以前嘅事

（1）我記得以前陽光猛嘅時候，會晒甩皮，啲皮一塊塊翹起，可以隨手搣得甩，但唔知點解而家冇咗呢種情況？

（2）以前錄歌，係用有收音機功能嘅錄音機，每當電台DJ播自己心愛嘅歌曲嘅時候，就按record制，將鍾意嘅歌錄係餅cassette 帶裏面，但當然用手撳掣冇咁準，好多時候會錄埋DJ把聲，又或者啲廣告，於是有人會去街邊啲唱片舖，先揀咗心愛嘅歌曲，然後請唱片舖同佢錄喺盒cassette上邊，我記得如果自備cassette,唱片舖就會每錄一隻歌收5毫，咁樣錄歌嘅好處，除咗唔會有DJ講嘢或者廣告外，音色當然亦都特別靚，當年有唔少男仔，都會去唱片舖揀歌嚟錄，送俾女仔做禮物

（3)講起聽歌，靚仔嘅時候除咗喺收音機度聽歌，仲會喺涼茶嗰啲Jukebox度聽歌。當年好多涼茶舖開喺戲院隔離，觀眾未夠鐘入場，都會喺涼茶舖度坐，飲杯酸梅湯等入場，大部份涼茶舖都有Jukebox，咁啲人就會入一毫子點隻歌，坐喺度䟴䟴腳，一邊聽歌一邊飲涼茶，好不愜意。好多經典嘅Pop songs我都係喺涼茶舖度第一次聽到，譬如Bee Gees嘅Massachusetts ,Animals嘅House of rising Sun, Simon and Garfunkel嘅bridge over troubled water,都喺涼茶舖第一次聽到，覺得好驚艶

（4)八達通仲未盛行之前，一般人對散銀需求殷切，因為要用嚟買報紙，搭車，甚至買餸，所以會有個怪現象，好多上咗年紀嘅婆婆會一早去銀行唱定一袋袋散子， 1毫，2毫，5毫，然後坐喺銀行門口賣，當然要附加服務費，譬如一袋$10嘅一毫子，就賣$11 ，賺取蠅頭小利幫補家計

（5)六七十年代嘅茶樓夥計，個個喺嗰件衫袋裏便都會袋張啤牌卡，茶客離座之後，佢哋就用啤牌喺枱面一掃，咁枱面上面嘅骨頭就會一掃而空，又真係好有民間智慧。另外夥計耳仔一定會夾支煙仔，呢啲煙仔唔係自備，而係熟客醒嘅。講到熟客，佢哋一上到茶樓坐定，識做嘅夥計會自動幫佢開茶，唔使佢開口問飲乜，因為醒目嘅夥計一定會記得啲熟客飲開乜嘢茶，當然你識做佢識做，除咗平日醒支煙仔之外，過時過節一定會俾封大利是，多謝個夥計嘅貼心服務。至於生客，夥計就會喺膊頭攞條萬年祝君健康毛巾喺枱面拍兩拍，然後問你飲乜嘢茶，呢個就係生客同熟客嘅分別

（6)直至九十年代以前，茶客一坐低，夥計就會遞條熱毛巾俾你抹面, 部分茶樓甚至有蒸櫃專門蒸毛巾,後來因為好多茶客因此惹到砂眼，所以茶樓先至取消咗呢個傳統

（7)又講返酒樓，以前未有手機嘅時候，酒樓會喺接待處附近擺幾個電話，供客人使用。有時候有電話打入嚟搵客人，個收銀就會喺個廣播系統度叫，乜先生請聽內線1號，個客就會自動去收銀處聽電話。另外高級啲嘅酒店，偶然有人打電話去酒店coffee shop搵朋友，酒店係講求寧靜嘅地方，唔會有廣播，咁個侍應就會舉個牌，上面寫住某先生有電話，請去大堂接聽，客人見到有電話搵自己，就會起身去接電話。呢啲情況係今時今日手機已成為身體一部份嘅年代，真係匪夷所思

（8)未有CD ，iPod以至iPhone嘅Spotify之前，聽歌係要用唱片機，唱片有33轉，45轉，78轉之分，不過七十年代之後，逐漸淘汰細碟，所以絕大部份唱盤都只會調到33吋。我第一套Hi-Fi係喺中三嘅時候買，除咗用嚟聽歌之外，亦都曾經係唔少同學用嚟開party嘅恩物

（9)靚仔梗係鍾意睇電視啦，小學嘅時候屋企冇電視，就要去涼茶舖或者士多，一毫子睇成晚，後來屋企終於肯買電視機，第一個電視機係黑白電視，黑白唔緊要，最無良嘅竟然係一部有趟門鎖嘅電視機，老媽子出街之前一定鎖住個電視，唔俾我哋掛住睇電視荒廢溫習嘅時間，搞到我哋只能夠望電視而輕興嘆。一句題外話，當時好多人都會喺電視前邊放塊藍色膠片用嚟防輻射，到彩色電視機嘅時候就用啡色膠片，唔知各位仲記唔記得？另外我仲記得6，70年代電視機仲係好貴嘅時候，有電器行推出租電視嘅服務，標榜第一唔需要一次過攞一筆錢出嚟買電視機，第二可以隨時換款，如果我冇記錯，當年謝賢同埋拉姑，仲拉埋霆鋒，婷婷兩兄妹出嚟一家賣廣告

（10)讀小學五六年班嘅時候，一來屋企俾零用錢較為手鬆，二來老媽子亦都冇管控得咁嚴，所以每逢星期日，遇上個袋有幾蚊，都會好似有蟻咬羅柚咁去中環睇戲，嗰陣時候唔知係咪競爭激烈，所以娛樂戲院都會賣大包，一場兩片，所謂一場兩片，就係買一張飛，可以連睇兩套唔同嘅戲，計埋仲平過公餘場，認真超值。我記得喺娛樂戲院睇過嘅西片有大盜九尾狐，獨行俠連環奪命槍，坦克大決戰，仲有一兩套日本古裝打鬥片。另外佢對面嘅皇后戲院星期一早上10:30都會做卡通片，吸引兒童觀眾，我都喺皇后放低過唔少銀両

（11)巴士嘅售票制度好似去到70年代中先至完全取消，在此以前，巴士上邊係有售票員售票，佢攞住一疊車飛同埋個打孔機，行到你面前，問你去邊，然後喺張車飛上面打窿之後遞俾你。我仲記得以前架巴士有條繩，到站嘅時候如果有人落車，個售票員就會拉吓條繩，撞響司機隔離個鐘仔，司機就會停車落客

（12)牙灰除咗用嚟放喺香爐入面插香之外，仲可以用來省砂煲，又真係可以省到立立令，另外我仲見過啲老人家用牙灰幫跌傷咗嘅小朋友噏傷口，聽講可以立即止血。但我心諗，牙灰又唔係消毒藥水，個傷口會唔會因此而受到感染？