魚蛋或者牛雜入場(當然偷偷地攞入場者大有人在)

*依稀仲記得有人周街叫賣衣裳竹，鏟刀磨鉸剪，而我真係見過有人買飛機欖，不過就真係冇影視描述得咁神奇，好多時候個飛機欖佬都會失手，要掟三幾次先至掟得中顧客嗰一層

*堀頭街（即係三面環樓，只有一面開放比車出入嘅私家街道）係靚仔嘅遊樂場，因為車輛稀疏，所以好放心喺度玩樂，遊戲除咗踢波之外，仲有當年靚最流行嘅射波子，掟仙，拍公仔紙，跳橡筯繩，捉依因，撲匿匿，123紅綠燈，只要幾個靚仔聚埋一齊，就可以玩得不亦樂乎

*年紀稍大，可以自由行動，一到放假都會自行搵節目，食過晚飯，袋裏面有幾個錢，就會呼朋喚友，去上環新填地行，食吓豬油炒田螺，買下翻版唱碟，或者睇人照田雞，聽下細佬雄講鹹濕故仔，擾擾攘攘咁又過一晚，港島嘅人去新填地，九龍人就去廟街，各自各精彩

絮語 5

(1)早排和同輩嘅朋友傾起，童年時代俾老竇老媽子打嘅經驗，當年父母所祭出嘅武器各有唔同，有比較正宗嘅嘅藤條，雞毛掃，亦都有隨手攞起嘅衫架，拖鞋，間尺, 拖鞋, 最誇張嘅係擔挑同埋衣裳竹，總之各適其適，打得就手就好。我其實想講嘅係, 我哋嗰輩俾屋企打閒過立秋，但係完全唔會對父母心懷怨恨，主要原因，其一係感恩，第二係同理心；一來當年打仔係家家戶戶父母指定運動動作，靚仔完全唔覺係一回咩事，二來最重要嘅係，細路仔通常都好體諒尊重父母，我老竇每日貪早摸黑咁返工賺錢，為嘅都係一家溫飽，阿媽一個人照顧四五條化骨龍，洗衫煮飯買餸，筋疲力盡，父母耗盡自己嘅畢生精力照顧仔女，打罵本質上亦都只係希望啲仔女好，呢個細路仔係明白嘅，所以根本唔會儲存怨恨，父母年紀大咗之後，我哋呢一輩都會盡心盡力咁去照顧佢哋嘅晚年。反觀現今九十後以降嘅後生仔女，佢哋嘅父母教育水準高咗，唔會輕易出手打罵子女，但奇怪，呢一代嘅年青人長大之後，對父母反而冇咁深刻嘅尊敬，更遑論照顧.  喺佢哋心目中，父母養育子女天經地義，成年獨立之後嘅經濟支持不在話下，年輕時更需要大量嘅親子活動去滋潤佢哋嘅童年（呢樣嘢喺我哋嘅成長年代係不可想像，老竇日日返工十幾個鐘頭，返到屋企已經攰到連嘢都講唔到，邊得閒親子？何況當年亦無親子呢個概念）。近年發生嗰幾宗倫常血案，子女因為怨恨父母冇按照佢認為適當或者需要嘅形式喺經濟，物質或者精神上面支持自己，遂掄起屠刀剌向父母，我心諗，喺嗰剎那，又或者係佢哋計劃傷害父母嘅日子裏面，佢哋有冇一絲一毫念及，呢兩個人，即使唔十月懷胎生我，有直接血緣關係嘅父母，但點計都係為咗養大自己，曾經付出無限血汗淚嘅人, 點可能咁狠心落得下手？當然我咁諗係好理想，呢啲人如果稍有血性，就唔會做出咁喪盡天良嘅事

(2) 啱啱瀏覽到一啲划艇仔嘅舊相，勾起我對划艇仔嘅一啲記憶。六七十年代，划艇仔係一個幾流行嘅戶外活動，好多時候去旅行，都會搵一啲有划艇仔嘅地方，曳搖共對輕舟飄一番。我第一次划艇仔係喺荔枝角海灣，嗰陣時有大哥哥帶我去荔園玩，出嚟意猶未盡，再划多兩個鐘艇仔。當年荔枝角大橋仲喺海中心，我哋划到橋底再跳上橋躉玩個不亦樂乎，今日滄海桑田，而家荔枝角橋已成市區高速公路。讀中學嘅時候去旅行，偶然都會搵一啲有划艇仔嘅地方玩，譬如沙田畫舫，又或者馬料水（即係今日嘅大學站）.  講起馬料水划艇仔，我當年曾在此遇險，當日扺達馬料水嘅時候，天色已經非常昏暗，但年青人天不怕地不怕，決定繼續划艇仔嘅行程，一班同學租咗幾隻艇仔出發，但划到海中心忽然狂風大作，暴雨傾盆，艇仔喺海中心狂打轉不受控制，我們正不知如何是好之際，一位同學竟自告奮勇說要游上岸找艇家求救，並二話不說噗通一聲便跳入海裏面，旋即失去蹤影，我們則驚惶萬分，不知那個同學情況如何。好在他在途中遇見開著電船尋找我們的艇家才獲救。我在想，假若當日不是艇家救援，那同學真有可能會溺死在海中

(3) Rolling Stone 雜誌最近推出有史以來最佳200名歌星排行榜，這類型的排行榜因個人口味問題，肯定不會盡如人意，但今次的排名着實讓人萬分驚訝和莫名其妙， Karen Carpenter竟然只排到123，比Rihanna的68還低55名，比排名40的Aaliyah更低83位，這樣的結果怎能服衆？我不知道這個榜以何標準作為排名的根據，但單純歌聲的震懾力，讓人迷戀程度，以及耐聽性來說，Karen絕對比Aaliyah, Rihanna更勝一籌。我明白也許這個排行榜應該是由年青人去處理和編輯，今日2 ，30歲的年青人即使聽過Karen Carpenter的歌，但也不會太感冒，然而若專業地以歌藝技巧和歌聲嘅耐聽度來量度，Karen Carpenter的排名怎可能如此低，但想深一層，其實也不必太在意，歌聲在人心，在腦海裏面，不論多少流行榜將karen排在第幾位，相信在眾多資深樂迷之中， karen那如怨如慕，如泣如訴般的磁性歌喉，彷彿捕捉着你的靈魂，已永駐在歌迷的腦海裏面。講開Karen Carpenter，她的好歌多若星辰，有時候即使一些不那麼著名和流行的歌曲，但只要你靜下來欣賞，仍然讓人覺得很舒服，彷彿在聽她說故事的感覺。karen那麼多歌當中，我最喜歡的不是耳熟能詳的Close To You， Rainy days and Monday，Superstar，而是A song For You，在悠揚的色士風中， karen彷彿向她的歌迷道別，她以婉轉而柔腸百結的歌聲，道出 

「I love you in a place

Where there's no space or time,

I love you for my life

You're a friend of mine.

And when my life is over,

Remember when we were together,

We were alone

And I was singing this song to you」

不翻譯了，原汁原味的理解，更能㗳出箇中的真意.  聽到這裏，只要是喜歡Karen的歌迷，都無不為這個恍如流星閃過的歌手感到惋惜甚至悲傷，又或者，dying young更添世人對karen的珍惜和懷念，我在想，是不是上帝感到寂寞，召喚Karen回天上唱頌歌給他老人家聽？

 

(4) 唔知各位有冇發覺，而家去茶餐廳食嘢，連茶膽茶都欠奉（你要飲嘢就唔該另叫飲品，當然按正價收費）。若然要水就要特別問夥計攞（其實而家大部份茶餐廳所提供嘅水杯水，顧客都唔會用嚟飲，大多數都只係用嚟洗刀叉筷子），高級些少嘅茶餐廳譬如太興，翠河，就每台備有熱水壺同埋茶杯俾你任斟暖水，但仍然係冇茶，有啲粥麵則按人頭收取每位$5茶錢，提供嘅只係一杯熱清茶，連茶壺都冇，唔知點解我有種淪落嘅感覺

(5) Uncle Ray走了，享年98歲，我唔想用乜嘢香港音樂教父嚟形容佢，讀中學嘅時候，開夜車鋤書，都會聽住All the way with Ray ,佢個把低沉而帶有磁性嘅聲音，夜晚聽落真係好舒服。一個小插曲，有一晚佢嘅節目忽然播「半斤八両」，之後佢解釋話呢個節目不嬲都唔播中文歌, 但因為許冠傑俾咗首播權佢，所以佢破例喺節目度播中文歌.   另外，佢個節目係可以俾人打電話入去點歌嘅，我曾經打過無數次都打唔通，唯一一次打得通，有個鬼妹問我點乜嘢歌，我口震震咁話要聽Blowing In the Wind，但到節目結束都冇播到

(6) 2022年港產片谷底反彈，氣勢如虹，當中四套新片成功躋身香港電影市場華語片最高票房紀錄前50名，我真心為香港片開心，驕傲。近十年，唔使我講，稍為有留意港產片嘅觀眾都知道，本地片萎縮得好緊要，被外語片，合拍片打到透不過氣來，其中原因甚多，不贅。但去年由 "明日戰記" 領軍，大破票房紀錄，然後 "飯氣攻心"，"闔家辣"，"正義迴廊"，"我阿媽有咗第二個"等都斬獲不俗嘅票房，可惜香港戲院商始終比較注重眼前利益（先此聲明，在商言商，呢個做法冇錯），cut戱cut得好快，以至有兩三套我想睇嘅電影，譬如"窄路微塵"，"給19歲的我"，"緣路山旮旯"，尚未來得及場入場觀看已經落畫，甚可惜，也告訴了我一個事實，要看較為邊緣嘅港產片，要及時，要快

(7) 香港現今影壇當中，我最看好張繼聰。在我看來，張繼聰很可能會是下一個張家輝，他和張家輝的發展途徑很相似，張家輝在上位之前，做過好多滑稽古惑仔的歌色，通常都是劉德華和古天樂的下把，負責攪笑，後來在"激戰" 中破繭而出，轉跑到成為演技派, 張繼聰的情況其實差不多，直至這兩年之前，他的角多數是搞笑小人物，無膽匪類但卻又心地善良，這些角色他演來讓人看得很舒服。這兩年他逐漸接了一些較為嚴肅的角色，發揮也很好，"飯氣攻心"已看出他的潛能，然後"窄路微塵"，做一個心地善良的小老闆，給觀眾留下深刻的印象.  我大膽預測，張繼聰只要能接下一套近似張家輝激戰的角色，便能成功突圍，接棒成為下一代的香港影壇的中流砥柱

(8) 好鍾意急景殘年嘅氣氛，喺我記憶之中，童年同埋青年嘅時候，一過咗臘月十五，通街通巷都係賣賀年飾物，食物，甚至有人開檔用毛筆寫揮春，空氣中彌漫着一種既忙碌，又興奮嘅氣氛。街上行人行色匆匆，大家趕住辦年貨，緊張得來又彌漫著一股按奈不住嘅喜悅感，六,七十年代，農曆新年係人人心目中嘅大節日，那時候又不作興趣外出旅行，為家裏佈置過年裝飾，準備團年和開年飯，係每個家庭主婦嘅頭號大事，也感染着我們這些靚仔，期待着新年的來臨。今時今日，農曆新年大家都外出旅行（呢三年新冠疫情除外），加上年輕人都不作興拜年，或者按住新年傳統去慶祝，總覺得新年氣氛越嚟越淡薄，或者再過十零廿年，新年只會蛻變成為一個放假嘅日子，唔會再引起任何興奮，同埋期待感

(9)  話時話，有冇網友試過晾衫時失手，成支衣裳竹跌咗落街？我就真係試過，不過嗰陣時唔係住公屋，只係唐樓嘅二樓，好彩無扑親人，落樓執返就算。以前行過公屋，見好多人用衣裳竹曬菜乾，臘味，相信而家唔會有人咁做，唔值咩錢，又有衛生問題，遇上缺德鄰居，啲肥油滴晒落樓下單位，就真係多得佢唔少

(10) 中午期間行過學校區，見到好多學生三五成群咁行出嚟去食飯，心裏面不期然有種悠然我心嘅感覺.  讀中學嘅時候，放中午飯係令人身心愉悅嘅時刻，上咗一整個上畫嘅堂，身心疲累之餘，個肚亦會打咕咚，一聽到落堂嘅鐘聲，即刻飛身衝出課室，同幾個志同道合嘅同學，由般咸道行落水街，簡單啲嘅有東南餐廳食個常餐，又或者行落皇后大道西嘅茗芳整個火腩飯，或者豉椒鮮魷飯，再唔係行遠啲去正街，聯華茶餐廳嘅洋蔥豬扒飯都好唔錯（聯華今日仍然健在，簡直奇蹟），碰啱嗰日下晝有測驗，或者輪到自己班打乒乓波，就唔會行好遠，求其喺水街口檔魚蛋粉食碗魚蛋粉，甚至喺佢隔離嘅豬紅豬皮車仔檔整碗豬紅豬皮麵求其填飽個肚即可。但問題係中學正當發育時期，一碗雲吞麵或者豬紅豬皮麵點夠飽，到咗三點鐘個肚就抗議，唯有小息嘅時候去小賣部補飛。俱往矣，而家睇住啲學生青春稚嫩嘅面孔，片刻間讓我回到當日嘅無憂無慮嘅日子

絮語 4

 

(1) 我記得八十年代啱啱出嚟做嘢嘅時候，所申請嘅第一張信用卡係AE Card, 嗰陣時候信用卡都算係身份嘅象徵，申請嘅時候要收入證明，如果申請金卡或者黑卡仲要公司寫擔保信，而且每年仲要交年費（已經唔記得幾多錢,好似都要成 $1000 ）。而家香港仲有商舖收AE, 但我估應該唔會收Diner掛？

(2) YouTube嘅內容千變萬化，多姿多彩，可謂目不暇給，其中有一個類別就係將明星嘅當年同埋今日嘅照片（其實主要係顏值）對比，讓人感慨時間呢個神偷，除咗偷走咗多少人嘅青蔥歲月，仲更加奪走人嘅美麗容顏.  我好抗拒呢啲視頻，無他，唔想破壞當年女神們喺我心裏面嘅美好形象。就以八十年代香港影壇最百花齊放嘅時候嚟講，當年當紅而靚爆鏡嘅女性不在少數，林青霞，王祖賢，張曼玉，鍾楚紅，邱淑貞，每個都艶靨如花，芙蓉如面，今日大部份女性都已登陸，雖然不至於雞皮鶴髮，但當然不再青春少艾，其中不少風采依然，但容顏無可能和當年相比，故此，我固執地唔睇呢啲視頻，偶然喺報紙或者社交媒體見到個別女星嘅近照，亦只會好奇瞄一下，因為我心目中，早已將佢哋當年驚艶影壇嘅容顏急凍喺腦海裏面

(3) 行街行經一啲熟悉嘅街道，見到以前經常去嘅地方，而家都紛紛拆卸重建，都有種莫名其妙嘅唏噓感，譬如行過大有商場，就會唸返起以前嘅英京酒家同埋東方戲院; 行過國泰商場，就會記得起以前國泰戲院; 灣仔交加里the vine,就會記起以前京都戲院; 渣甸街京華中心，就係當年嘅京華戲院，當然仲有已經變咗華明中心好耐嘅太平戲院。呢啲地方以前留低唔少腳毛，中學時候喺呢度睇戲，行街，打鬧，今日街道依舊，人面卻全非了.

(4) 早排天水圍大停電，造成好多人叫苦連天，怨聲載道，其實在我的童年時代，停電閒過立秋，每隔一兩個月就會停電一次，所以家家戶戶都一定備有蠟燭，電筒，一旦停電就會拎蠟燭出嚟點，而且當年大部份人都係住喺唐樓，一到停電，啲細路仔就走哂落街玩，反正喺屋企黑孖孖，做唔到家務, 功課，就不如落街玩，所以其實停電對細路仔嚟講唔係壞事，反而仲多咗一個大家額外喺街頭開Party嘅歡樂時光

(5) 有人話，如果你想測試同某個朋友嘅交情有幾深，好簡單，問佢借錢就得，至於交情深淺，就要睇所借嘅數目有幾大。我諗絕大部份人都有俾人借錢嘅經驗，我好彩，除咗靚仔嘅時候問同學借錢買零食之外，成年之後未試過需要向人借錢，但別人向我借錢嘅次數就不少，不過數目唔算大，多數都只係作為短期周轉，而且好快就歸還。記憶中我借過最大數目都只係三幾萬,好在對方亦都喺約定嘅時間之內歸還。至於個別朋友，三番五次嘅三幾千元就在所難免，我會諗，江湖救急，自己能力許可，幫吓人亦無妨，但部份朋友借咗錢之後之後諸多藉口，拖延歸還，甚至去如黃鶴，就有啲傷感情。所以都係嗰句，朋友之間最好唔好有錢銀嘅瓜葛，呢句話真係千古不易嘅至理名言

(6) 五，六十年代，貧窮處處可見.  我童年時候住喺西環，老竇喺魚市場返工，當年有好多女人喺魚市場執跌落嚟嘅蝦頭魚尾，拎去厚和街擺檔賣，我親眼見過有個女人為咗搶住執由蝦桶跌落嚟嘅蝦，俾人一腳踢到瞓咗喺地下，佢翻身坐起身，搓下個心口低頭行開，嗰陣時仲係靚仔, 覺得好難過, 亦反映當年搵食絕對艱難. 六十年代嘅西環厚和街，就有兩三個女人專門賣呢啲喺魚欄，蝦欄以至菜欄跌出嚟或者丟棄嘅魚蝦同埋菜，其中有個叫班美嘅我仲好記得，佢叫做班美嘅原因係佢塊面長有天花後遺症所做成嘅豆皮，傳聞佢有幾個仔女要養，自己又冇學識，只能夠日頭去魚市場執啲頭頭尾尾去厚和街賣，我老竇見佢可憐，就叫舖頭嘅夥計將每日食剩嘅飯菜留俾佢，其時我住喺舖頭對面，好多時候見佢喺後門等，個伙頭開完飯之後就將啲食剩嘅飯菜攞俾佢，每次佢都千多萬謝，呢個影像我至今仍記憶猶新

(7) 好多人抱怨話茶餐廳越嚟越貴，其實茶餐廳上流化，都不自今日始。近呢十幾廿年，因為自由行以及其他種種原因，租金, 人工飛升，真正嘅老牌茶餐廳多數都做唔住，近年開設嘅茶餐廳，－來為咗吸引年輕食客，二來亦都要為加價合理化，所以都要做大量包裝工作， 而迎合潮流嘅最佳做法就係以冰室， 冰廳命名，走懷舊路線，企圖喚回港人對茶餐廳黃金年代嘅緬懷，但價錢卻絕不大眾化。不過又咁睇，時代巨輪向前滾動，冇理由希望新開嘅茶餐廳一成不變，而家新派茶餐廳提供食品五花八門，絕非老牌真正冰室（譬如祥香以至澳牛）嘅出品可比，呢樣嘢係值得可喜之處。我雖然係老餅，但我亦都贊成同埋支持茶餐廳嘅改革，時代唔同，口味亦隨著需求有所改變，唔通希望啲茶餐廳好似五, 六十年代嘅冰室咁，淨係提供早餐同常餐咩？

(8) 有時候覺得世事真係好奇妙，冥冥中好似有聯繫.  譬如講，王羽和焦姣係銀幕嘅拍檔，情侶，合拍過獨臂刀，獨臂刀王，大刺客，都係做情侶或者夫婦，然而佢哋喺真實世界裏面冇任何感情嘅關連，但係，喺現實生活裏面，佢哋卻冥冥中被聯繫在一起.  王羽嘅前妻係林翠，而林翠嘅大佬係曾江，曾江嘅老婆恰巧就係焦姣，所以王羽和林翠嘅女王馨平就叫焦姣做舅母，咁我唔知王羽同焦姣喺現實上用算盤嚟打係乜嘢親戚關係，總之，命運嘅奇妙安排，將佢兩個又聯繫在一起

(9) 如果話英女皇係國家層面嘅定海神針，咁我會認為， Paul McCartney唔單只係喺流行樂壇，甚至係流行文化裏面嘅定海神針，當然同佢同級嘅仲有幾位殿堂人物仍然健在，譬如Bob Dylan,譬如Mike Jagger, 但論到貼地，同埋與大部份人成長有密切接觸同埋影響嚟計， Paul McCartney可以話係只此一人，別無分店。坦白講，你可以即時哼得到幾多隻Mike Jagger或者Bob Dylan嘅歌，而你又可以即刻唱到幾多隻Beatles嘅歌?就係咁簡單

(10) 香港有三大賭場：(i) 馬場: 馬會抽起~15%才派彩，長賭必輸 (ii) 股票市場: 散户遲過三類人收到消息; 公司董事局、核數師、做市機構，故輸多贏少 (iii) 樓市：地產商提供複雜的回贈/付款辦法托起表面樓價，小業主很容易高價接貨. 深入一點嚟講，而家好多報道話二手樓市頻頻蝕讓個案，動不動都話蝕2，30%，令到啲新買家心郁郁，覺得上手業主蝕咗咁多，會執到平貨, 但其實因為第一手業主攞咗供應商好多回贈，亦都喺地產代理嗰度攞返唔少回佣嘅回扣，所以其實冇表面樓價貶值咁多，某方面嚟講可以話係誤導。不過又咁講，由六十年代香港買樓可以分期付款開始，唔少人辛辛苦苦儲埋積蓄，由買第一層樓開始賺到第一桶金, 以至買到幾層樓收租 (都唔好講啲炒樓發達嘅人)，都係拜地產市場蓬勃興旺所賜，故此不可否認, 買樓發達嘅人，遠比賭馬同埋炒股發達嘅人多

Maggie與Monica

 

世情本來便有很多巧合的地方，但兩首很受歡迎的流行歌曲，一中一西， 卻非常巧合地訴說着一個非常相似故事，情懷，便令人覺得趣味盎然，值得記上一筆。

我說的是Rod Stewart的Maggie May和張國榮的Monica，兩首歌無獨有偶的都是在訴說着少年/青年和比自己年長女人的情慾/情感故事，當然在內容的表述和表達方式來說各不同，且讓我細細道來。先說Maggie May, Maggie May是1973年Rod Steward 推出的single,其歌詞是：

Wake up, Maggie, I think I got somethin' to say to you

It's late September and I really should be back at school

I know I keep you amused, but I feel I'm being used

Oh, Maggie, I couldn't have tried any more

You led me away from home

Just to save you from being alone

You stole my heart and that's what really hurts

The mornin' sun when it's in your face really shows your age

But that don't worry me none, in my eyes, you're everything

I laughed at all of your jokes, my love, you didn't need to coax

Oh, Maggie, I couldn't have tried any more

You led me away from home

Just to save you from being alone

You stole my soul, and that's a pain I can do without

All I needed was a friend to lend a guiding hand

But you turned into a lover, and mother, what a lover, you wore me out

All you did was wreck my bed, and in the morning, kick me in the head

Oh, Maggie, I couldn't have tried any more

You led me away from home

'Cause you didn't wanna be alone

You stole my heart, I couldn't leave you if I tried

I suppose I could collect my books and get on back to school

Or steal my daddy's cue and make a living out of playin' pool

Or find myself a rock and roll band that needs a helpin' hand

Oh, Maggie, I wished I'd never seen your face

You made a first-class fool out of me

But I'm as blind as a fool can be

You stole my heart, but I love you anyway

Maggie, I wished I'd never seen your face

I'll get on back home one of these days

Ooh, ooh, ooh

醒醒，瑪姬，我想我有話要對你說 

現在是九月下旬，我真的應該返回學校了 

我知道我讓妳開心，但我覺得我被利用了 

噢，瑪姬，我不能再繼續這樣了

妳帶我離家出走 

只為讓你不再孤單 

妳偷走了我的心，這才是我真正的痛

早晨的太陽曬在你臉上, 顯示了妳真實年齡 

但妳不用擔心，在我眼裡，妳就是一切 

妳的笑話我都笑了，親愛的，你不用哄我

噢，瑪姬，我不能再繼續這樣了

妳帶我離家出走 

只為讓妳不再孤單 

妳偷走了我的靈魂，這是我無法擺脫的痛苦

我其實只是需要一個朋友來指導我 

妳卻變成了情人，媽媽，多麼好的情人，但你卻把我累壞了 

你只是顧和我在床上瘋狂，然後在早上踢我的頭

噢，瑪姬，我不能再繼續這樣了

妳帶我離家出走 

只因你不想一個人 

你偷走了我的心，即使我如何努力，我都無法離開你

我或者會偷老爸的球桿，靠打桌球謀生

 又或者加入搖滾樂隊 

噢，瑪姬，我真希望我從未認識妳

妳把我變成了超級大傻瓜 

但我就像傻瓜般盲目 

妳偷走了我的心，但我還是愛著你

噢，瑪姬，我真希望我從未認識妳

過幾天我復會回家 

歌曲其實很有電影感，一開始的時候便將鏡頭從遠拉近，然後你見到一個坐在床邊，向仍在沉睡的Maggie, 訴說着他糾結的情感，你可從他喃喃自語中得知他和Maggie交往的過程; Maggie肯定是個年紀比他大許多的女人，少年初遇Maggie時，只希望找個母親的代替品，但Maggie成熟女人的魅力對少年來說是無可抗拒的誘惑，然後跟他私奔，於是整個夏天都跟Maggie膩在一起，用少年的精力和肉體，滿足了他的欲求，亦排派遣了她無盡的寂寞。然而夏日將盡，少年開始慢慢醒覺，知道自己只是Maggie的玩物，也明白不可長此繼續下去，因此打算離開Maggie，可能返回學校，可能偷老爸的錢去打桌球，又或者加入搖滾樂團，不管做什麼都好，他明白現在是開始清醒，要斬斷這段糾纏不休的母子戀的時候了。雖然如此，少年對Maggie仍然有斬不斷理還亂的感情，儘管很清楚自己在Maggie心中的位置，但仍無法控制自己對Maggie的愛念依戀.  這是一個十五六歲男孩的成長故事，你可以說這是個畸形的戀愛故事，但不管如何，少年成長後，這段感情仍然會深深的刻在他的腦海裏面，就像{讀愛}裏面青少年米高對漢娜的感情一樣，青澀的愛情很多時候也可以是很刻骨銘心的感情。

現在我們看看張國榮的Monica：

你以往愛我愛我不顧一切

將一生青春犧牲給我光輝

好多謝一天你改變了我

無言來奉獻 柔情常令我個心有愧

Thanks thanks thanks thanks Monica

誰能代替你地位

你以往教我教我戀愛真諦

只可惜初生之虎將你睇低

好多謝分手你啟發了我

期求原諒我 柔情隨夢去你不要計

Thanks thanks thanks thanks Monica

誰能代替你地位

Oh 想當初太自衛

Oh 將真心當是偽

Oh 當光陰已漸逝

方知它珍貴 你已有依歸

負了你錯愛 此美夢永遠藏於心底 yeah

你以往愛愛上我不顧一切

將一生青春犧牲給我光輝

好多謝一天你改變了我

無言來奉獻 柔情常令我個心有愧

Thanks thanks thanks thanks Monica

誰能代替你地位

你以往教我教我戀愛真諦

只可惜初生之虎將你睇低

好多謝分手你啟發了我

期求原諒我 柔情隨夢去你不要計

Thanks thanks thanks thanks Monica

誰能代替你地位

Oh 想當初太自衛

Oh 將真心當是偽

Oh 當光陰已漸逝

方知它珍貴 你已有依歸

負了你錯愛 此美夢永遠藏於心底

Thanks thanks thanks thanks Monica

誰能代替你地位

Thanks thanks thanks thanks Monica

誰能代替你地位

Thanks thanks thanks thanks Monica

誰能代替你地位

明顯地歌者（張國榮) 年紀比Rod Stewart的Maggie May所塑造的少年大，雖然他自稱初生之犢，但感覺上應該不是懵懂少年，起碼應該是20歲以上的青年，而他碰上的Monica，估計應該不會比這個青年大很多，而Monica和Maggie最大的不同是Monica是真心愛着這個少年，因此才有 {愛我不顧一切，將青春犧牲給我一切光輝}的謂歎，由此可以看得出Monica的感情絕對是真摯誠懇，而由於Monica年紀較大，青少年和一個較成熟的女人談戀愛，感覺上便有被誘導，從而闖出一片新天地的感覺。然後因為不羈的青少年年紀漸長，慢慢地發展出自我的性格，又或者外面的誘惑漸大，終於導致兩人分手，多年後青年會想起這段感情，可能幾經滄海，才懂得當初Monica的好， Monica的愛竟是如此珍貴，但回首當初，一切都已經太遲了。

兩首歌都是訴說青少年愛情的回憶和感慨，相比之下我更喜歡Maggie結尾，那是更濃烈，更赤裸裸的感情，少年夢醒，不得已要離開那玩弄他感情的女人，但因為仍然年幼，不懂事，所以對這個女人仍然依依不捨，歌曲裏每個字都流露着赤裸而真摯的感情，相對之下Thanks Thanks Thanks Thanks Monica便有點矯情了，感情之為物，無需感激，亦無需多謝，一旦要向對方道謝，那這段感情便只剩下空殼，無甚足道.

Monica的Youtube連接: https://www.youtube.com/watch?v=w3N5tisg20I

Maggie May的Youtube連接:

https://www.youtube.com/watch?v=pBlrMtFprKs

絮語 3

 

(1)   唔知各位有冇睇過Twilight Zone (迷離境界)?  喺我睇嚟，迷離境界係一套超前衛嘅片集，雖然都係以驚慄為主，但內涵同埋所周延嘅意義，唔好講話60年代，就係放諸今日21世紀20年代，都絕對唔落後，而且我覺得，有好多集其實係開創咗好多日後片集或者電影嘅先河.  

迷離境界佳作多不勝數，如Time enough at last, The Monsters Are Due on Maple Street, The mask,但我印象最深刻嘅其中一集，係講未來世界嘅社會裏面有一條冷漠罪，就係如果人對人/社會冷漠，就會被判有罪，被判刑嘅人可以自由活動，但手上會被強逼戴上特制手鈪，其他人見到佢唔可以同佢有任何接觸，要當佢係隱形人，呢個就係對犯咗冷漠罪嘅人嘅懲罰.  片集中男主角係冷漠罪犯，開頭嘅時候不以為然，仲覺得好有趣，但時間長咗，就覺得好辛苦，好渴望同人傾偈，交流，但法例所限，冇人夠膽同佢發生任何接觸，主角捱左一段時間之後終於刑滿，恢復正常交流嘅資格。但佢一行出門口，就被一個被判冷漠罪嘅人攬住，懇求同佢接觸，男主角不顧正常人不可以同被判冷漠罪嘅囚犯進行任何接觸嘅禁令，攬住個犯人喊道: I see you, I can feel you。睇到呢度我覺得好感動，男主角本身係一個冷漠嘅人，如果唔係佢都唔需要被判冷漠罪，但係經過長時間嘅被社會隔離之後，佢深深感受到被人無視嘅痛苦，於是不顧法律規條，都要俾溫暖一個被判冷漠罪嘅人。千言萬語，都只歸納成一句：人要經歷過同樣嘅苦難，先至懂得同情別人.

(2)  我諗靚仔嘅快樂嚟自兩方面，一係無知，二係想像力豐富。無知簡單來講就係乜都唔識，所以對大人講嘅嘢深信不疑，當然你可以話咁樣好易俾人呃，但細路仔，乜都冇，可以俾人呃嘅就係佢講乜你信乜，我記得靚仔嘅時候啲大哥哥話吞咗香口膠會黐住個胃，嘔唔翻出嚟會死，有次真係吞咗舊香口膠，虛驚咗幾日。無知喺細路仔階段其實可以翻譯成為某種安全感，因為可以無條件咁信任大人，所以完全唔使擔心身邊周圍嘅事物，只要做好自己本分，讀好書，唔好太反斗頑皮，生活會無憂無累。而想像力更加係童年最佳嘅遊戲，60年代電視仍未流行，家居娛樂主要來自收音機，當年放學後最鍾意粘著收音機, 聽播音員講故仔, 譬如胡章釗，李我，鄧寄塵, 鍾偉明講天空/武俠小說，聽佢哋描述嘅場面，乜嘢千軍萬馬，乜嘢場面浩蕩，喺想像中可以無限拉闊，另外聽麗的呼聲廣播劇，王牌播音員好似譚炳文，何雪瑩嘅播音小說，想像佢哋把聲既然咁靚，應該都人如其名，顏值超標，結果因為睇改造小姐, 發覺現實同想像有頗大嘅落差，但冇所謂，當年嘅想像，比自己好大嘅滿足感同埋幸福感. 

(3)   啱啱瀏覽網上資料，得知幾位五，六十年代嘅性感尤物仍然在生，真係覺得好夢幻同埋神奇。碧姬芭鐸綽號BB，歌地亞嘉汀蘭綽號CC，珍娜羅寶列吉坦 （三蘇戲稱真奶裸露煲裂雞蛋），麗歌慧珠，蘇菲亞羅蘭等仍然健在，部份仍然活躍於影壇以至拍戲，感覺真係好難得。當然她他們大都年過八十，從照片看來已無可避免雞皮鶴髮，無復當年艷光，但，她們曾經艷光四射，顛倒眾生，當年只要一行出嚟, 就係鎂光燈嘅集中點，僅此一樣，已令佢哋終身無憾。呢個新聞令我不期然聯想起香港本地嘅元祖級女星/女伶。現今仍健在，年過或年近90 嘅花旦計有白雪仙，芳艷芬，羅艷卿，譚倩虹等。佢哋大都活躍喺40至50年代，退休於60年代，同佢哋合作嘅小生如任劍輝，新馬仔，羅劍郎，陳錦棠, 麥炳榮，何非凡等早已作古，而各位花旦今日仍然精神奕奕，着實可喜可賀。一般說法謂女人比男人長壽，誠不欺我

(4)  啱啱睇完電影Elvis(貓王)，感覺係演優於導，導優於劇本。我當然明白傳記電影唔易拍得好，要討好觀眾好容易，只要將電影中嘅主角某啲耳熟能詳嘅環節大加渲染，再滲入戲劇化元素，自然就能夠引起觀眾嘅興趣同埋共鳴，但Elvis嘅劇情真係過於浮泛表面，對貓王嘅生平，尤其是係佢戀愛結婚, 濫藥致死部份，都係以蜻蜓點水嘅方式交代，感覺好到喉唔到肺，至於佢同佢媽媽，以及柏加上校嘅關係，亦都過於平面化，不過電影有一個驚喜，就係主角Austin Butler嘅外型以致表情都頗為神似貓王，老實講冇人可以扮貓王扮到十足十，但有幾場佢嘅台風，加上斜住眼笑吟吟望住觀眾嘅神情，有一剎那我真係覺得佢貓王上身，如果你問我，我覺得佢比Rami Malek扮Freddy Mercury更入型入格，Rami Malek太矮，比起高大威猛，神高神大嘅Freddy頗有不如，都唔好講佢冇可能複製到Freddy嘅氣場，佢憑Bohemian Rhapsody一片攞影帝真係有啲難以令人信服.  睇Elvis，令我諗起一件往事，中三嗰年農曆新年嘅時候，有朋友搵我睇戲，戲名叫做萬紫千紅興新春，我起初嘅時候我仲以為係乜嘢賀歲片，後來先至知道係貓王喺拉斯維加斯表演嘅紀錄片，果次係我第一次親炙貓王，從來都未見過咁有獨特風格嘅台風，當然亦都俾佢磁性嘅歌聲融化，從此我就變咗係半個貓王迷.

(5)  而家成日話通脹犀利，百物騰貴，呢個講法放諸一般民生上邊嚟講，大部份人都深以為然，但又奇怪，某啲行業或者服務，價錢可以話數十年如一日，幾十年都冇加過價，可謂匪夷所思。舉個例子來講， 90年代一般嘅髮型屋，齋剪髮都要過百元，而家周街嘅日式剪髮，都係$6，70左右， 三十年過去，剪髮嘅價錢不加反減。另外我記得90年代初跟團去歐洲三國旅行，盛惠團費$12,000 ，當然呢個係團費價仲未計導遊小費等等，新冠肺炎爆發之前，我再睇歐洲旅行團價都係一萬元上下， 三十年來價錢竟然保持不變，相信係廉航同埋旅行社可以用超平價訂酒店房/機票所致。此外大部份人垢病嘅外出用餐費越嚟越貴，某方面我覺得又未必如此。我記得九十年代初同朋友外出食飯，其中當年天天火鍋剛剛面世，以點醬招徠食客(即自助調味醬料)，好多人趨之若鶩，兩個人叫個海鮮鍋另加個腰潤，埋單都要五,六百元上下。今時今日喺普通中價酒樓食火鍋，應該都唔使呢個價錢，如果選擇一啲特價時段嘅任點任食，可能仲更加平，以此觀之，即使餐飲嘅漲幅亦未必如想像中厲害。又或者咁講，香港衣食住行當中，只住一項就已經將人壓得透不過氣來，若然可以解決住嘅問題（譬如有自置物業，又或者上到公屋），一般生活其實都應該唔難應付.

(6)  幾日前睇吳君如嘅星星同學會，先至知道同埋明白點解邵氏喺60年代可以橫掃影壇.  當日吳君如訪問三位昔日邵氏紅星，陳鴻烈，岳華，鄭佩佩，佢哋透露即使係紅咗之後，每個月嘅月薪都係幾百蚊，當然電影上映賣座嘅話有分紅，但數目唔多，另外仲有嘅福利真係可以住宿舍（我個人就唔覺得係福利，而係邵老闆將你困在宿舍，開工容易好多）。我翻查資料，羅艶卿50年代末拍一套片片酬要五仟大洋，何非凡，新馬仔全盛時期每套片酬超逾一萬元，呢個係五十年代末嘅價錢，兩者之間相差咁遠，粵語片嘅製作費大部份用咗喺明星上邊，咁仲點會有足夠嘅錢去請導演，編劇，或者用靚啲嘅菲林？邵氏就唔同，因為演員平，所以可以將慳返嚟嘅錢用喺佈景同埋買靚嘅菲林身上，加上流水式製作，幕後人員製作分工精細，所製造出嚟嘅電影唔好講內涵，擺出嚟都靚過粵語片好多，之所以60年代尾粵語片式微，係有其不可避免嘅原因.

(7) 而家仲有幾多酒店嘅lounge仲有駐場歌手主場? 廿幾年前我喺香港中環返工嘅時候，經常夜晚去富麗華嘅lounge，一路飲嘢一邊聽歌.  當時有個駐場歌手叫做Sabrina，歌藝唔錯，仲可以點歌.  偶然興之所至，點一兩隻自己想聽嘅歌，一邊摸着杯底，一邊聽歌，感覺非常愜意.

(8) 睇過咁多套電影，大家覺得印象最深刻嘅Goodbye scene係邊一套戲嘅邊一場戲？如果你問我，我即刻可以講到出嚟嘅有兩套戲，第一係Remains of the day(告別有情天)裹面，扮演管家嘅Anthony Hopkins去探訪佢嘅舊同事Emma Thompson，本來想向佢表達愛意，但試探之下知道對方唔會接受，最終兩人喺雨中執手話別，離別嘅時候，Anthony Hopkins好輕描淡寫咁講一啲客套嘅祝福語，請Emma Thompson好好照顧自己，但一向內斂，嚴謹自律嘅Anthony Hopkins最終都露出滿臉不捨， 而Emma Thompson更加淚盈於眶，呢一場睇到我好感動。第二埸喺Cast away( 劫後餘生), Tom Hanks喺荒島流落五年之後終於獲救，返到嚟之後發覺舊愛Helen Hunt已經結婚生女，Tom 雨夜去探望Helen, 兩人坐喺廚房話舊，都唔敢觸碰到最痛點，最後Tom 駕車準備遠去，Helen追上車，兩人禁不住擁吻，但最終仍然係理智戰勝感情，Helen依依不捨地下車， Tom駕車遠去，留下無盡愛意和遺憾.  呢兩個場景，係我認為最深情嘅Goodbye scene. 

(9) 蔡瀾批評高級餐廳價錢離地，更加突顯貧富懸殊嘅情況，但我又唔係咁睇。個別餐廳收費天價，全世界都有，非香港獨然，亦都唔係乜值得咁大驚小怪嘅事。有人因為呢樣果樣嘅原因，要食得貴，要食得吹毛求疵，呢啲係個人選擇，只要有人願俾，自然就有供應，呢個係資本社會嘅特色，最緊要係有得揀，有人幾千以至幾萬蚊食一餐，有人幾十蚊食一餐，河水不犯井水，我又睇唔出咁樣有乜特別嘅問題，食得平嘅冇需要羨慕食得貴嘅，食得貴嘅亦都唔應該睇低食得平嘅，各有所好，各取所需.  我再重申，只要唔好削弱左低收入人仕嘅選擇，即係平價餐廳繼續提供平價食品，咁就冇問題.

(10) 我小學嘅時候曾經有過好多而家已經湮沒咗嘅科目，公民，健教，尺牘，珠算，仲有一科翻譯.  翻譯其實係英文嘅副科，小學生嘛，程度問題，唔會要你翻譯成篇文章，多數只係一兩句嘅翻譯，課程嘅設計原意只係協助學生掌握同埋運用英文。我記得有一堂翻譯堂，老師喺黑板寫咗 [我自食其力]五個中文字，叫我試吓翻譯，我不加思索就寫低I eat on my myself ，俾啲同學笑咗好耐，問我點樣食自己？

絮語2

 

發覺自己越來越喜歡這種自由自在，無拘無束的寫Blog新形式，以前要寫個blog，怎麼樣都要有一個比較有意思，或者內容豐富的話題，起碼能寫上一兩千字的內容，現在完全不需要顧慮這些，只要心隨所之，興之所至，幾百字可以，幾十字也不拘，總之能夠抒發情懷，記述到即時的心情或者片刻的回憶便可，當然能得到各位的認同和迴響，便更是賺了.

(1) 又講返我最鍾意講嘅題目; 歐西流行歌曲，呢兩三年我好鍾意喺YouTube睇舊歌嘅MV，由上世紀40年代開始至本世紀10年代，都有唔同You Tuber制作video, 選出佢哋心目之中認為每年每個月最好嘅Pop song，甚至有細分，譬如每月最佳男歌星唱嘅Pop songs，最佳女歌星唱嘅Pop song， Band Song，亦都有jazz, rock 嘅genre , 總之林林總總，五色紛陳，鍾意聽乜就聽乜，當然以我輩來講，梗係聽每月top songs， 60年代Beatles雄霸榜首， 70年代就比較多元化，Bee Gees， Carpenter， Elton John， Simon & Garfunkel就係上榜常客. 

睇 Music video, 當然唔止聽歌, 仲要睇埋歌星台風.  六十年代以台風計以貓王最煞食，除咗佢嗰副磁性嘅歌喉，獨特嘅服裝同埋貓王式扭舞外，更重要嘅係佢面上經常帶着一副些少邪惡嘅笑容，50年代歌星譬如Pat Boone, Neil Sedaka , Paul Anka都係斯斯文文，一本正經咁企喺度唱歌，點會好似貓王咁一面扭，一面用眼角笑淫淫咁望你，你係50年代尾60年代初嘅少女，俾佢眼尾一掃，仲唔成個溶晒? 去到60年代，好多單飛嘅男歌星都學佢，好似Tom Jones， Engelbert Humperdinck都喺舞台上瘋狂舞動腰肢，賣弄性感，聽講Tom Jones仲係褲浪度塞卷廁紙，以增加雄性魅力，問你死未？

我其實都好鍾意純音樂, 覺得好能夠治癒心靈, 帶入進入忘我境界.  純音樂大師有Percy Faith，Paul Maurait,  Mantovani, 經典樂曲如Summer of 42, Charmaine, The heart is a lonely Hunter, Nadia’s theme, ebb tide,  都好值得一聽.

70年代仲有好多好歌星/好歌， Carpenter， Bee Gees， Elton John，Jim Croce， John Lennon， Simon & Garfunkel，Rod Steward, Fleetwood Mac， Chicago，都唔好講啲稍為heavy rock如 Rolling Stone, Led Zeppelin, Who, Deep purple, Queen, Pink Floyd, Motown 如Gladys knight and the pips ,Aretha Franklin等等，即使去到70年代後期disco興起，好多人都嗤之以鼻, 覺得唔入流, 但我個人覺得箇中都有唔少佳作，Donna Summer, Gloria Gaynor, Anita Ward其實唔錯，但我同意去到80年代就差啲，但我重申可能係年紀唔同，口味融入唔到嗰個年代，但80年代嘅新英倫浪潮如果你有興趣同心情聽，如Visage, Ultravox, Duran Duran, Spandau Ballet, Culture Club,  Human League, Kate Bush, Eurythmics, Wham, Michael learns to rock 等都好多驚喜, 得閒有興趣可以喺YouTube打佢哋嘅名，搜尋佢哋最Hit嘅歌，或者你會改變對80年代流行音樂嘅印象. 

講開又講，如果談論60年代嘅音樂，又點可以少咗Folk Song, Peter Paul and Mary, Seekers, Joan Baez, Bob Dylan, Brothers Four, Everly Brothers, John Denver, Joni Mitchell, Pete Seeger, Judy Collins, 佢哋唱嘅歌大部份而家都已經成為經典, Bob Dylan固然係傳奇，但我到而家都冇辦法接受到佢好似講嘢方式嘅唱歌風格. Folk Songs嘅伴奏嘅樂器誠然比較單調，編曲亦比較冇乜變化，所以在商業上不如 Pop music, easy listening 成功¸ 但唔可以唔承認，當年好多經典歌曲都係Folk Song嚟嘅, 譬如Five hundred miles, Where have all the flowers gone, I'll never find another you, Blowing in the wind, Try to remember等等, 等等. 淨係一首Seekers 嘅 I’ll never find another you，就真係可以哼足半個世紀, Judith Durham 把聲澄明如空谷回音，聽落好舒服，個人覺得，比Mary Travis, Joan Baez 同Judy Collins嘅女中音同女低音更悅耳動聽. 

(2)  意猶未盡, 續談上篇 Blog講關於廣告: 其實銀行廣告係上世紀八九十年代曾經係電視台嘅廣告台柱，當年除咗煙仔廣告之外，銀行廣告就佔電視台廣告嘅一個好大同埋重要嘅比例，經典嘅銀行廣告包括恒生嗰首街知巷聞嘅主題曲; 小莫小於水滴，漸成大海汪，又或者匯豐人情味滿瀉嘅廣告。我最記得嘅有兩輯，一套係一對老人家坐喺鏡頭面前，男嘅話我唔係鍾意食你煮嘅麵，我係想見多你兩面，另一套都係一對白髮蒼蒼嘅夫婦，兩人打開存摺，一道金光從存摺裏面照射出嚟，映照着兩人幸福滿足嘅面龐。當時香港社會仍然相對簡樸，社會風氣仍然以節儉同埋儲蓄為主，反觀今時今日，電視最多嘅廣告係財務公司，鼓勵你先使未來錢，卡數一筆清，又可以再去旅行，shopping，短短十幾年間，社會價值觀完全顛覆, 由儲蓄型社會蛻變成為消費型社會，不過亦都好難怪，過去十幾年，擺錢喺銀行利息低得可恥 （依家啲息高咗都拜美國瘋狂加息所賜，在此以前，銀行只係施捨式咁俾嗰0.2至0.3%嘅年息儲蓄戶口，試問一般人，尤其係後生仔，點會仲有耐性存錢喺銀行？）。總之一句講晒，有錢唔使, 罪大惡極.

(3) 我總覺得， 上世紀80年代比今天更先進，更前衛.  網絡年代科技突飛猛進，但我覺得當年嘅思想比今日更創新，更開放. 

(4)  粵語長片裏面成日都將啲包租婆同埋啲有錢員外塑造成為惡人或者衰人，但細心諗一諗，包租婆好多時候都只不過係二房東，佢都係靠收租嚟維持生計，租客唔交租，或者欠租，佢冇收入之餘，大業主亦都唔會寬免佢嘅租金，咁佢又同邊個喊？另外粵劇片裏便嘅員外都會棒打鴛鴦，唔俾個女同啲窮書生締結姻緣，但又仔細想一想，你係個有錢佬，窮書生已經喺你嗰度又食又住，而家仲想拎埋，嗒埋你個女，咁你係咪好理所當然咁一腳申個書生走？大佬，幾多年先出個狀元，真係舖舖買中嗰個書生會中狀元？所以現實生活裏面，好多嘢只要用腦諗一諗，個邏輯就會完全顛倒.

(5)  而家講魷魚遊戲當然已經過時，但套電視劇早排攞咗艾美獎最佳男主角，所以覺得攞出嚟傾吓都算合時。魷魚遊戲值得讚嘅地方好多，第一係故事構思新穎，第二係編劇非常夠膽藉劇集將人嘅貪婪，自私，殘酷嘅一面發揮得淋漓盡致，第三係編劇好高水準，好多場我都問自己，如果我係編劇，我會點樣發展落去，結果喺個咁荒謬嘅情況之下，佢可以寫到一個合情合理，但係又好敲打靈魂嘅故事將劇情發展落去，相對之下我相信中港台嘅編劇未必有咁樣嘅能力，又或者可以話冇咁樣嘅自由發揮空間去寫呢類型嘅劇本。講咗優點，有幾樣野要彈；第一唔知係咪仲要拍下集，所以好多細節都冇交代，譬如個差佬跳咗落懸崖之後生死未卜，譬如點解遊戲場上面嘅士兵都咁年輕，但殺人完全唔手軟，佢哋係咩情況之下俾人招募，又可以做到咁絕對遵守規律？又譬如組織呢個遊戲係個老頭，佢嘅理由係因為有錢，世間所有嘅嘢已經提唔起佢生活嘅興趣，所以要親身經歷殺戮遊戲，但其他嗰啲所謂VIP又如何？佢哋係咪淨係想尋求刺激咁簡單？喺劇集裏又冇交代清楚，（其實內裏仲有個bug,就係男主問點解要留佢一命？但其實劇集所見，有幾次男主角都係九死一生之下因為機緣巧合而生存落嚟，如果放諸喺現實，只要稍一不慎，佢就會加入被淘汰者嘅行列,所以根本唔存在刻意留佢一命嘅事實）。另外李秉憲嘅角色亦都比較模糊，佢做隊長，係為錢？抑或為權力？ （劇集尾遊戲又再開始，究竟係咪由李秉憲承繼左佢呢個殺戮集團？）佢既然可以送得個腎俾自己個細佬，兄弟情應該非常密切，但親眼見到細佬跌落懸崖，又似乎無動於衷，故此佢嘅感情似乎唔合邏輯。最後我覺得結局較為一般，大魔頭係老人呢個設計比較庸俗，而男二最後受唔住良心譴責而自殺亦都較為煽情，男主角頹廢左一年之後先至出動履行諾言處理女主角細佬同埋男二母親嘅事宜，亦有啲不合情理，劇集最尾男主角豁出去要同殺戮集團作殊死決鬥，我感覺係為咗拍續集而設嘅佈局，但如果作為本劇集嘅結尾，我覺得與其勉強製造高潮，不如平淡啲讓主角坐飛機去美國尋女更有情味.

(6)   童年嘅快樂來自無知，期待，同埋容易滿足; 因為無知，所以覺得世間上萬事萬物都充滿色彩，神祕感, 唔知唔明嘅嘢, 只要大人解釋一遍 (其實好多時都只不過模稜兩可), 就覺得呢個世界十分奇妙, 趣味盎然。而由於一般家庭都唔富裕，所以物質困乏，正因為貧乏，以至些少事情都足以令人覺得開心，興奮; 聽日會去睇戲，或者學校去旅行，又或者去食聖誕大餐，總之只要小小嘅物質滿足，就足以令人開心上好一段日子.  年紀大咗，經濟充裕，喜歡嘅話可以享受到比童年十倍百倍嘅物質滿足，但精神上，因為對物質滿足已經麻木，又或者物慾無法填補精神空虛, 所以物質享樂根本無辦法刺激到自己嘅腦裏面嘅胺多芬，去讓自己覺得開心，快樂，呢啲就係成長嘅逆謬.

(7)  有時候，我覺得，最好同埋最壞嘅朋友都係自己. 

(8) 這幾年疫情對香港嘅衝擊實在真係好大，我有個從事金融業嘅老友，疫情前住山頂過千呎豪宅，有車有遊艇，喺疫情同埋國際金融危機衝擊下，公司破產，佢由山頂搬落灣仔，租住幾百呎單位，呢個生活環境都一般人哋講當然已經算唔錯，但對佢來講不啻係由天堂跌落凡間，每次見佢都長嗟短嘆，心底裏當然覺得唔好受，但人生便是如此.  我心諗，富貴如浮雲，今日錦衣玉食，明日單衣瓢飲，人生起落誰能免，但起碼佢都曾經富貴過，享受過。再退一萬步嚟講，廳保住健康，保住生命，某程度上可算係嬴家. 此次疫情累計導致逾萬港人離世，能夠保住條命仔，一家人整整齊齊, 已經係一種恩賜.

(9)   六十年代中後期，有幾位顏值很高的女星，如蘇青，方心，羅愛嫦等，他們都曾在很多粵語片中擔任第二女主角，甚至偶然會當女主角，但可惜最後都紅不起來，可能是她們最繁花盛放的時期剛好碰上粵語片逐漸式微的日子，故此沒機會發展，真可謂時也命也.  

(10)  這兩年因為疫情的關係，學校都實施網上教學，學生都不用回校上課。我不知道學生們怎麼樣想，但我委實為這一輩年青人覺得可惜，可能我比較傳統老土，我始終覺得上課應該是一大班同學擠在課室裏面，聽老師在那邊喋喋不休的教學。返學不單止是上課，更重要的是和一大班同學一起學習，一起生活，課餘的時候一起去瘋；打球，看戲，旅行，這樣的學校生活才算是圓滿，真實。我尤其懷念中學末段時候的旅行和宿營，那時候年紀漸長，父母的管束也較為鬆懈，申請旅行和宿營都比較容易過關。我最深刻的回憶是有次會考過後，一大班同學去長洲宿營，那天晚上大家玩得很很興奮， 十幾個人擠一個房間內，吃完晚飯後繼續打鬧，大家都沒有睡意，喧鬧過後都坐在一起，談感受，談生活，當然最重要的還是放榜後的計劃。直至天色微亮，幾個人撐着睡意，打着電手筒往海邊走去準備看日出，我已經不記得是否真的有看到日出，但反而很記得有個同學托着部卡式機隨行，一路沿着蜿蜒的小徑行出沙灘，一路播Carpenters的歌曲， Superstar， Rainy days and Monday， Close To You，我走在最後，耳畔盡是Karen Carpenter如泣如訴，委婉柔美的歌聲，我默默望着前面的同學，忽然覺得十分不捨，內心告訴自己說；畢業後大家便會各散東西，以後再會無期，我應該要好好地珍惜這一刻，此後每當我再聽到Carpenters的歌曲，腦海中便不期然的浮現這一幕，所以我很相信，音樂真的能牽動感情，讓人聯想起段段悲歡離合的情景.

絮語 1

年紀漸長，對身邊周圍所發生的瑣事/世情慢慢滲出一些另類的看法，自思之餘，也想將這些古靈精怪的想法po在這裏與各位分享，箇中有頗多"無厘頭"的看法, 還請各位網友不吝賜教.  由於這些看法都是即興之作，很多時候是自己走在街上，忽然想起某個題目，為免轉過身即忘掉內容，遂以電話中的備忘錄功能記錄下來。為了保持原汁原味的風格，故此不作修飾，以最原始的廣東話版本Po出來，一則不破壞本來的想法，二則頗覺趣味盎然，惟望網友見諒.

(1)   唔知各位有冇留意，近年來喺電視台播播放嘅廣告，絕大部份都係大笪地式嘅叫賣製作，借錢呀，平霸啦，食嘢呀，平霸啦，內容唔單止全無創意，甚至連起碼提起興趣嘅枝節都欠奉.  我諗得比較單純，喺得電視台落廣告，質素即使唔係超班，起碼都應該喺特定嘅框框內注入一啲養分啩？講得難聽一啲，大部份嘅廣告真係不忍卒睹，反而有時候喺YouTube加插嘅廣告，仲叫做有啲創意，起碼趣味性強好多，我八卦，尋思吓箇中因由，第一當然而家社交頻道百花齊放，再非當年一台獨大嘅局面，廣告商落廣告渠道多咗，放喺電視廣告嘅資源資源自然減少，咁樣當然會直接影響電視廣告嘅質素，但係我又諗，講到尾喺電視落廣告嘅成本唔低，我估每個30秒嘅廣告都已十萬上計，何解廣告商如此hea,廣告製作公司亦如此無精打采，俾啲質素咁差嘅廣告出街？或者經歷過八九十年代嘅黃金年代，我比較有要求，睇到呢啲廣告，我真係覺得有趕客之嫌.  

另外我仲留意到兩個好有趣嘅現象，八九十年代嘅廣告大戶而家完全銷聲匿跡，煙仔唔使講，但即使銀行，電器產品，百貨公司，酒類，汽車，零食，飲品，電器，呢啲以前經常喺電視見到嘅廣告，今日竟然都遠離電視，係佢哋唔使賣廣告，抑或轉咗跑道？另外其實我喺網上睇到好多好出色嘅廣告，其實所賣嘅產品都係好Universal嘅，譬如麥當勞，雀巢咖啡，以至蘋果iPhone等，呢啲產品香港都有得賣，而且佔嘅市場份額都唔細，點解唔直接拎嚟喺香港播放？我記得八九十年代電視播放好多外國嘅廣告，喺香港做些少後期製作，譬如另外配音即可播放，既省製作費，質素又高，產品商點解唔諗吓咁做？相信版權應該唔係主要問題.

(2)  六十年代有銀幕情侶之說，呂奇陳寶珠配，謝賢嘉玲配，林鳳張英才配, 都係經典拍檔，小影迷們都以為佢哋喺現實生活中係男女情侶（其實上述兩pair喺現實生活都曾發生過撲朔迷離嘅感情）.  話說回來，粵劇片中反而好少特定花旦小生配，我估原因係五十年代伶星們因為登台和拍片忙得不可開交，片商要搵佢哋擠時間拍片都已經要費盡九牛二虎之力，根本冇主動權去選擇某小生去配某花旦，但儘管如此，仍然有個別生旦配讓人覺得特別舒服同埋回味，譬如牛榮配女姐就好似有奇妙嘅化學作用，令人睇得好舒服，以此類推，富哥配卿姐又係一流，兩人都係50年代最受歡迎嘅忠厚配賢淑相，企埋一齊就係一道風景，任白配雖然已經係神話，但我個人就更喜歡任姐配芳艷芬，洛神簡直係一絕，新馬仔呢，我覺得最好係配大碧姐，新馬唱工一流，但唔多鍾意睇劇本（其實佢根本冇時間睇劇本），喜歡臨場爆肚，只有大碧姐能夠壓得住埸，新夜吊秋兩人嘅對手戲就真係一絕，何非凡我就真係諗唔到，佢似乎同老婆卿姐唔係有好多合作機會，反而早期同芳艷芬拍檔演出嘅機會就比較多，但好似冇乜代表作，感覺佢細細粒粒，似乎同吳君麗就最合襯（但好似都唔係合作過好多部戲，最出名係雙仙拜月亭）。花旦方面最出乎意料之外嘅就係紅線女好似冇乜做粵劇片，我諗係因為佢中後期加入左中聯，中聯最憎就係七日鮮粵劇片，此所以紅線女比較少拍粵劇片

(3)  早排同幾個朋友傾起五十年代幾位超級花旦嘅唱腔。當年粵劇界人才輩出，各自撐起半邊天，但有人月旦仙姐同埋女姐，覺得兩位藝術造詣固然高，但聲線比較尖，聽起嚟唔係咁舒服。哈，呢個題目都幾有趣，可能仙姐把聲比較高吭尖銳，有啲人會覺得聽起嚟冇芳姐咁圓潤滑溜，但佢做刁蠻嬌妻的確有一手，獅吼記，白雪紅梅賀新春，都做到入木三分。另外任姐嘅最佳拍檔，早期似乎同鄧碧雲，芳艷芬拍得比較多，兩位花旦星藝圓純，拍任姐當然如魚得水，但自從任白配漸次成熟之後，唐滌生所寫嘅劇又似乎要仙姐做先至能夠做到入型入格，我個人就諗唔到邊個可以演長平公主，或者霍小玉能夠做到佢咁哀怨纏綿 

(4)  忽然間想起咁樣嘅一個問題，以前啲人點解會鑲金牙？係咪覺得有隻金牙威威，抑或係因為金牙比假牙堅固，定係因為金牙保值？而且係咪一般普通牙醫都可以鑲金牙？即係你隨便撞上任何一位牙醫，佢都可以幫你鑲隻金牙上去（唔通佢醫務所有金牙存貨？）. 另外你點知嗰隻牙係真金?有可能會係K金，又有可能會係假金都唔定，而且鑲隻金牙喺個口到，唔怕俾人打劫？我記得以前睇過啲新聞，有啲鑲左金牙嘅人比劫匪強行將隻金額剝咗落嚟，搞到成口都係血，唔見咗隻金牙事小，要重新鑲過至大劑。而家唔知仲有冇人鑲金牙呢？

(5) 呢排經常發夢夢返中學時代嘅生活，我唔知可以用咩形容詞嚟形容呢段時候嘅感覺同埋心情，諗咗好耐，都只能夠好陳腔濫調咁以「歲月靜好」嚟描述中學時代嘅生活.  中學五年，唯一令自己擔憂嘅時候就喺考試同埋放榜，還好當年嘅課程唔算沉重，仲勉強應付得來，所以可以騰出好多時間去享受課餘嘅生活，先唔好講啲比較有組織性嘅課外活動好似旅行，開party，或者乜嘢班際比賽，運動比賽等，我記得當年放咗學嘅時候， （尤其是中四中五，某啲非主流嘅堂被取消，所以下午課比較清閑），放咗學之後，就會聯群結隊咁行去中環，一邊行一邊打鬧追逐，完全冇任何考試嘅壓力，行到去中環，冇錢嘅時候就去兵頭花園齋坐，嗰日碰巧個袋有幾蚊，就會去大會堂地下個嗰lounge飲杯蕃茄汁（當然係幾潮嘅飲品），又或者去卜公碼頭嘅露天茶座，來杯凍檸茶，或者賓治，坐喺度吹下海風，幾個人吹吓水，講生活，講考試，講人生，感覺未來在我手，天下我所有，依家諗返起嚟，真係非常愜意嘅日子，亦都係自己人生裏面生活得最真心真意，最無憂無慮嘅一章

(6)   我唸而家啲人都冇咁禮儀周周，盛意拳拳咁送親戚朋友去搭車.  我記得我靚仔嘅時候去探親戚，走嘅時候親戚都會堅持送我哋去搭車（其實我哋嚟得，當然知道返歸嘅時候去邊個巴士站搭車，送搭車其實只係一個禮貌嘅表現而已），呢個操作有個好處，就係途中如果行經茶餐廳，親戚就會死拉活扯咁拉我哋入茶餐廳飲下午茶，如此我就可以順理成章地飲到至愛嘅紅豆冰同埋食西多士，絕對係無以上之嘅津貼

(7) 最近慢慢悟出一個道理，就係做朋友有三個要素，第一係有緣份彼此相識，第二係大家起碼有一至兩件事志趣相投，俗語即係話傾得埋，第三，最重要嘅，就係其中一方要夠主動.  唔好講話因為疫情，即使疫情前要搞個朋友聚會都唔容易，忙當然係重要嘅原因，更重要嘅係要先有人吹雞，然後其餘嘅人響應，問題係應承咗嚟嘅可能又會因為呢樣果樣嘅原因而要求改期，改地址，總之麻煩多多，最後令到搞手意興闌珊，後會無期。唔好以為只係多人嘅聚會先至係咁，有時候簡簡單單兩個人嘅茶敘，都會因為呢樣果樣嘅原因一拖再拖，所以我話，做得成實體上嘅朋友，主動好緊要

(8) 我成日有種咁嘅感覺，好多老字號其實喺度食老本，可能因為名氣關係，唔需要點樣保持出品嘅水準招徠顧客，亦有可能因為舖頭係自置物業，所以根本唔憂收入，以至東主（或者第二代）無心經營。有趣的是，好多老字號臨近結業嘅時候，吸引不少人慕名者前往，以示自己都曾經幫襯過呢間老店，但老實講，大部份老店嘅水準同佢哋嘅名氣都唔成正比，我個人嘅親身經歷，酒樓如龍門，雙喜，信興，茶餐廳如澳X，森X，美X等，其出品或水準普通，名不符實，個別食肆恃住名氣，待慢顧客，出品水準每況愈下，等等，都習以為常，西環祥X忝為老牌子餐廳，當然亦不能倖免，招呼普普通通，出品亦甚為單一，常餐ABC咁，唔係火腿通粉就係沙嗲牛肉麵，蛋撻同埋雞尾包尚可，但杯奶茶就認真失望。一句講晒，去老店只為食情懷，唔係食品質

(9)  掀動情懷有好多唔同嘅載體，一首歌，一種氣味，一段視頻，或者一番說話，好多時候都能夠觸動到神經。最近因為生活比較清閑，加上疫情穩定，我經常搭車去探訪一啲以前經常出入嘅地方，不自覺咁掀起好多回憶，如華富邨（我亦都因為咁樣而寫咗一篇華富邨憶往嘅blog）西營盤, 中上環等等, 都係我中學嘅時候放學留連嘅地方，而深水埗，黃大仙，童年時代老媽有親戚朋友住喺呢度，放假經常帶我哋又車又船咁過海去探親戚，所以呢兩度地方亦都留下唔少歡樂嘅回憶; 企喺雲咸街，望住娛樂行同埋陸海通大廈，小學嘅時候星期日個袋如果有餘錢，都會搭車往上中環，去皇后戲院睇場十點半卡通片，又或者去娛樂戲院睇返套邵氏電影，嗰陣時候能夠睇場電影，已經覺得係俘件好開心，好幸福嘅事情，今日景物依舊，戲院卻面目全非了。仲有已經改建成為盈暉台嘅荔園，靚仔嘅時候每逢農曆新年，𢭃到利是之後定必會去荔園朝聖，探下大象天奴，彈下波子機，或者入鬼屋探險，今日取而代之嘅已經係一棟棟住宅，完全搵唔番當日荔園嘅痕跡，咁又係嘅，時間巨輪一定係往前滾動，舊嘅嘢只可能留在心中，我喺度諗，即使有奇蹟，荔園仍健在，都只不過係一種點綴，唔通今時今日我入嚟荔園，仲可能會懐著童年時候嗰種期待同興奮嘅心情嗎？

(10) 忽然發覺，自己同青年嘅所喜愛嘅歐西流行歌手好多已經離去，Folk 方面， Glen Campbell， Judith Durham, Mary Jarvis，John Denver。Rock N Roll嘅有Janis Joplin , John Bonham ,Freddie Mercury , Jimi Hendrix, David Bowie,但最令我傷感嘅都係一班Easy Listening嘅歌手，佢哋陪伴我嘅成長，蠢蠢欲動嘅青春歲月，每晚都係聽住佢哋嘅收音機做功課，入睡，就好似自己身邊周圍嘅老朋友，Karen Carpenter，Olivia Newton John ,monkee嘅 Davy Jones, Helen Reddy , George Harrison, John Lennon, Jim Croce, Bee Gees嘅 Maurice 同埋 Robin Gibb,  好彩仲有佢哋陪伴着我:  Barry Gibb, Lobo, Don McLean, Beatles 嘅Paul McCartney, Ringo Starr, Bread 嘅David Gates，Elton John，願佢哋都幸福長壽